Romanos 3:23-28

²³Porque inteꞌ intion cꞌapa cache e mabꞌambꞌanir y tamar era quetpon najtir tut e Dios y najtir tut e corpesiaj.

²⁴Pero coner Cadiosir war uche tuaꞌ caquetpa erach tut jaxir tacar utacarsiaj y machi tuaꞌ catoyi non porque e Cristo Jesús cꞌapa utoyi tamar cacorpesiaj.

²⁵Pues e Dios uyajcꞌu Uyunen xeꞌ jax e Jesucristo tuaꞌ achamay tut e cruz tuaꞌ utoyi tunor lo que cabꞌeto non umen que cache e mabꞌambꞌanir. Y bꞌan uche e Dios tuaꞌ uchecsu que jaxir erach, porque nien e Dios ma erer umuqui e mabꞌambꞌanir bꞌan taca sino que ucꞌani tuaꞌ atojya. Y quetpa ubꞌan tuaꞌ atojya tunor e mabꞌambꞌanir lo que cay uchiobꞌ e winicobꞌ xeꞌ turuanobꞌ tama e onian tiempo cocha mato jax ani toybꞌir. Pero coner non erer cachꞌami utacarsiaj e Dios tuaꞌ atojya lo que cabꞌeto umen que cay cache e mabꞌambꞌanir conda caxin cacꞌupseyan tama e Jesucristo.

²⁶Entonces e Dios uyajcꞌu e Jesucristo tuaꞌ achamay tut e cruz tuaꞌ uyubꞌion caquetpa erach tacar umen que quetpa toybꞌir tunor camabꞌambꞌanir umen Cawinquirar. Y e Dios ixin uche cocha era tuaꞌ aquetpa chequer que jaxir erach ubꞌan conda axin uchꞌamion que erachon conda cacꞌupseyan tama e Jesús.

²⁷Entonces ¿erer ca utattzꞌi ubꞌa inteꞌ winic jay axin uchꞌami e corpesiaj era? Ma cocha erer. Matucꞌa tamar tuaꞌ utattzꞌi ubꞌa. ¿Y tucꞌa tuaꞌ que machi uyubꞌi utattzꞌi ubꞌa? Porque jay acꞌapa ani uche tunor lo que chꞌar tzꞌijbꞌabꞌir tama uley e Moisés, erer ani utattzꞌi ubꞌa. Pero tin e war acꞌupseyan tama e Jesucristo tuaꞌ acorpesna ma erer utattzꞌi ubꞌa.

²⁸Entonces erer cawira que e Dios uchꞌamion que erachon jay caxin cacꞌupseyan tama e Jesucristo. Pero jaxir machi war ubꞌijnu jay war acꞌapa cache tunor lo que chꞌar tzꞌijbꞌabꞌir tama uley e Moisés conda uchꞌamion. Intaca uyajcꞌon e corpesiaj conda caxin cacꞌupseyan tama e Jesucristo.