Loum 14:1-14

¹Epedeme wua꞉ dulu dla mikadepe dle pase kokalalimale soye allimha꞉ha꞉miya. Epame yia꞉ta momalamale meyelope meyelope dle koko natipame yia꞉ atlemiya.

²Adipalati, mikadepe dle oplami haletapo ya꞉ta malamaleta alisisi hapuloma dloweye ka꞉pi demdepo. Amasiyama mikadepe dle pase kokallalo wekele oplami haletapo ya꞉ta malamaleta alinepi mo dloweye aiyalma demdepo.

³Epedeme dlowe alisisi hapuloma dlowe me-ka꞉pi dlalo oplamitapo ma mo dlowe tlo aiyalma dlalo oplami dla alliwe poka꞉dena. Epalati ma asiyama mo dlowe tlo aiyalma dlalo oplamitapo alisisi hapuloma dlalo oplamiye batalimale oplami dlowe poka꞉dena. Adipalati, Godtapo alisisi hapuloma dlalo oplamiye pobatalimana demhalasema.

⁴Epedeme wa꞉ dla itiyamale hawa, ya꞉mkale oko oplamiye batalimana dloweye. Adipalati, hatlo ya꞉ dokopala oplamitapo meyelo ya꞉ oko oplami kokoye gladlepe. Epalati oko oplamitapo Lodta gadle itiyamale tle ya꞉ okoye woloma ka꞉pi halepe.

⁵Epame ma alila koko dla oplami haleta epo atlowe sepena, alila hatlope tlo pta aiyalma demama asiyama alila opi tlo aiyalma pa꞉na, dlowe sepena. Epalati asiyama oplami haleta atlemama, alila hapulomaye ma hatlopepo, dlowe sepena. Epapele dulu dla ka꞉dena, koko hema opa hapulomatapo isikimi miyelo malamale tle ha꞉ha꞉lowe tlo ka꞉pi.

⁶Adipalati, alila hatlo tlo aiyalma dlalo oplamitapo, ya꞉ Lod malamama ammdepo. Epame alisisi hapuloma dlalo oplamitapo ya꞉ Lod malamama alisisi hapuloma demdepo. Adipalati, ya꞉tapo siyele yu Lod dla atlepame daya demdepo. Epame mo dlowe aiyalma dlalo oplamitapo ya꞉ ma ya꞉ Lod malamama siyele yu atlepame emale alisisi tlo demdepo.

⁷Epedeme di ta꞉lamo hema isikimi bidulo solotamale koko halomha꞉ha꞉lowedeme poha꞉ha꞉sema. Epame dita palliwe mape isikimi bidulo solotamale tle popalimha꞉ha꞉sema.

⁸Amasiyama dita ta꞉lamo hema isikimi Lodta solotamale koko tlo halomha꞉ha꞉lowedeme ha꞉ha꞉po. Epame dita pallipiye, di isikimi Lod yilo palliwepo. Epapedeme dita ta꞉lamo hema ha꞉ha꞉le dulu dla epo dita palliwe dla di isikimi Lod ya꞉ opa depo ha꞉ha꞉lowepo.

⁹Epapele koko tle Kelisotapo powale tle ma pasakalo dla sila꞉tiwapo, ya꞉tapo pasakalo ha꞉ha꞉ so mate epo palli so mate yia꞉ Lod depo hallowedeme.

¹⁰Epedeme wua꞉ adipalati wua꞉ amkale mikadepe dle oplamiye batalimale oplami demdi? Epame wua꞉ ma adipalati wua꞉ amkale mikadepe dle oplamita malamaleye batalimana demdi? Adipalati, dita hapulomatapo God mila꞉pi tle koko gladlowedeme ha꞉ha꞉lepe.

¹¹Ame adipalati, God yu bukata epo atlapo, “Yao ikadepe, opa hapulomatapo na꞉ hete sitali dla heodepame na꞉ye ikadepe Lodpo demyelepe.”

¹²Epedeme dita hapuloma hatlope hatlope dletapo diskamu di kokoye God dla bobotimatimyelepe.

¹³Epapedeme wua꞉ amkadulo mikadepe dle soye allimha꞉ha꞉miya. Epame wua꞉ amkale mikadepe dle oplamita batalimale dulu dla tullala depame wua꞉tapo ya꞉ta kustamtame teyuluwe alisisi some ha꞉ha꞉miya.

¹⁴Epedeme Lod Yesuta na꞉ watle me-imuwapo, dlowe alisisi hapuloma dloweye aiyalma hale hawa ikadepe. Amasiyama epapele tlope oplami haleta atlemama, “Dlowe alisisi opi dlowe aiyalma,” dlepiye, ya꞉ ka꞉dena, dlowe alisisi e podlalo mepo aiyalma depo halloweye.