Buk Song 73:3-28

³Long wanem, mi lukim ol man nogut i kamap maniman na mi mangal long ol samting bilong ol dispela bikhetman.

⁴Ol i no save kisim pen long bodi bilong ol. Ol i strongpela man, na bodi bilong ol i gutpela tasol.

⁵Ol i no save karim ol hevi olsem ol arapela man i karim. Ol arapela man i save kisim ol kain kain hevi, tasol dispela kain samting i no save kamap long ol.

⁶Olsem na ol i hambak nating na amamas long skin bilong ol. Na ol i save paitim nating ol arapela man na bagarapim ol.

⁷Long bel na tingting bilong ol, ol i save kamapim ol kain kain pasin nogut ol i gat laik long mekim.

⁸Ol i save tok bilas long ol arapela man na ol i tok long mekim pasin nogut long ol dispela man. Ol i bikhet tru na ol i tok long painim rot bilong bagarapim ol arapela manmeri.

⁹Ol i tok nogut long God i stap long heven. Na ol i litimapim nem bilong ol yet na ol i strong tumas long ol manmeri i mas bihainim laik bilong ol.

¹⁰Olsem na ol manmeri bilong God i laikim tok bilong ol bikhetman na ol i bilipim dispela tok.

¹¹Ol man nogut i save tok olsem, “God i no inap save long samting mipela i mekim. God Antap Tru i no gat rot bilong painimaut pasin bilong mipela.”

¹²Ol man nogut i olsem. Ol i gat planti samting, tasol ol i wok long kisim moa yet.

¹³Mi bin lukaut gut na bel bilong mi i stap klin, na mi no bin mekim sampela sin. Ating dispela em i lus nating, a?

¹⁴Long wanem, God, yu givim pen long mi long san na long nait, na olgeta moningtaim yu mekim save long mi.

¹⁵Sapos mi bin mekim kain tok olsem ol man nogut i save mekim long ol manmeri bilong yu, bai mi giamanim ol na paulim ol.

¹⁶Mi tingting planti na mi traim long painimaut as bilong dispela samting ol man nogut i mekim. Tasol i hat tumas long mi.

¹⁷God, mi traim i go i go inap long taim mi go insait long haus bilong yu. Mi stap long haus bilong yu na tingting bilong mi i klia, na mi save long ol samting bai i kamap long ol man nogut.

¹⁸Yu mekim ol i wokabaut long rot i wel moa yet, na yu mekim ol i pundaun na ol i bagarap olgeta.

¹⁹Ol i bagarap kwiktaim tumas. Na dispela dai bilong ol em i nogut tru.

²⁰Bikpela, ol i olsem man i driman na driman i pinis nating long moningtaim. Man i kirap long moningtaim na driman i no i stap moa long tingting bilong em.

²¹Long dispela taim tingting bilong mi i kirap nogut, na bel bilong mi i pilim nogut tru.

²²Na tingting bilong mi i pas, na mi no save long pasin bilong yu. Mi mekim pasin long ai bilong yu, olsem wel abus i no gat tingting.

²³Tasol mi stap wantaim yu oltaim na yu save holim han bilong mi.

²⁴Yu save givim mi gutpela tok bilong stiaim wokabaut bilong mi, na bihain bai yu kisim mi na mi stap wantaim yu long heven.

²⁵Husat arapela i stap long heven na i save lukautim mi? I no gat narapela man, yu wanpela tasol. Orait God, mi laikim yu moa yet. Mi no laikim olgeta samting bilong graun olsem mi laikim yu.

²⁶Sapos bodi na tingting bilong mi i no gat strong moa, orait God, yu yet yu strong bilong mi. Na yu stap wantaim mi na mi inap tru oltaim oltaim.

²⁷Tru tumas, ol manmeri i givim baksait long yu bai ol i lus olgeta. Na ol man i bin bihainim yu bipo, na nau ol i lusim yu pinis, bai yu bagarapim ol.

²⁸Tasol mi, mi stap klostu long yu na dispela i gutpela tru. God, Bikpela, yu banis tru bilong mi, na mi laik tokaut long olgeta samting yu bin mekim.