Romanos 16:9-26

⁹Na' ḻe gwguap tiox Urbano ben' chon xšin Criston' txen len chio', na' ḻecze Estaquis, ḻe chacda'ne'.

¹⁰Ḻecze ḻe gwguap tiox xmigua' Apeles. Da' zan ba bene' blo'e chejnilaže' Criston' do yic̱hj do laže'. Na' ḻe gwguap tiox beṉe' ca' že' liž Aristóbulo.

¹¹Na' ḻe gwguap tiox beṉe' gualaž c̱hia' Herodión na' ḻecze beṉe' ca' že' liž Narciso, con noe' chesejnilaže' Criston'.

¹²Ḻe gwguap tiox no'ole xmigwcho Trifena len Trifosa, no'ol ca' cheson xšin X̱ancho Jesucriston'. Na' ḻecze ḻe gwguap tiox beṉe' zancho Pérsida. Chaquechone' da' ba benchgüe' xšin X̱anchon'.

¹³Na' ḻe gwguap tiox Rufo. Naque' beṉe' blao len chio' chejnilaže'cho X̱ancho Jesucriston'. Na' ḻecze ḻe gwguap tiox xṉe'ena', ḻe ba none' neda' ca xi'iṉe'.

¹⁴Ḻe gwguap tiox Asíncrito, Flegonte, Hermas, Patrobas na' Hermes len beṉe' ḻježcho zjanita' len ḻegaque'.

¹⁵Na' ḻe gwguap tiox Filólogo na' Julia na' len Nereo na' beṉe' zanen', na' Olimpas na' yogo' beṉe' ḻježcho nita' len ḻegaque'.

¹⁶Na' cate' chežagle txen ḻe gwnopa' na' ḻježle cate' chguap ḻježle tiox cont nacbia' chaque ḻježle. Na' beṉe' ca' chesedop chesežag chesonxene' Criston' yogo'te yež gan' ba gwya'a chosoguape' le'e tiox.

¹⁷Beṉe' migw, chṉeyoeda' le'e ḻe gwsaca' cont bi gwzenagle c̱he beṉe' zjanac beṉe' güetiḻ, beṉe' chesaclaže' gonḻe da' xiṉj, ḻe bi chesone' txen len dan' ba bsedle c̱he Diosen'.

¹⁸Bi chosozenague' c̱he X̱ancho Jesucriston' san chosozenague' c̱he da' mal da' yo'o ḻo yic̱hjlažda'ogaquen' na' chesone' con can' žanṉa'. Na' cheso'e diža' xdan chosopede' beṉe' chesejḻe'daze cont chesex̱oayague' ḻegaque'.

¹⁹Yogo'ze beṉe' zjaṉezde' chzenagle c̱he beṉe' chosozejni'ide' le'e, na' danan' chbeda'. Perw chaclaža' gacle beṉe' sina' cont gwzenagle c̱he da' nac da' güen, gague gwzenagle c̱he da' nac da' mal.

²⁰Nach Dios ben' chon cont chzoa chbezcho binḻo ḻecze yob gone' cont Satanásen' dan' chnabia' da' x̱igüe' ca' bi soen ṉabi'an chio'. Na' X̱ancho Jesucriston' soašque' gaclenšcacze' le'e.

²¹Timoteo ben' chonḻen neda' xšin Criston' nga chguape' le'e tiox, na' ḻecze ca' cheson beṉe' gualaž c̱heto' Lucio na' Jasón na' Sosípater.

²²Neda' Tercio chzoja' cart nga con can' ža Pablon', na' ḻecze chguapa' le'e tiox, ḻe naccho txen chejnilaže'cho X̱anchon'.

²³Ḻecze Gayo chguape' le'e tiox. Neda' Pablo zoa' liže' na' ḻecze liže' nga chesežag beṉe' ca' chesonxen Criston'. Na' ḻecze Erasto ben' nac ḻo ne'e mechw c̱he ciudan' chguape' le'e tiox na' len beṉe' biše' Cuarto.

²⁴Soašca X̱ancho Jesucriston' gaclenšque' yogo'le. Na' ca'šcacze gac.

²⁵Ḻe gonxench Diosen'. Ḻen' nape' yeḻa' guac cont gaclene' le'e soac̱hac̱hle šejnilaže'lene' can' ža diža' güen da' chyix̱jue'eda' chzejni'ida' beṉe' c̱he Jesucriston'. Na' chzejni'ida' xtiža' Diosen' da' nono ṉa' ṉeze cate' za' x̱ete yežlion',

²⁶perw ṉa'a Diosen' ba bzejni'ide' chio' bi zejen da' ca' none' mandadw bosozoj beṉe' ca' bosozoj Xtižen' cani'. Na' Dios ben' zoa toḻi tocaṉe chaclaže' šej diža' c̱hen' yogo' yež cont yogo' chio' beṉac̱h šejnilaže'cho Jesucriston' na' gwzenagcho c̱he'.