SALAMO 73:3-28

³Badina be kara dika taudia edia taḡa na itaia negana ai, hekokoroku taudia na vaḡeḡe henidia.

⁴Badina be idia na asi edia hisihisi, tau-anidia na a'auka-a'auka bona tonika-tonika.

⁵Idia na asie hisihisimu, haida heḡereḡeredia, bona se gorerediamu, haida bamodia.

⁶Taunabunai, hekokoroku na aiodia agevana, daḡedaḡe ese e ḡovadiamu, dabua na heto.

⁷Matadia na digara ese e hagudu lasimu, kavakava na lalodia amo e hepurai dobimu.

⁸Idia na hevaseha bona badu herevadia e gwauraimu, atai gabudia amo dagedaḡe herevadia e gwauraimu.

⁹Ududia reḡedia na guba ai e daemu, maladia reḡedia ese tanobada e hahonuamu.

¹⁰Taunabunai, taunimanima e gini kerehaimu, e hanamodiamu, ediai kerere ta asie davariamu.

¹¹Idia na e tomu “Dirava na ede baine diba toma a? Herea Mikamika na mai dibana a?”

¹²A itaia, kara dika taudia bini; asie hekwarahimu, to edia taḡa e bada e laomu.

¹³Asi badina lalogu vada na haḡoevaia, asi badina imagu na kerere amo vada na huridia;

¹⁴badina be dina idoinai vada na hisihisi, daba iboudiai hisi na animu.

¹⁵Bama toma “Unu baina hereva toma”, natumu na edia uru ai bama koidia.

¹⁶To na haeroa ede baina dibaia toma negana ai, ita-itana egu ai na hekwarahi ḡauna;

¹⁷ela bona Dirava ena gabu helaḡana nala, bena edia doko daladia na diba.

¹⁸Momokani, oi ese dedidedi gabudia ai o atodiamu, o habuadia tarimu;

¹⁹vada e hebua tari haraḡa-haraḡa, gari ese vada e butudia tao.

²⁰Idia na nihi na heto, e noga tauna enai; o nogamu ai nihi ai o ita ḡaudia o dadaraidiamu.

²¹Laumagu e hisihisiva bona lalogu na e kodoava negana ai,

²²lau na kavakava bona mata-lahui, lau na boroma na heto, oi vairamu ai.

²³Ḡau tamona, lau na hanaihanai oi ida, oi ese imagu idibana o dogoa taomu.

²⁴Emu sisiba amo o hakaugumu, gabe amo hairai ai bavabigu dae.

²⁵Guba ai daika baina davaria? Oi mo sibomu. Tanobada ai ḡau ta asina ura heniamu, oi mo sibomu.

²⁶Hidiogu bona lalogu bae manoka, a Dirava na lau lalogu ena goada, bona lau ahugu ela bona hanaihanai.

²⁷A itaia, oiemu amo dauhai e nohomu taudia na bae mase; oiemu ai e koikoimu taudia na o hamasediamu.

²⁸A Dirava badibadinai na nohomu be namo; Ḡaubada Iehova na egu roho-mauri gabuna ai vada na halaoa, emu kara iboudiai baina herevalaidia totona.