ROMANOS 16:7-21

⁷Loꞌo juaꞌa̱ chcuichaꞌ ma̱ jiꞌi̱ Andrónico loꞌo Junias tyaꞌa quichi̱ tyi naꞌ, tyaꞌa ngutuꞌu naꞌ niꞌi̱ chcua̱. Tyucuaa nguꞌ biꞌ laca nguꞌ ñati̱ nu cua nda Cristo jiꞌi̱ ndyaa, chaꞌ ta nguꞌ chaꞌ jiꞌi̱ ycuiꞌ Ndyosi loꞌo nguꞌ nu cua tyijyuꞌ la; nguula tsa cña nu nguaꞌni nguꞌ cuentya jiꞌi̱ nu Xuꞌna na. Pana yala la ngusñi nguꞌ biꞌ chaꞌ jiꞌi̱ Jesús, loꞌo liꞌ tiyaꞌ la ngusñi naꞌ chaꞌ biꞌ.

⁸Loꞌo juaꞌa̱ chcuichaꞌ ma̱ jiꞌi̱ lcaa nguꞌ tyaꞌa nscua xtañi nguꞌ lo quityi re: jiꞌi̱ Amplias, chaꞌ tyacaꞌa tsa yu ꞌna xquiꞌya ycuiꞌ nu Xuꞌna na;

⁹loꞌo juaꞌa̱ jiꞌi̱ Urbano, tyaꞌa ndyuꞌni naꞌ cña jiꞌi̱ Jesucristo; juaꞌa̱ jiꞌi̱ Estaquis, la cuiꞌ juaꞌa̱ tyacaꞌa tsa yu ꞌna;

¹⁰juaꞌa̱ jiꞌi̱ Apeles, chaꞌ cua jlo tiꞌ na chaꞌ ngusñi tsoꞌo yu chaꞌ jiꞌi̱ Cristo xquiꞌya lcaa cña nu ngua jiꞌi̱ yu cuentya jiꞌi̱ Cristo; juaꞌa̱ jiꞌi̱ lcaa nguꞌ tyaꞌa Aristóbulo;

¹¹juaꞌa̱ jiꞌi̱ Herodión tyaꞌa quichi̱ tyi naꞌ; juaꞌa̱ jiꞌi̱ lcaa nguꞌ tyaꞌa Narciso nu jlya tiꞌ jiꞌi̱ ycuiꞌ nu Xuꞌna na;

¹²juaꞌa̱ jiꞌi̱ Trifena loꞌo Trifosa, nu ndyuꞌni tsa cña jiꞌi̱ ycuiꞌ nu Xuꞌna na; juaꞌa̱ jiꞌi̱ Pérsida tyaꞌa tsoꞌo naꞌ, chaꞌ quiñaꞌa̱ tsa cña tsoꞌo jiꞌi̱ ycuiꞌ nu Xuꞌna na nguaꞌni maꞌ biꞌ;

¹³loꞌo juaꞌa̱ chcuichaꞌ ma̱ jiꞌi̱ Rufo, sca ñati̱ jiꞌi̱ Cristo nu tsoꞌo tsa chaꞌ nchcuiꞌ nguꞌ jiꞌi̱; loꞌo juaꞌa̱ jiꞌi̱ xtyaꞌa̱ Rufo, nu ngunaꞌa̱si̱i̱ tsa jnaꞌ ñiꞌya̱ si laca maꞌ xtyaꞌa̱ naꞌ;

¹⁴loꞌo juaꞌa̱ jiꞌi̱ Asíncrito, jiꞌi̱ Flegonte, jiꞌi̱ Hermas, jiꞌi̱ Patrobas, jiꞌi̱ Hermes, loꞌo juaꞌa̱ jiꞌi̱ lcaa tyaꞌa ñati̱ jiꞌi̱ Cristo nu ndyuꞌu tiꞌi̱ ca slo nguꞌ biꞌ;

¹⁵loꞌo juaꞌa̱ chcuichaꞌ ma̱ jiꞌi̱ Filólogo, jiꞌi̱ Julia, jiꞌi̱ Nereo, jiꞌi̱ nu cunaꞌa̱ tyaꞌa ngula yu, jiꞌi̱ Olimpas; loꞌo juaꞌa̱ jiꞌi̱ lcaa tyaꞌa nguꞌ nu stuꞌba ntsuꞌu chaꞌ jiꞌi̱ nguꞌ loꞌo Cristo. Ntiꞌ naꞌ chaꞌ chcuichaꞌ ma̱ jiꞌi̱ lcaa ñati̱ biꞌ cuentya jnaꞌ.

¹⁶Nu loꞌo chcuichaꞌ ma̱ jiꞌi̱ tyaꞌa ma̱, tyucui tyiquee ma̱ quityi ma̱ jiꞌi̱ tyaꞌa ma̱ chacuayáꞌ jiꞌi̱ Cristo. Lcaa taju ñati̱ nu ntsuꞌu chaꞌ jiꞌi̱ loꞌo Cristo ca nde, cua ntiꞌ nguꞌ chcuichaꞌ nguꞌ jiꞌi̱ ma̱.

¹⁷Cuꞌma̱ tyaꞌa ntsuꞌu chaꞌ jiꞌna loꞌo Cristo, lye chcuiꞌ naꞌ loꞌo ma̱ juani, chaꞌ tii ti tiꞌ tyiꞌi̱ ma̱ xi, chaꞌ ná tyuꞌu tucua ñati̱ nu ta chaꞌ cusu̱u̱ jiꞌi̱ ma̱ loꞌo tyaꞌa ma̱, chaꞌ ná tacu̱ꞌ loo nguꞌ biꞌ chaꞌ liñi jiꞌi̱ Cristo nu cua ndyuna ma̱. Ná xñi ma̱ chaꞌ jiꞌi̱ nguꞌ biꞌ,

¹⁸chaꞌ siꞌi cña jiꞌi̱ Cristo laca biꞌ, si xaꞌ la chaꞌ nchcuiꞌ nguꞌ loꞌo ma̱. Nduꞌni nguꞌ biꞌ lcaa chaꞌ cuxi nu nclyacua tiꞌ ycuiꞌ nguꞌ chaꞌ cuaꞌni nguꞌ. Loꞌo juaꞌa̱ ndyuꞌni nguꞌ chaꞌ quichi̱ yaa chaꞌ hique nguꞌ tiꞌi, chaꞌ tsoꞌo tsa ndañi chaꞌ nu nda nguꞌ, chaꞌ tajuaꞌ ti nchcuiꞌ nguꞌ.

¹⁹Pana nu cuꞌma̱ ni, tsoꞌo tsa nchcuiꞌ ñati̱ chaꞌ jiꞌi̱ ma̱ lcaa quichi̱, chaꞌ tsoꞌo tsa ndaquiyaꞌ ma̱ chaꞌ jiꞌi̱ Cristo. Tsoꞌo tsa ntiꞌ naꞌ ñaꞌa̱ naꞌ jiꞌi̱ ma̱ loꞌo nduna naꞌ chaꞌ biꞌ; cua ntiꞌ naꞌ chaꞌ yala ti tyatí̱ tiꞌ ma̱ chaꞌ cuaꞌni ma̱ cua ñaꞌa̱ ca chaꞌ tsoꞌo, chaꞌ ná tyatí̱ tiꞌ ma̱ tsiyaꞌ ti chaꞌ cuaꞌni ma̱ ni sca chaꞌ cuxi.

²⁰Ná tyu̱u̱ tsa̱ lyiji chaꞌ cuaꞌni tye ycuiꞌ Ndyosi jiꞌi̱ nu xñaꞌa̱, chaꞌ ngaꞌaa tyaca̱ꞌ cña cuxi nu nduꞌni nu xñaꞌa̱ biꞌ tsiyaꞌ ti. Cuaꞌni Ni chaꞌ ti̱ ti tyiꞌi̱ tyiquee ma̱, ñiꞌya̱ ntsuꞌu tyiquee ycuiꞌ Ni; loꞌo juaꞌa̱ ñaꞌa̱ ti cuaꞌni Jesucristo nu Xuꞌna na chaꞌ tsoꞌo loꞌo lcaa tyaꞌa ma̱.

²¹Loꞌo Timoteo tyaꞌa ndyaꞌa̱ naꞌ cña, loꞌo Lucio, loꞌo Jasón, loꞌo Sosípater nguꞌ tyaꞌa quichi̱ tyi naꞌ, cua ntiꞌ nguꞌ chcuichaꞌ nguꞌ jiꞌi̱ ma̱.