Rom 3:4-25

⁴Kini horé! Uni sosoko kota uni tiníkaqo, Anutuko hamó naŋge yoweya. Ŋundiro naŋge sokomeko ŋuno Anutu ŋuro ŋande nakayáŋaró, “Ŋuro tero keto mande roneneŋowí mu naŋge yeyote, ko ronda yerero taka yereweya.”

⁵Norendo otete roneneŋowí kama howeyoteto tiníqo, Anutu koro otete roneneŋowí ŋu tunomo horé yoweya. Asa ko date yewato, Anutuko noreŋo saŋgirí tete quno ŋuno enendo otete roneneŋowí kama howete? (Qeni, nondo unindoro iŋo-iŋoye qu yeteno.)

⁶Kini horé! Ŋu hamó tiníqo, Anutuko unipare soso nokono yoteŋgo qu ronda yerewero mepémo kini.

⁷Asa uni kato ŋande yeweya, peka, “Ko neneŋo otete kota ŋuko Anutu koro otete hamó tunomo riní unipareto owí hokowaŋgo. Asa do karo no quhurí uni neko nerero kimo piyimi nunoyote?” yeweya, peka.

⁸Hamó, uni kumimbo no yesará nerero ŋande yeteŋgo, “Ko Polko ŋande yete, ‘Nore meté o piyimi tatoqota o meté tunoqeweya.’” Uni mande ŋu yeteŋgo qundo topé piyimi hamó rewaŋgo.

⁹Asa do ka yewato? Nore Juda unindo uni wini meyowo taka yereyoteto, peka? Ŋunde kini. Dokoro komo ŋande yato, uni soso, asa Juda unindoya uni wini meyowomboya, quhurí kasiramo yoteŋgo.

¹⁰Ŋuro sokomeko ŋuno ŋande nakayáŋaŋgurí, “Uni kato roneneŋowí horé kama yote, hamó, kato roneneŋowí kama yote.

¹¹Kato iŋoní tondaŋeyote qu kama yote, Anutu seqawero quro uni ka kama yote.

¹²Sosopo huwóŋoro wuruwara uni tunoqaŋgurí, o meté tewero quro uni ka kama yote, kanata ŋunde qu ka kama yote.”

¹³“Puŋeye muko uni tapu ŋunde qembe teyote, mipiyembo topo-topoye kaná yereyoteŋgo.” “Sire koro sonoyó oŋgomi kumunzóye saŋano yote.”

¹⁴“Maŋgoyembo mande piyimi yero newonde piyimi ri tunoqeyote.”

¹⁵“Yuroyi sitú umbuwero khe quwore kheŋgeŋoyoteŋgo,

¹⁶rambaruru koya newonde surumímboya ri tunoqeyote,

¹⁷ko newonde imemboro kama iŋoyi tondaŋeyote.”

¹⁸“Yoto-yotoyemo Anutu koro sasaro kama teyoteŋgo.”

¹⁹Asa nore ŋande iŋoteto, hutuŋo mande ŋuko unipare kasirayómo yoteŋgo ŋu sopo yereyote. Ŋuro tero uni soso mande topé yewero mepémo kini, ko Anutuko unipare soso nokono yoteŋgo qu mande khono yorotoro ronda yereweya.

²⁰Dokoro uni soso hutuŋo mande koro khewore Anutu toŋímo roneneŋowí tunoqewero mepémo kini. Dokoro hutuŋo mandewore norendo otete piyimi ŋuro iŋomukoteto naŋge.

²¹Quko itaka ka Anutuko roneneŋowí tunoqewero khe qu riní tunoqaró. Khe ŋuko hutuŋo mande howewero khe qu kini. Quko Hutuŋo Mande koya Ye-ye Unindoro mandeye muko khe ŋuro yete.

²²Yesu Kristoko otete meté mu howaró ŋuwore unipare soso iŋondutuwowaŋgo ŋuko unipare roneneŋowí tunoqewaŋgo. Hamó, Anutuko unipare ronda yerero khe enesó-enesó kama howeyote,

²³dokoro nore soso o piyimi tatowó. Kowe Anutu koro sine parámi ŋu rotatoqo,

²⁴Anutuko, Kristo Yesu kimo nereró ŋuwore, eneŋo samaka-samaka tuwó nunoní unipare roneneŋowí tatowó.

²⁵Anutuko Yesu riní eneŋo sitúŋowore sikínani nunowero kheyó tunomo tunoqaró. Tunoqiní ŋuro iŋondutuwoyatowó quno ŋuno quhurínani komo tatowó ŋuro topé kama tete. Murí ŋuwore Anutuko eneŋo otete roneneŋowí rero tunomo witú yereyote.