Romans 3:4-25

⁴Gei deeai! God le e donu, ma e aha maa digau dogologo e helekai tilikai. Di Beebaa Dabu e helekai boloo, “Oo donu gi modongoohia mai i au helekai. Goe gi aali i dau gabunga.”

⁵Malaa e hai behee? Maa tadau haihai hala le e haga modongoohia aga di tonu o God, gidaadou le e mee di helekai boloo, “God le e hai gee i dana hagaduadua gidaadou”? (Deenei di heeu belee heeu.)

⁶Gei deeai! Maa God le e hala, Mee e deemee di hagi aga henuailala!

⁷Maa dogu hai kai tilikai le e haga maaloo aga di madamada o God gi gidee humalia, malaa au e aha dela e hagahuaidu be tangada huaidu?

⁸Malaa, gidaadou de ga helekai boloo, “Gidaadou gi heia di huaidu, gei di humalia ga gila aga”? Malaa e donu, hunu gau i golo e hagahuaidu dogu ingoo i nadau helekai bolo au e agoago beelaa. Digaula ga hagahalaua, gii tau anga.

⁹E hai behee go gidaadou digau o Jew, gidaadou e mada humalia i digau tuadimee? Hagalee hai beelaa! Au gu haga modongoohia bolo digau o Jew mo digau tuadimee le e hai hua be di mee e dahi i lala di mogobuna o di huaidu.

¹⁰Di Beebaa Dabu e helekai, “Tangada e donu ai,

¹¹Hagalee tangada e iloo ai, be e daumaha gi God ai.

¹²Nia daangada huogodoo guu huli gi daha mo God. Digau huogodoo gu ihala. Deai tangada e hai nia mee donu ai.

¹³Nia ngudu digaula e hai be nia daalunga ala gu maahuge. Nia helekai tilikai e lloomoi i nia holole digaula, nia lee lagalagamaaloo e hai be nia poisin o nia gihaa, e lloomoi i nadau malau ngudu.

¹⁴Gei nadau ngudu le e honu i di haga halauwa mmala.

¹⁵Digaula e limalima di haga mmaemmae mo di dadaaligi nia daangada gii mmade.

¹⁶Digaula e oho mo di hagahuaidu nia gowaa huogodoo ala e hula ginai.

¹⁷Digaula e de iloo di ala o di aumaalia.

¹⁸Digaula e de iloo di haga madagudia a God.”

¹⁹Malaa, gidaadou gu iloo bolo di haga honu o nnaganoho la anga hua gi digau ala e noho i lala nnaganoho bolo gi deemee nia daangada di helekai hagaanga, ge gi gaamai henuailala hagatau gi lala di hagi aga a God.

²⁰Idimaa, tangada e mee di donu i baahi o God ai, mai i dana haga gila aga nnaganoho. Nnaganoho le hai gidaadou gi iloo bolo gidaadou digau gu ihala.

²¹Gei dolomeenei God gu haga modongoohia dana ala e hai nia daangada gii donu i dono baahi, ge hagalee mai nnaganoho. Nnaganoho Moses mo nia Beebaa o nia Soukohp le e haga modongoohia hua di maa.

²²God e hai nia daangada gii donu i dono baahi mai i di nadau hagadonu a Jesus Christ. God e hai di mee deenei ang gi digau huogodoo ala e hagadonu a Christ, idimaa, nia hai geegee dangada ai.

²³Nia daangada huogodoo la guu hai di huaidu, gei digaula huogodoo gu mogowaa loo, gu hagalee tau anga gi di hagamouli a God.

²⁴Mai tumaalia dehuia o God, digaula huogodoo guu donu i baahi o God mai i Jesus Christ ne hagamehede digaula.

²⁵God guu wanga a Mee bolo mai dono made kisakis, Mee guu hai di ala e wwede ai nia hala o nia daangada mai i nadau hagadonu a Mee. God ne hai di mee deenei belee haga modongoohia bolo ma ko Ia dela e donu. I mua, gei Mee nogo hagakono, nogo haga de iloo nia huaidu o nia daangada, gei dolomeenei, Mee e haga dina loo nia huaidu o nia daangada belee haga gila ono donu. Mai i di mee deenei, God e haga modongoohia bolo ma ko Ia dela e donu, gei e hai nia daangada huogodoo ala e hagadonu a Jesus gii donu i dono baahi.