ROM 16:7-21

⁷Ái Adoronikus mái Iunias, gimtul no kakun Iudáiá má diar mulán ruruna i iau, má tungu gimtul kis tiklik i rumán batbat kalar. Boh tám ruruna di lala mánán i diar má rumrum i diar kabin suri kándiar him mai lain arbin. Iau tarwai kak lain nas ur si diar.

⁸Má iau árár pas Ampiliatus, ái lain turang má giur no káián ái Konom.

⁹Iau tarwai kak lain nas narsá Urbanus, ái giur him tiklik sur Karisito. Má kak lain nas mul uri narsán lain turang ái Sitakis.

¹⁰Iau árár pas Apeles. Marán artohtoh ákte tohoi kán ruruna, ái sár a tur atu pagas i Karisito. Iau nas pasi bos tám ruruna di lu kis i rum si Aristobulus.

¹¹Lain nas ur si Erodián giur no kakun Iudáiá. Má lain nas mul uri narsá di di kis i rum si Narsisus má di káián ái Konom.

¹²Ái Tiripina mái Tiriposa, aru wák diar lala him sur Konom, iau árár pas diar mul. Má iau nas pasi kes mul á wák, ái Persis lain turang, ái mul a him rakrakai sur Konom.

¹³Kak lain nas uri narsá Rupus, koner a tuan lite kálámul uri him káián ái Konom, má uri narsán ái mámán mul, a ngoro mamang má a lain ololoh i iau ngoro natun muswan sang.

¹⁴Má iau árár pas Asinkiritus mái Pelegon mái Emes mái Patrobas mái Eremas má tan boh tám ruruna mul di lu tiklik mam di.

¹⁵Kak lain nas ur si Pilologus mái Iulia mái Nerius diar kukun mái Olimpas, má kak lain nas narsán matananu si Káláu di lu hut talum mam di.

¹⁶Má i pákánbung gam lu kis talum suri lotu, gama lu árár arliu i gam mai armámna. Keskeskesá boh tám ruruna si Karisito til main i balis min, di no di nas pas gam.

¹⁷Rang buhang, iau inau i gam ngo gama ololoh kuluk suri tan kálámul alatung di lu bit sokoi bál kálámul ák tabureng má dik lu puár gam. Kándi aratintin a arkawar palai aratintin gamáte mánán on, má ngorer gama kaplah alar di.

¹⁸Boh matngan kálámul ngorer, a támin ngo di bos tám toptop, ái sár kápdite kis án toptop si Karisito kángit Konom. Auh, kándi tu kis án toptop singin bál di sang. A tuan lu siror i kándi angagur án worwor, má dik amusmus pasi holhol káián kálámul a pail be i kán hol.

¹⁹Áá, tan kálámul dikte longrai suri kamu taram i lain pinpidan, má ngorer ák lala gasgas i balang sur gam. Ái sár iau nem i gam ngo gama bos tám mánán uri a kuluk má gama ngoro bos ngul uri sápkin.

²⁰Ái Káláu Tám Tar Moloh, páput má suri na suka bámia Satan uri lalin kik gam. Má artangan káián ái kángit Konom Iesu Karisito na lu kis tiklik mam gam.

²¹Ái Timoteo, koner giur lu him tiklik, a tarwai kán lain nas narsá gam. Mái ruktul minái ái Lusius mái Iason mái Sosipater, gimhat bos kakun Iudáiá, ditul tarwai kánditul lain nas mul.