Rom 3:4-25

⁴Mu menio. Tigidali we bidi augwaligo tibo po wabo bage bidibogo da, God agaduba deligo mu po sesemane sogo wabo dao. Polobadu te genuai bidi Devit agai dwai sę elama tama Godigo agade po tų dolo mu elama tama Devitgo te sogo asęani pogo te eno megi tama wali po tau sabo dao. Agai te we bidigo dwai sę ebogo Godigo po tų dolo mu naga ebo kolesaga hania waselebo po te bukude asęyu tama e po asęani, “Nago po wabo si, tigidali sogo te we bidi augwaligo koneaibao, nago po te dolo po naga dao. Tama augwaligo nage po tų ila mobaso da, teda nago po tų ebogo augwali aiyaba mu elaluaibao,” te po asęani.

⁵Te bidi dabe mebago e tǫde bidigo homu kolesaga wali peyu augwaligo e po obao, “Magi yaliwe? Te dago dwai kolesaga ebogo te Godigo doloba pai kolesaga hanilibaso da, teda Godigo te dago yali dwai sęde dene wei ponobo, tama agai te tama tebo kolesaga te dolo ebo menio.”

⁶Woo, mu menio. Te God dolo me egi menigi sogo da, teda mena tama agai te tigidali tǫde bidibo we bidigo kolesaga dagaligi dawe?

⁷Tama gasa bidigo e po enabolo wei ponaibao, “Te eno te God dali kęą pisąwai kolesaga ebogo te Godigo aga we bidi dali kęą pabo kolesaga mu hanilama, te tama tialigo te aga genuai nogi mu pedalobaso da, teda magi baso agai enabolo te dwai sę ebo bidi nogi polali tama enabolo te dwai sę yali wei ponaibawe?”

⁸Tama we bidi augwaligo te po tama weyu e po me wabo dao, “Ao, Godigo te dwagi yai kolesaga pedalumainogo te dago dwai sę inao. Te bidi Pol agai te tiwai po naga wabo dao,” augwaligo enade nogi posobo po weyu te po wabo dao. Nosali te bidi dabe augwalibolo te Godigo dwai dene wei ponoyu, te agai dolo mu naga wei ponaibao.

⁹Te Godigo te Juda dabe dali yali kolesagade dago magi homu egowe? Te ena me, te dage Rom we bidi meba me, te da te Juda hani bage dao. Te dago te Juda hani isąwai we bidi dabe augwali aiyaba elalubo dawe? Te me tegobeo. Mu menio. Eno tamadi te po walio, te dwai kolesaga sęgęgo da tigidali badi, te Juda me te Juda hani isąwai bage dali te sęgęgo mesegelai dao.

¹⁰Te Godigo po bukude te tiwai po wali e elalubao: “Te doloba pai bidi deli me bidibeo. Mu menio. Te bidi me deligo wiegi yai kolesaga me konebeo.

¹¹Te bidi me deligo God gegebo sę me ebo menio.

¹²Tigidaligo te tų wali pabo tagalali. Augwali tigidali bidi dali te Godigo gedude te olo bidi naga mu pedalai. Te wiegi yai kolesaga ebo bidi mu menio. Awe, me deli me elalubeo.

¹³Te ma dala muai gų pagede polobadu pubulali tigi dwai dwai kugumini ebo tiwai, te bidi dabe augwaligo pedauwaligo wabo po te dwai mu dao. Augwaligo tibo po hauwa wabo dao. Augwaligo te bidi dolobo haniani po hauwa weyu, te dwai hasamanigo te bidi ela mubo tiwai ebo dao.

¹⁴Sesemane sogo augwaligo dwai dwai i ola mabo po odu geyu, te bidibolo sęgę mayu tebo dao.

¹⁵Augwaligo asesa polo gasa bidi dali boi bidi homu elama tama ela mubo dao.

¹⁶Augwaligo augwa dwai sę ebo kolesaga wali peyu, tama te bidi dabe hauwabolo te dene me sęgę me te si naga mabo dao.

¹⁷Augwaligo te gasa bidi dabe dali deli homu elama me bidibeo.

¹⁸Augwaligo te God dali wi dwasianu me ebo menio,” te po te bukude polobadu asęani.

¹⁹Tama dago koneani, te tigidali bomai pogo ebo sę agai te da te bomai po dologode bidibo Juda bidi dabe dali te sę ebo dao. Godigo bomai pogo te da Juda bagebolo me te dena yali dwai sę ola mabo dao. Tama tialigo da, bidi me deli agai “Te ena doloba pai bidi dao,” te po wabo usu egobeo. Te Godigo bomai po te pogo sę si elalubao. Te bomai pogo dago ebo dwai sę dabolo ola mabo dao, tama dago wei ponobo po menio. Tama me, da tigidali bidi te da tigidali gasa haniani tǫde bidibo we bidi dago te Godigo gedude dwai sę yali elaluai, te Godigo da tigidali dali po tų yaibao. Dago te me konemainogo, te bomai po elalubo dao.

²⁰Magi baso meni, te bomai po wali pabo kolesagade te bidi deli agade Godigo ‘Aga doloba pai bidi dao’ po me wagobeo. Te bomai pogo dena dwai sę ebo kolesaga denabolo hania mu ola mayu ebo dao, te tama sę naga te bomai pogo ebo dao.

²¹Te bomai po wali pabo kolesagade te bidi me deli aga Godigo gedude te doloba pai bidi munu me pedalogobeo. Tiali goli megi da te Godigo te bidi doloba pai bidi ilibo kolesaga hania pedalali. Te bomai po wali pabo tųdu me pedalobeo. Menio. Te gasa tųdu pedalai. Tama te bomai po asęani po me, te Godigo po polobadu pusali sę bidi profet dabego pusali po me, te po sigo Godigo te bidi doloba pai bidi ilibo kolesagade nosali yabo sę po wai dao.

²²Te bidi doloba pai bidi ilibo kolesaga e dao: te bidigo konealubo po Jisas Kraisde dąų wali bidi, aga Godigo doloba pai nogi poaibao. Tama tigidali haniani we bidigo konealubo po dąų obaso da, Godigo augwali doloba pai we bidi nogi waibao. Magi baso meni, te Juda hani bidi doloba pai bidi ilibo kolesaga, te Juda hani isąwai bidi doloba pai bidi ilibo kolesaga tedali tedali meni.

²³Magi baso meni. Da tigidali bidi dago dwai sę yai dao, tama da tigidali te Godigo wiegi yai usu niba kadu wabo usu menio.

²⁴Tiali goli Godigo da olo mu tau siyu mabo kolesaga yalio. Tama Krais Jisasgo yali sęgo da ma abelama, tama Godigo da doloba pai we bidi nogi poai. Dago te me abelebeo. Godigo olo mu dabolo te Krais Jisasgo yali sęde te doloba pai we bidi nogi poai.

²⁵Polobadu Godigo Jisas sa muyu, te aga isąma tama agai ni pedaide te dulubo kanemego te agade konealubo po dąų wali bidi dabego dwai sę yali te sela sąwaibao wai. Te kolesagago Godigo te agai ebo doloba pai kolesaga dabolo ola mani. Polobadu Godigo te we bidi augwali dali dua nagame eyu tama augwaligo dwai sę suali goli, agai aga nosali yabo sęde homugo kone pelama agai te dwai sę wei ponebeo. Tiali goli megi e sogode agai te dwai sę ebo sula tagalobo menio. Aga ogwa isalide agai te dwai sę wei ponobo doloba pai kolesaga dabolo hania ola mawai dao. Tama tibaso dago koneani, God digi tigidali doloba pai mu bidibao. Tama dago e me koneani, te tigidali we bidigo konealubo po Jisasde dąų obaso da, agai augwali doloba pai we bidi nogi nogi yaibao.