SAM 80:1-13

¹Ninu Isrel aminu ninukuya tasinggayak kapa, gata ninu Josepdane dongune nana kepi noman tapane panomanuwawi yuamang. Unzing gatane sipsip matekga kayuayak binga. Ge ninda gae yanggawaatna maak panimuyo. Gata king kapa yot takwan siknga gwekatang angela kekeknga apaapa yuaingune banakan yuayak. Yuke kakaa akngakata ninde apsok.

²Apan ninu Efraimde dongaat gatu Benjaminde dongaat gatu Manase nganggane dongae kakaa waaknga aanggaman tasiwi kanim. Ngan, kekeknga buyambamu waakngaka ninde yeutnimuke apu gatanimi ninda take yutnim.

³Anutu, gata ninde butaya natanimuke ninu gatuka gikae ninipakapso. Pakapuke ninu ninduyuke gatanimi ninda wena dua sinim.

⁴Anutu, ga kekekngakabamban tapa. Tapduu datdasing gatane amindabamu gae tumuk wamu ganiwawa ngana gata kaanga natayamuya?

⁵Gata tasiwi ninu kwanambam sike kai yangga ninu nanam gatu yangga ngang binga nake ba tangoke yuamang.

⁶Gata aminu dongu kundu kundune nana kapewi ninde wesim yuke amak wam yake nindane kep tanangge yakaing. Yake iwaninu waakwakga masa wam ninike atninimikaing.

⁷Anutu, ga kekekngaka bamban tapa, gata ninu dua nindupeke gatane kekeknga akngakata paniwambi ninda dua upeeke wena dua sinim.

⁸Siwan tupa gata wain nap taknga Isip kep komune take takapbuyak. Takapuke gata aminu dongu kundune nana keu waomune ayanikwasiwi kuwana gata wain nap taknga waamindane kep komune kwaikuyak.

⁹Kwainangge natake gata keu wandaka tapi kakaawan gwa kwaikuyak. Kwaiwi takake waapatane muyakngita puku taawan wa apa buyambam siknga takake keu kuupbam gepa tasikut.

¹⁰Siwan wain nap waapatane kaingata tawanu kuupbam gatu katau buyambamu kundu kuut usikwatapbut.

¹¹Sike nau waapatane kaingata kuke nambis buyambamu Mediterenian gatu yangga buyambam tapatu Yufretis ngang yanikainggane kwaimune kuking.

¹²Siwan ngana dasingge gata damanu wain puyae wamambasikingu gwenu waitdekuyak? Ge aminu kepiapane kuyuk kake buya kukwae pakaing.

¹³Siwan ikwawa zongga apu ayainggamuwawa gatu kaap zongga atnakaing.