Roomma 8:5-25

⁵Faiqí faiqi naundurákinaa mandá íriranamau fímariasa nári naundurákinaa írirafa náriqa rafáaqafunnisáifaqa mi-maú fídaqa. Ánutuna maraquna ufamáu fímariasa maraquna áidimari ainainafa misá nitikúraki kéeqafi rakísi qumáraifaqa mi-maú fídaqa.

⁶Faiqí faiqi nídimari manda ainaináfa aní átikuraki rakísinana kúqirannai ubeekanóo máridanoo kafáa miná dínni Ánutuna maraquna fannoo narí áidirafa aní átikuraki rakísinana mifá aní maréeqeenoo káqi máriranaki faqa asooáranaki faqa ubeekáma amaqáannoo.

⁷Faiqí faiqi mandá nídirafa nitikúraki rakísimarisa Ánutuna namuqáakammiqa máridaqa, sía Ánutuna sándufamau fídaqa, fídaqau sía amanaíkiaqini.

⁸Nári faiqí faiqi íriranamau fímariasa sía amana Ánutuna áidiramau fifáranoo.

⁹Ínnee Roomma máqusai máriasa qiní qíkaqaafasaauqa ínnee sía miqímariasa Ánutuna maraquna fannoo ínnikina márifaqa ínnee sía faiqí íriranamau fímariasa máriafanoo ínnee maraquna ufamáu fímariasa máriafanoo. Ásauku mundírana maraquna síaifa sía mináindi máridanoo.

¹⁰Ásauku mundírafa ínni naundurái namummáqainaqa miná maraquna fannoo ínni nifaaqa mandáinaina fannoo nárinoo márinnana sía minára íridanoo qáfaidanoo Yísuna kúqiranara iriséenoo káqi márirana ínni nimana káqi nímidanoo.

¹¹Ánutuna maraquna fannoo Yísufa kúqiranakinaana marafíndifinau. Yísuna mara fíndifu maraqunafá kai ínni faiqí nifaaqa kúqiqa márifanoo kásooqaqee mi-kuqirána uqéereeqeenoo káqi márirana nímiannoo, narí maraquna ínniki márinnanannái miqíannoo.

¹²Óo qiní qíkaqaafasaauqa maasá moo úmmaara ámeemaanai máridaqa maasá faiqí faiqi mandá nídirana ámeemaanai sía máridaqa. Yísuna maraquna úmmaara ámeemaanai máridaqa.

¹³Ínnee maqee faiqí faiqi íriranamau fíqa dóo kúqifaranoo. Ánutuna maraquna ufa irisée minánnai ínnee ínneeqa mandá óosana kúqaruséeqa ínnee sía kúqifaranoo káqi márifaranoo.

¹⁴Ánutuna maraquna fannoo nífiqee fímarisa Ánutuna faiqi námu máridaqa.

¹⁵Ánutufa narí nímimari maraqunafa sía ínni mandá rumbáranaki quqáseenoo rufíarana nímiannoo, mifá sía miqídanoo maaqímmiannoo ínni maréeqeenoo ínni Ánutuna faiqi námu kámmasainaqa miná afeekannái kai qifaaqa quqásee maasá Ánutunara maasá qíkoonée qídaqa.

¹⁶Ánutuna maraquna fannoo anirée maasá qeeqá maraquna minásaa ootúpamásaannanara maasá maraquna qímamida maaqí qídanoo ínnee Ánutuna faiqi námu máriafanoo fee qídanoo.

¹⁷Ánutufa narí faiqí ánaaseera ámiqi amiqira áinaina afeeda máqimaqáina maasá miná faiqi námu márianara minára maasá mifá innaarúnai quqánnimaqáqai qumiasana kásooqaqee máraanaura. Ánutufa narí ásauku mundírana ámaqaqai qumiasana faqa máridanoo mifá miná faqa maasá mirínni innaarúnai náida qímiannoo. Maqee mária aukuana ásauku mundírana kúqira aupurarana dadaaqí máraananoo innaarúnai miná káaqa aréenarana faqa náida qímiannoo.

¹⁸Maqee mári aukuana Yísuna kúqu aupurarana dadaaqí márainafa faqa maasá óosana oosana ummaara márainnana faqa káqikaafa máridanoo, kásooqaqee innaarúnai narí aréenarana náida qímianínafa qáfaananoo firaafá uqanna máriannoo sía maqee aupúraranara qianáura fífau ainainara foora máridanoo.

¹⁹Ánutufa áuqu quqóo ainaináusa innaarúnaindaraana faqa maqásaaqaraana faqa mi-ainaináusa aiqáma moodáanaki káaqa aupúrarana máraidaqa Ánutuna faiqi námu faiqí faiqi misá kúqiranakiqari fíndifiranara áfeesidaqa. Misá káaqa firaaqóo minára áfeesida máridaqa. Maasá Ánutuna faiqi námu sáimbaqa putaa íranakiqari idukúaqee qímasee káaqa áfeesidaqa.

²⁰Innaarúnai faqa maqásaa faqa mári ainaináfa aiqáma putaa ínoo mandáikinoo rakéeinoo madaapeekámmidanoo. Sía narí kai miqídanoo Ánutufa narí qímaqoomáu fídanoo miqídanoo. Ánutufa mináuqa faqa faiqí nárira ufa ámeemaanai quqáqoosa máridaqa madaapeekídaqa. Mi-putaaira mariráfa qumaarándanoo máridanoo miná aufadára ufa faqa máridanoo maaqímminoo máridanoo.

²¹Aiqáma mári ainainafa narí putaa kíqari kásooqaqee idukúfuannoo. Idukúfinoo Ánutuna faiqi námu nári idukíranaki faqa idaaqíra aréenaranaki faqa kéeqafi moodáanaki márifaranoo.

²²Óosanasaaqari aiqáma Ánutufa áuquqoo ainainafa ánaasee inaamúnai aupúraida ikíraqée maríanara foora maqee putaa írafa ummaarándanoo máridanoo.

²³Sía áuquqoo ainainafa kai aupúraidanoo maasá faqa qeeqá faiqí faiqi mandá márira nírana aupúrarana aupúraidaqa, kásooqaqee Ánutufa firaa qumiasana maasá innaarúnai qímiannoo, maqee óosana arasée nímira ainaina narí maraquna nimiqoosá máridaqa. Maasá Ánutunara áfeesidaqa aupúraidaqa mifá maasá aiqáma qipatasáa márirana íriranakinaana idukúsainaqa narí faiqi námu kámambiqa innaarúna ququsaki máriaqeera minára qeeqá faiqí faiqi mandá márira nírana aupúraranara aupúraida áfeesida máridaqa.

²⁴Maasá Yísunasaa írirana rusíseeqa minára asasammásee áfeesidaqa minánnai innaarúna asumu márirana máreeqa. Asasamándee áfeesimaría ainaináfa aniráinaqa qáfamasee maasá sía áfeesianaura. Sía moó fannoo narí qáfeemari ainainara áfeesidanoo, dóo ani máridanoo.

²⁵Maasá sía qafaa ainaina kambíqaannoommifoo qídaqa ubiqáfi reendeenámandee asasamásee áfeesidaqa.