Oromɛ Shɛɛn 3:4-25

⁴Lee da já bye bada wɛ! Ali sipyii pu bɛɛri ɲɛhɛ bye kafinɛjuu, Kilɛ kunni ɲɛ can fɔɔ ma na jo ba lʼa ka kagana lemu na Kilɛ Kafila wu ni wɛ na: «Mu Kilɛ ba yu, pu bɛɛri na li cɛ na mu ya tii. Pu da ga já jaagi wa shishiin ta ma na wɛ.»

⁵Ayiwa, pii na jo na: «Wèe wo tiibaara ti ɲɛ kakuunɔ wɛ, bani tee ni Kilɛ wo tiimɛ pʼa zhɛɛ na fiinŋɛ.» Wèe di da ba yekɛ jo yee ni wɛ? Kilɛ bu wu loyire li shan wèe wa ɲuŋɔ ni, ta wèe da jo na wʼa nahana? (Sipyii pii wo fungɔngɔ jomɔ nɛ yu mɛ.)

⁶Kilɛ wu shɛ nahana? Bada! Can ɲɛ yee ni wɛ. Kilɛ da bye wu ya tii wɛ, dii wu bi da já kiiri kɔn koŋɔ sipyii na wɛ?

⁷Pii bɛ na ba jo sanha na: «Wèe wo kafinɛjuu bu da lee na Kilɛ wo can wu shɛɛ, fo na nɔɔrɔ bɛ tɛri Kilɛ mɛgɛ na, ɲaha di da ba kiiri pye wu kɔn wèe na pʼi wèe jaagi, na jurumupyii wèe ɲɛ wɛ?»

⁸Ayiwa li bi ɲɛ mu, ta wèe ya yaa na kakuuŋɔɔ pyi, kɔnhɔ kasaaŋaa di da foro ki ni wɛ? Bada! Pii wa wèe mɛgɛ kyɛɛgi na xɔ, na wee kalaa we wèe ya gaan sipyii pu mu. Pee sipyii pii kunni ya sii yaa ni gyɛɛgi ni.

⁹Ayiwa, yi ɲaha di wa dii nimɛ wɛ? Ta wèe Yawutuu pʼa ye sipyii pusamaa na? Bada! Nɛ li shɛ xɔ jo Yawutuu yoo, shi wusama yoo, pee bɛɛri ya ɲaari jurumu wu wo fanha ki nɔhɔ ni.

¹⁰Ma na jo ba lʼa ka Kilɛ Kafila wu ni kagana lemu na wɛ na: «Sipya wa wemu wʼa tii wɛ, ali shɛn nigin bɛ wɛ.

¹¹Wa shishiin ɲɛ fungɔngɔ fɔɔ wɛ; wa shishiin ya Kilɛ shaa wɛ.

¹²Pu bɛɛri pʼa kadugo le Kilɛ ni; pu bɛɛri pʼa pinnɛ pye kaɲɔɔ baa. Kasaana pyevɔɔ wa shishiin ɲɛ pu ni wɛ, ali shɛn nigin bɛ wɛ.»

¹³«Mujuu le lʼa fòro pu geŋmaya ni ge, lee ɲɛ ba faŋa ɲɔmugi-yahaŋa ɲɛ wɛ. Pʼa pu ɲilee taga na sipyii piinŋɛ. Pu ɲɔ jomɔ di ɲɛ ba matɔn sɔɔnrɔ ɲɛ wɛ.»

¹⁴«Laŋi ni kayekyɛɛgɛyɛ yʼa foro pu ɲɔ ni.»

¹⁵«Pu tɔɔyɔ dʼa wɛri sipyigbuu na.

¹⁶Xuu bɛɛri ni pʼa toro ge, gyɛɛgi ni bɔɔngɔ na daha pu fɛni.

¹⁷Lemu li ɲɛ ɲaɲiŋɛ koo li ge, pu ya lee cɛ wɛ.»

¹⁸«Kilɛ ɲìi fyaara ɲɛ pu zɔlɔɔ ni bada wɛ.»

¹⁹Ayiwa, wèe ya li cɛ jo yemu bɛɛri Kilɛ tudunmɔɔ Musa wo saliya wʼa yu ge, saliya wʼa kan piimu mu ge, pee mu wʼa yi yu. Ga, pee di ya ta já wu koo ɲaari wɛ. Lee wuu na jomɔ da ba da sipya wa shishiin mu wɛ, lee na koŋɔ sipyii pu bɛɛri na ba jaagi ta Kilɛ mu.

²⁰Yi li cɛ na saliya wu bɛɛri koo ɲaari, lee da ga já Kilɛ pye wu sipya jate sipyitiimɛ wɛ. Lee funŋɔ ni saliya wʼa li shɛɛ yɛ wèe na na jurumupyii wèe ɲɛ.

²¹Ayiwa nimɛ, cogo wemu na Kilɛ ya wèe wii sipyitiimɛɛ ge, wuyɛ pyaa ya wee cogo we shɛ wèe na. Pee tiimɛ pe ya daa saliya wu koo ɲaari funŋɔ ni wɛ. Ga, tagana lekɛ na pee ya daa ge, Kilɛ tudunmɔɔ Musa wo Kitabuu pee ni Kilɛ tudunmɔɔ pusamaa wuu pʼa yee ɲaha jo na fiinŋɛ.

²²Wa bɛɛri wʼa dà Yesu Kirisa na ge, Kilɛ kunni na weefɔɔ jate sipyitiimɛ. Zhɔnrɔgɔ wa lee ni wɛ.

²³Bani sipyii pu bɛɛri pʼa jurumu pye. Lee lʼa li pye wa shishiin da ga Kilɛ wo nɔɔrɔ wu ɲa wɛ.

²⁴Wu wo niimɛ wu gbɔɔrɔ ni Kilɛ ya pu wii sipyitiimɛɛ mafuu, bani Yesu Kirisa ya pu ɲuŋɔ wolo pu jurumu wu ni.

²⁵Kilɛ ya wu pye saraga, kɔnhɔ wu bye wèe jurumu wu footɔnɔ. Piimu pʼa dà Yesu na ge, Kilɛ ya wu koo li ɲɔ mugi pee sipyii pu mu Yesu wo shishan pu gbɔɔrɔ ni. Lee ya Kilɛ wo tiimɛ pu shɛɛ, bani taashiinɛ li ni sipyii bi jurumu wemu pyi ge, wʼa luu gbo pu tàan, wu ya ta wee wo footɔnɔ kan pu mu wee tuun wu ni wɛ.