Romans 16:9-26

⁹Stachys naso otao de Urbanus nangoda kondade ari embo Keriso da buro da awa sewo gore atugurena.

¹⁰Edo embo jiwae be gosera Apelles umo saboa ari mi Keriso kera isira. Embo awa sewo gare atagurena. Edo Aristobulus ategurena sewo gare.

¹¹Herodiom Jew embo na inge de Narcissus da memei Iesu gebe edo era awa sewo gore ategurena.

¹²Tryhaena de Tryphosa de God da agipo ewamei edo era edo Persis umo God awasedo buro nembodiba isira awa sewo gare ungo ategurena.

¹³Rufus God awa embo buro nembodiba isira edo uso ai iji berari na awa uso mei simba arago edo isira awa sewo gore ategurena.

¹⁴Asyncritus de Phlegon de Hermes de Patrobas de Hermes de daedo Iesu gebe ari nanonamendi nenei de da ategurena sewo gore.

¹⁵Philologus de Julia de Nereus de uso ru de Olympas de God da teotopo ungode daedo atera awa sewo gore ategurena.

¹⁶Edo ingo Iesu gebe ari embobo ingo mina bara ise atega mina ara ewo. Edo Iesu gebe ari embobo diti diti mi ungoda atega ari ingoda yei ititera.

¹⁷Naso nanonamendi na ingoda yei sena embo nenei mi embo eoro dada edo diti ewoga ewoga edo era. Edo ungo mi eoro embo ro gebe eri awa mana mana edo era. Edo ungo mi atopatari ingo mi burisewa awa jumboro wosedo ira. Awasedo embo awodo edo era awa diti jinjibewo. Edo daedo dada eove.

¹⁸Edo embo awodo edo era awa Keriso ingodenaso Bada awa sapo aera te ungoda jo da dipapa awa kera edo era. Edo awodo ise ge girawo garawo sise embo da yei ge ngamo sedo era. Edo ungo awodo ise embo kiambu gosisera awa ganduburera.

¹⁹Edo embo berari mi ingo iji berari binga ewamei jigido ewa awa ingido era awasedo na iaviri ena. Edo na ingoda ari ewagaewa ari da gari awa bajarase dipapa ena te na ingoda ari bebegae ari da gari awa kiambu arase dipapa ena giwo.

²⁰Edo God ingodenaso jo jamo jamo ari da susu amimi iji tupo Satan awa patari munjadira. Edo patari munjedo Satan umo ingoda goroba da tuda adira. Bada Iesu da kando ari awa ingoda yei iji matawa atare.

²¹Naso Keriso da buro da kondade ari embo Timothy de naso otatao Lucius de Jason de Sosipater de mi ingo ategurera.

²²Paul da ove eiawa na Tertius mi gaianase sedo Paul mi naso yei sisira. Setiri nanemi gaiena. Edo na awa daedo Iesu gebe ari embo mi ingo ategurena.

²³Na Paul Gaius da mando da atima ena. Edo umo ingo ategurira giwo. Edo uso mando ainda Iesu gebe ari embobo awa dada edo era. Edo nati da gano simba ari embo Erastus de nangoda namendi Quartus de mi ingo ategurera giwo.

²⁴Bada Iesu Keriso da ewamei ari ingo berari da yei mata awa atare. Awara.

²⁵Ingode God jasiga ore. Ko matu be matu iji matu da God uso ge awa unjugedo atima isira te boroko awa isaga etira. Edo ge awasedo edo binga ewamei Iesu Keriso da jawo da ainde nanemi minonu sedo ena awasedo God mi etiri ingoda tumonda ari awa be goroba etira. Edo ingoda tumonda ari awa goroba ari ingoda gebe ari awa mana atae adira.

²⁶Edo God da gebe moka awa binga sari embobo mi gaisera awa isaga etira. Edo daedo emo berari mi gebe ise kera orase God betae atima ira amimi busu berari da embo berari mi uso ge ingorase sisira.