Lom 16:9-26

⁹eka Ebane etem nitem nanoba Yesus Klaiste okoko okok kebob esa eka ne neke kla goba blie Stekis esa i baabeniba Fole Klayam blibte ge baabenebo ge baabeine!

¹⁰Afelise Klaiste bainobo galino sbal mabie naka esa eka nakaia unangai Alistobyulase amo blib isa

¹¹eka ne meletane make Helotian esa eka nakaia unangai Yesuse bainobo gabibi Nasisase amo blib isa

¹²eka Tlaifinao Tlaifosao i dab osa baabeniba Fole Klayam blibte ge baabenebo ge baabeine! Unang asu eli Sume okoko sbalma okok bliobe. Eka ne neko kla gobo blio Fesiso Sume okoko sbalma okok bio osa

¹³eka Lufase Sume kukubo kla wafu bie naka esa eka e biem osa makob ne biem na kesoa ibo baabeniba Fole baanea Klayam blibte ge baabenebo ge baabeine!

¹⁴Eka ibo Asinklitas esa eka Fligon esa eka Hemis esa eka Fatlobas esa eka Hemas esa eka i nekwali bainobo galini i baka blib isa

¹⁵eka Filologas esa eka Yulia osa eka Neliase e unango i mikim osa eka Olimfas esa eka Gode bainobo galin nakaia unangai i baka blib isa alukum baabeniba Fole ibo Klayam blibte ge baabenebo ge baabeine!

¹⁶Gode nakaia unanga ibo ib sinwalo heitdabesese nine! Klaiste bainobo galin nakaia unangai bib mak bib mako mina bianiba lotu kebinabibi alukum ibo Ayam blibte ge baabeibobe.

¹⁷Ne nekwal ibo ne weng mako baabenamabibe, naka maki mo bainobo gabibbai ib isak temo blibi Yesus Klaiste wengo deiboniba weng afet ota nakaia unangai omkayebiba Yesuse bainobo galin nakaia unangai maki funaniba I wengo bainobo gabiba eka mak ile I wengo dimobo Gode weng ota bainobo gabiam nabianiba bainobo galin nakaia unangai isak temo niniino misiam omkabiobe. Nakaia unanga eli amitie bainobo galin nakaia unangai i bainobo galino watwat daye binabiobe. Ibo nakaia unanga elisuo afetu beine!

¹⁸Ina binabib naka unang ile nib Sume Klaiste okoko mo okok kebibbabe. I imeno bobol ota fumbinabiobe. I weng ayam ayamob obianiba ibo baabeniba Imen olo uninobo doweine! Eka imen olole awemobo mo dowonaibe ge oye biam binabiobe. I ina bianiba nakaia unangai men weng men weng oye biam bliba nakaia unangai bobol temo klao mo fumbibbai i weng olo wenteniba funaniba I weng olo klayamobo gabinabiobe.

¹⁹Ibo Gode wengo wafu blibo weng sango nakaia unangai alukum wentebib kesoa ne ibo seinyebibe. Ibo ina blib kesoa ne bobol temo funania Ibo kukub ayamo olota tekein keniba nabianiba kukub misiam ole amitie deibueine gabibe.

²⁰God ele bobol ayamo mitmakamobe. E bobol ayamo ibo omyebua Gululame ib skilo tabab tem daak dobtamanea e titil blimanamabeo amo meb anobe. Nib Sume Yesus Klaiste ibo daayemeko!

²¹Timotie ni dabo Klaiste okoko okok kebob naka esa ibo Ayam blibte ge baabenebe. Eka ne meletani Yudai maki Lusias esa Yeson esa eka Sosifata esa i Ayam blibte ge baabeibobe.

²²Futan olo Fole besa weng obeta Tetias neta futan olo dolaita ibo omfubenamabebe. Tetias ne Sume niniino taisania Ayam blibte ge baabeiobe. Ne weng gwabo bayotabe.

²³Eka Gaias esa Ayam blibte ge baabenebe. Fol ne e am ele blibe. Yesuse bainobo galin nakaia unangai teniba e am ele mina bianiba lotu kebinabiobe. Eka Elastase bibam olo monio kima binabe naka esa eka nib neke Kwotas esa Ayam blibte ge baabeibobe.

²⁴Nib Sume Yesus Klaiste ibo alukum daayemeko! Bainobe.

²⁵Nibo Gode niniino dobtouleb nomo! Ne Yesus Klaiste dowan wengo naka mak unang maki omkayebio ne baabenia Yesuse ib bainobo galino omsbal mabenamabebo ge baabeibio e bain titilsa kesoa e ib bainobo galin osa omsbal mabenamabebe. Sinanggwano Yesus Klaiste weng olo amitie ayok binabo

²⁶otane memalo Gode omkeimanebiobe. Sinanggwano God kintaline e bobol temo funanea Bib mak bib mak seli Yuda isa eka Yudaba isa weng olo wenteniba bainobo geine geneta weng olo e weng omkeimalin nakai baabeneta buk temo dolaibbiobe.