5Xli̠hua̠k hua̠nti̠ chunacú ni̠ talakmakaní̠t xali̠xcájnit xtalacapa̠stacni caj xma̠nhuá tali̠taakatzanke̠tama̠y hua̠ntu̠ xala ca̠quilhtamacú, pero hua̠nti̠ talamá̠nalh chuná cumu la̠ lacasquín Espíritu Santo xli̠ca̠na pi̠ caj xma̠nhuá tali̠taakatzanke̠y natama̠kantaxti̠y xtapa̠xuhuá̠n Dios.
6Xli̠hua̠k hua̠nti̠ caj xma̠nhuá tali̠taakatzanke̠tama̠y hua̠ntu̠ lakati̠y catatláhualh a̠má li̠xcájnit xtalacapa̠stacnicán hua̠ntu̠ hua̠k kalhi̠yá̠hu, caj chuná tali̠laktzanka̠ta̠yay, pero a̠ma̠ko̠lh hua̠nti̠ tali̠taakatzanke̠y xlacata natama̠kantaxti̠y nac xlatama̠tcán hua̠ntu̠ natali̠makapa̠xuhuay Dios xli̠ca̠na pi̠ luu li̠pa̠xúhu y akatziyanca nalatama̠y.
7Porque a̠má xali̠xcájnit quintalacapa̠stacnicán hua̠ntu̠ xli̠hua̠k aquinín kalhi̠yá̠hu y quinca̠ma̠tlahui̠putún tala̠kalhí̠n, xli̠ca̠na pi̠ huá li̠makasi̠tzi̠yá̠hu Dios y acxni̠ quinca̠makatlajayá̠n niaj kaxmatá̠hu hua̠ntu̠ huan nac xli̠ma̠peksí̠n y ma̠squi laktzaksayá̠hu ankalhi̠ná huí tu̠ li̠laktzanka̠yá̠hu.
8Huá xpa̠lacata cca̠li̠huaniyá̠n pi̠ xli̠hua̠k a̠ma̠ko̠lh cristianos hua̠nti̠ tatama̠sta̠má̠nalh pi̠ caca̠makatlájalh y caca̠ma̠tláhui̠lh tala̠kalhí̠n a̠má li̠xcájnit xtalacapa̠stacnicán hua̠ntu̠ kalhi̠yá̠hu, xli̠ca̠na pi̠ ni̠lay catitamakapa̠xúhualh Dios.
9Pero para huí Xespíritu Dios nac milatama̠tcán huixinín niaj chuná scujnipá̠tit li̠xcájnit mintalacapa̠stacnicán cumu la̠ xtachí̠n, huata huá huixinín ma̠kantaxti̠pá̠tit chuná cumu la̠ lacasquín Espíritu nalatapa̠yá̠tit. Xli̠hua̠k a̠ma̠ko̠lh cristianos hua̠nti̠ ni̠ takalhi̠y Xespíritu Cristo nac xlatama̠t ni̠ huá tapeksi̠niy Cristo.
10Pero para huá Cristo huí nac minacujcán, ma̠squi xli̠ca̠na xlá pi̠ nani̠yá̠tit cumu la̠ cati̠hua̠ cristiano pero quili̠stacnicán cane̠cxnicahuá nalatama̠y porque Dios aya ca̠lakma̠xtuni̠tán xlacata ni̠ naxoko̠nuná̠tit xpa̠lacata mintala̠kalhi̠ncán.
11Bueno, pus para huá Xespíritu Dios hua̠nti̠ ma̠lacastacuáni̠lh Cristo nac ca̠li̠ní̠n huí nac milatama̠tcán, xli̠ca̠na pi̠ na̠ namín quilhtamacú acxni̠ huatiyá tamá Dios hua̠nti̠ ma̠lacastacuáni̠lh Cristo naca̠ma̠xqui̠yá̠n xasa̠sti mimacnicán porque huá acxtum ca̠ta̠lamá̠n nac milatama̠tcán Xespíritu Dios.
12Nata̠lán, ma̠squi lhu̠hua huí lacuán tascújut hua̠ntu̠ quinca̠mini̠niyá̠n nama̠kantaxti̠yá̠hu pero niaj quinca̠mini̠niyá̠n nama̠kantaxti̠yá̠hu hua̠ntu̠ quinca̠li̠ma̠peksi̠yá̠n a̠má xali̠xcájnit quintalacapa̠stacnicán.
13Porque para huixinín caj xma̠nhuá li̠taakatzanke̠yá̠tit la̠ta lácu tla̠n nama̠kantaxti̠yá̠tit hua̠ntu̠ ca̠li̠ma̠peksi̠yá̠n xali̠xcájnit mintalacapa̠stacnicán, pus cha̠catzi̠ya pimpá̠tit laktzanka̠yá̠tit. Pero para huixinín huá xli̠tlihueke Espíritu Santo nali̠makatlajayá̠tit xali̠xcájnit mintalacapa̠stacnicán xli̠ca̠na pi̠ luu ca̠na̠ li̠pa̠xúhu nalatapa̠yá̠tit.
14Xli̠hua̠k a̠ma̠ko̠lh cristianos hua̠nti̠ ca̠ma̠lacpuhua̠ni̠y Espíritu Santo hua̠ntu̠ xli̠tlahuatcán, xli̠ca̠na pi̠ xcamaná̠n Dios tali̠taxtuy.
15Huixinín niaj ca̠mini̠niyá̠n akatiyuj nalayá̠tit para nalacpuhuaná̠tit pi̠ a̠maktum xtachí̠n naca̠tlahuayá̠n tala̠kalhí̠n porque quinca̠ma̠xqui̠cani̠tán Espíritu Santo hua̠nti̠ xcamaná̠n Dios quinca̠tlahuani̠tán, y na̠ huatiyá a̠má Espíritu Santo hua̠nti̠ quinca̠ma̠xqui̠yá̠n li̠camama la̠qui̠ chú ya̠ tapa̠xuhuá̠n nahuaniyá̠hu Dios: “Papá Dios, huix quintla̠t.”
16Y huatiyali̠túm chú tamá Xespíritu Dios hua̠nti̠ acxtum quinca̠makapa̠xuhuayá̠n y ma̠luloka nac quilatama̠tcán pi̠ xli̠ca̠na aquinín xcamaná̠n Dios.
17Cumu xli̠ca̠na aquinín xcamaná̠n Dios, pus luu cha̠catzi̠ya namaklhti̠naná̠hu hua̠ntu̠ xlá ma̠lacnu̠y naca̠ma̠xqui̠y xli̠hua̠k hua̠nti̠ tali̠pa̠huán; y catzi̠yá̠hu pi̠ hua̠k hua̠ntu̠ Dios ma̠xqui̠ni̠t Cristo xlacata nali̠pa̠xuhuay, na̠ acxtum naquinca̠li̠makapa̠xuhuayá̠n. Para la̠nchú lhu̠hua hua̠ntu̠ li̠pa̠ti̠ma̠náhu uú nac ca̠quilhtamacú caj cumu li̠pa̠huaná̠hu Cristo chuná cumu la̠ xlá pa̠tí̠nalh, pus luu lacatancs cacatzí̠tit pi̠ acali̠stá̠n na̠ napa̠xuhuayá̠tit nac akapú̠n chuná cumu la̠ xlá aya pa̠xuhuama.
18Xli̠ca̠na pi̠ ma̠squi luu lhu̠hua pa̠ti̠ma̠náhu nac ca̠quilhtamacú li̠huán antá uú lama̠náhu, ni̠lay caj nali̠si̠tzi̠yá̠hu porque tamá tapa̠tí̠n ni̠para tzinú xalhu̠hua para caj huá nata̠ma̠lacastucá̠hu a̠má lanca tapa̠xuhuá̠n hua̠ntu̠ acali̠stá̠n naquinca̠ma̠xqui̠caná̠n.
19Pus hasta xli̠hua̠k hua̠ntu̠ Dios ca̠ma̠lacatzuqui̠ni̠t la̠ta túcu tahuilá̠nalh tastacnán y ni̠ tastacnán hua̠k takalhkalhi̠má̠nalh xlacata pi̠ aya xlákcha̠lh a̠má quilhtamacú acxni̠ Dios naca̠ma̠xqui̠y xpu̠tahui̠lhcán xli̠hua̠k xcamaná̠n.
20Porque xli̠hua̠k hua̠ntu̠ Dios ca̠ma̠lacatzuqui̠ni̠t xli̠ca̠lanca ca̠quilhtamacú tali̠talakaputzi̠má̠nalh caj xpa̠lacata pi̠ niajlay tama̠kantaxti̠y la̠ta lácu xapu̠lh luu xca̠li̠macamincani̠t. Pero ni̠ huá chuná ca̠liakspúlalh cumu para caj sacstucán xlapututcán, sinoque luu chuná Dios laclhca̠huili̠ni̠t calalh la̠qui̠ natakalhkalhi̠tahuilay hasta nalakchá̠n a̠má quilhtamacú acxni̠ xlá
21tla̠n nama̠kantaxtíy xli̠hua̠k hua̠ntu̠ ma̠lacnu̠ni̠t. Pero ni̠ caj xma̠nhuá xcamaná̠n catitalaktáxtulh nac xlacatí̠n xli̠hua̠k hua̠ntu̠ ma̠laktzanke̠nán, sinoque Dios na̠ naca̠lakma̠xtuy xli̠hua̠k hua̠ntu̠ ma̠lacatzuqui̠ni̠t la̠qui̠ niaj tu̠ natalaktzanka̠y o natani̠y, y xli̠hua̠k hua̠ntu̠ anán nali̠pa̠xuhuay a̠má li̠pa̠xúhu latáma̠t hua̠ntu̠ xlá ca̠ma̠lacnu̠nini̠t naca̠ma̠xqui̠y xcamaná̠n.
22Pus catzi̠yá̠hu pi̠ xli̠hua̠k hua̠ntu̠ anán nac ca̠quilhtamacú tapa̠ti̠má̠nalh tacatzanájuat y ya̠ tali̠puhuá̠n tahuilá̠nalh xta̠chuná cumu la̠ cha̠tum pusca̠t ma̠rí ta̠lay xtacatzanájuat acxni̠ ámaj ma̠lakatuncuhui̠y cha̠tum cskata y aya xlacáchilh lacpuhuán.
23Pero ni̠ caj xma̠nhuá hua̠ntu̠ anán nac xli̠ca̠lanca ca̠quilhtamacú chuná pa̠ti̠ma huata na̠ pu̠tum aquinín chuná makpa̠ti̠ma̠náhu ma̠squi aya kalhi̠yá̠hu Espíritu Santo, porque tihuijcú hua̠ntu̠ natimaklhti̠naná̠hu. Xli̠ca̠na pi̠ luu li̠pe̠cua pa̠ti̠ma̠náhu caj la̠ta lacpuhuaná̠hu aya xlákcha̠lh a̠má quilhtamacú acxni̠ Dios naquinca̠ma̠xqui̠yá̠n a̠ma̠ko̠lh xalacsa̠sti quimacnicán hua̠ntu̠ ni̠ tatlahuay tala̠kalhí̠n cumu la̠ ca̠mini̠niy natakalhi̠y xcamaná̠n; porque acxni̠ chuná naqui̠taxtuy xli̠ca̠na pi̠ luu maktumá aya quinca̠lakma̠xtuni̠tán nahuán.
24Hasta la̠ ca̠lacchú aquinín chunatiyá ca̠najlayá̠hu pi̠ namaklhti̠naná̠hu hua̠ntu̠ Dios quinca̠ma̠lacnu̠nini̠tán, pero para tícu aya maklhti̠nani̠t hua̠ntu̠ xma̠lacnu̠nicani̠t niaj mini̠niy akatiyuj nalay xlacata aya xmaklhtí̠nalh hua̠ntu̠ ma̠lacnu̠nicani̠t, y si para hua̠ntu̠ Dios xma̠lacnu̠ni̠t aquinín aya maklhti̠nani̠táhu entonces niaj quinca̠mini̠niyá̠n nalakli̠puhuaná̠hu xlacata nacatzi̠yá̠hu túcu cahuá naquintica̠ma̠xqui̠caná̠n.
25Osuchí xamaktum para chuná lacpuhuaná̠tit, porque tamá hua̠ntu̠ aquinín kalhi̠ma̠náhu naquinca̠ma̠xqui̠caná̠n ni̠ tasiyuy pus huá xpa̠lacata luu xafuerza pi̠ ankalhi̠ná lakasiyu nakalhkalhi̠tahuilayá̠hu.