Romanos 14:1-14

¹Kꞌulu alaq ri jun kꞌamajaꞌ kumaj usukꞌ saꞌ ri karaj ri Dios chike ri kubꞌul kikꞌuꞌx rukꞌ ri Cristo. Machꞌoꞌjin alaq rukꞌ xa ruma na junam ta runaꞌoj rire rukꞌ ri naꞌoj ralaq.

²Ma puwi ronoje ri yaꞌtalik re katijik, kꞌo ri kuchꞌobꞌ raqan utz katijiꞌ ronoje taq waꞌ yey kꞌo ri kꞌamajaꞌ kumaj usukꞌ rukꞌutunik ri Dios; y chwa kꞌu rire, kꞌo waꞌim e mak che jun we kutijo, y ruma kꞌu riꞌ xew kutij ichaj.

³Ekꞌu riꞌ ri jun kutij ronoje, na utz taj we kukꞌaq bꞌi uqꞌij ri jun xa qꞌalaj ri kutijo. Yey ekꞌu ri jun xa qꞌalaj ri kutijo, na utz taj we kuqꞌat tzij puwi ri jun kutij ronoje. Ma e ri Dios kꞌuluyum ke waꞌ wa tikawex.

⁴¿Lal china rilal chaꞌ kuꞌan lal aj qꞌatal tzij puwi ri raj chak jun chik? Ma e ri rajaw kilowik we utz ri kuꞌano o na utz taj. Jekꞌulaꞌ puqꞌabꞌ ri Dios kꞌo wi kebꞌutoꞌ chikijujunal ri raj chak chaꞌ ketikiꞌ chi utz chwach yey kuꞌan waꞌ rukꞌ runimal uchuqꞌabꞌ.

⁵Kꞌo ri kuchꞌobꞌo kꞌo qꞌij lik il uwach re yakbꞌal uqꞌij ri Dios chwach jujun chik qꞌij; yey kꞌo ri junam karil ronoje ri jujun qꞌij. Chikijujunal lik chirajawaxik ketikiꞌ chi utz che taq ri kakichꞌobꞌ raqan.

⁶Ekꞌu junoq lik kuꞌan il uwach che juna qꞌij, re yakbꞌal uqꞌij ri Qanimajawal kuꞌano. Yey e junoq chik na kuꞌan ta il uwach che waꞌ wa qꞌij, ma chwach rire ronoje qꞌij e re yakbꞌal uqꞌij ri Qanimajawal. Jekꞌulaꞌ, e ri jun kutij ronoje, kutijo re yakbꞌal uqꞌij ri Qanimajawal, ma kutioxij che ri Dios. Yey ri jun xa qꞌalaj ri kutijo, jelaꞌ kuꞌano ma kuchꞌobꞌo rukꞌ waꞌ kuyak uqꞌij ri Qanimajawal; y kutioxij kꞌu riꞌ che ri Dios.

⁷Ma na jinta junoq chiqe xa pa re rire kꞌaslik y na jinta junoq xa pa re rire kakamik. Ma ri kꞌaslem y ri kamik puqꞌabꞌ ri Dios kꞌo wi.

⁸We oj kꞌaslik, ri qakꞌaslem e re yakbꞌal uqꞌij ri Dios; yey we xojkamik, waꞌ re yakbꞌal uqꞌij ri Dios. Jekꞌulaꞌ, we oj kꞌaslik o we xojkamik, oj chi re ri Qajawal.

⁹Ma ruma waꞌ ri Cristo xkamik y xkꞌastaj lo chikixoꞌl ri ekaminaq chaꞌ jelaꞌ kuꞌana Kajawal ri ekaminaq chik kukꞌ ri kꞌa e kꞌaslik.

¹⁰Rilal, ri kaꞌan che ibꞌ la lal aj qꞌatal tzij puwi ri hermano la, ¿suꞌchak kaꞌan la waꞌ? O rilal, ri kakꞌaq bꞌi la uqꞌij ri hermano la, ¿suꞌchak kaꞌan la waꞌ? Ma qonoje kꞌo jun qꞌij kojeꞌtakꞌala na chwach ri qꞌatbꞌal tzij re ri Cristo.

¹¹Ma jewaꞌ ri tzꞌibꞌital kan chupa Ruchꞌaꞌtem ri Dios: Paqatzij wi Riꞌin in kꞌaslik, kacha ri Qajawal, y paqatzij wi, chinuwach Riꞌin kakixukubꞌaꞌ na kibꞌ konoje ri tikawex, y rukꞌ ruchiꞌ kiqul konoje kakibꞌiꞌij panuwi Riꞌin, xew Riꞌin in Dios kachaꞌ.

¹²Jekꞌuriꞌlaꞌ kopon jun qꞌij echiriꞌ qonoje kojeꞌela chwach ri Dios y ekꞌu Rire kaqꞌalajisan re we utz o na utz ta ri qaꞌanom.

¹³E uwariꞌche maqaꞌan chi oj qꞌatal tzij chiqibꞌil qibꞌ; mojuꞌan ne latzꞌanel o tzaqibꞌal che juna hermano.

¹⁴Puwi ri yaꞌtalik re katijik, riꞌin lik wetaꞌam ruma ri Qanimajawal Jesús y lik nujikibꞌam kꞌu uwach waꞌ: Ronoje utz y na chꞌul taj chwach ri Dios. Noꞌj we kꞌo junoq kuchꞌobꞌo kꞌo ri katijik “chꞌul”, riꞌ xew chwach rire chꞌul wi.