ROMANOS 14:1-14

¹Tsoꞌo ti chcuiꞌ ma̱ loꞌo sca ñati̱ tyaꞌa ngusñi na chaꞌ jiꞌi̱ Jesús, masi tya lyiji ca cuayáꞌ tsoꞌo tiꞌ chaꞌ biꞌ; ná xu̱u̱ tyaꞌa ma̱ loꞌo nu ñati̱ biꞌ xquiꞌya sca chaꞌ nu ná nchca cuayáꞌ tsoꞌo tiꞌ.

²Ntsuꞌu ñati̱ nu jlya tsa tiꞌ jiꞌi̱ Cristo, biꞌ chaꞌ ná ntsi̱i̱ nguꞌ cacu nguꞌ lcaa lo na. Xaꞌ la ñati̱ nu ná jlya tsoꞌo tiꞌ jiꞌi̱ Cristo, ntsi̱i̱ nguꞌ biꞌ si cuaꞌni nguꞌ chaꞌ cuxi xquiꞌya sca na cacu nguꞌ; biꞌ chaꞌ ná ntajaꞌa̱ nguꞌ biꞌ cacu nguꞌ cuañaꞌ. Ndacu nguꞌ siꞌyu, ndacu nguꞌ cu̱u̱, ndacu nguꞌ caatya, tsa biꞌ ti na ndacu nguꞌ biꞌ.

³Pana nu nguꞌ nu ná ntsi̱i̱ ndacu cuañaꞌ ni, ná tsoꞌo si xtyí loꞌo nguꞌ jiꞌi̱ xaꞌ la tyaꞌa nguꞌ nu ntsi̱i̱ cacu biꞌ. La cuiꞌ ti chaꞌ, nu nguꞌ nu ntsi̱i̱ cacu cuañaꞌ biꞌ, ná tsoꞌo si chcuiꞌ cuxi nguꞌ biꞌ jiꞌi̱ nguꞌ nu ndacu lcaa lo na nu nda ycuiꞌ Ndyosi chaꞌ cacu na, chaꞌ cua nda Ni chacuayáꞌ jiꞌi̱ nguꞌ chaꞌ caca nguꞌ sñiꞌ ycuiꞌ Ni.

⁴Ná tsoꞌo si chcuiꞌ cuxi ma̱ jiꞌi̱ xaꞌ la ñati̱ tyaꞌa ngusñi na chaꞌ jiꞌi̱ Ni. Ycuiꞌ Ndyosi laca Xuꞌna nguꞌ, siꞌi cuentya jiꞌi̱ cuꞌma̱ laca nguꞌ biꞌ; cuentya jiꞌi̱ ycuiꞌ Ndyosi laca cña nu ndyuꞌni nguꞌ, si chaꞌ tsoꞌo ndyuꞌni nguꞌ, si chaꞌ cuxi ndyuꞌni nguꞌ. Loꞌo juaꞌa̱ ná tyacua chaꞌ cuxi jiꞌi̱ nguꞌ xquiꞌya chaꞌ biꞌ, chaꞌ loꞌo nguꞌ biꞌ ngusñi nguꞌ chaꞌ jiꞌi̱ ycuiꞌ nu Xuꞌna na; juaꞌa̱ xtyucua Ni jiꞌi̱ nguꞌ, chaꞌ tyiꞌi̱ tsoꞌo ti nguꞌ chalyuu cuentya jiꞌi̱ ycuiꞌ Ni.

⁵Ntsuꞌu nguꞌ tyaꞌa ntsuꞌu chaꞌ jiꞌna loꞌo Cristo nu nduꞌni tacati jiꞌi̱ sca tsa̱, ná ntsuꞌu chaꞌ jiꞌi̱ xaꞌ la tsa̱ cuentya jiꞌi̱ nguꞌ biꞌ; xaꞌ la ñati̱ nchcuiꞌ chaꞌ na jiꞌi̱ ycuiꞌ Ndyosi laca lcaa tsa̱. Ta ma̱ chacuayáꞌ cuaꞌni scaa ñati̱ tsa ñaꞌa̱ nu nclyacua tiꞌ ycuiꞌ ca nguꞌ.

⁶Si tacati tsa sca tsa̱ cuentya jiꞌi̱ tsaca nguꞌ, biꞌ laca tsa̱ nu ngaꞌa̱ chaꞌ cuaꞌni chi̱ nguꞌ biꞌ loo ycuiꞌ Ndyosi lacua; loꞌo juaꞌa̱ taca cuaꞌni chi̱ nu xaꞌ la ñati̱ loo ycuiꞌ Ndyosi, masi ná ntsuꞌu chaꞌ tacati jiꞌi̱ nguꞌ loꞌo tsa̱ biꞌ. La cuiꞌ juaꞌa̱ ndyuꞌu chaꞌ loꞌo ñati̱ nu ná ntsi̱i̱ cacu cuañaꞌ biꞌ; xquiꞌya chaꞌ ngusñi nguꞌ chaꞌ jiꞌi̱ ycuiꞌ Ndyosi, biꞌ chaꞌ ná ntsi̱i̱ nguꞌ biꞌ. Ndya nguꞌ xlyaꞌbe jiꞌi̱ ycuiꞌ Ni loꞌo ndacu nguꞌ jiꞌi̱. Loꞌo nu ntsi̱i̱ cacu cuañaꞌ biꞌ ni, la cuiꞌ ti xquiꞌya ycuiꞌ Ndyosi ntsi̱i̱ nguꞌ cacu nguꞌ jiꞌi̱; loꞌo nguꞌ biꞌ ndya nguꞌ xlyaꞌbe jiꞌi̱ ycuiꞌ nu Xuꞌna na chaꞌ nda Ni na cacu nguꞌ.

⁷Ntsuꞌu chaꞌ caca na cña jiꞌi̱ Ni, masi tya luꞌú na, masi cajaa na. Siꞌi chaꞌ jiꞌi̱ ycuiꞌ ti na ndiꞌi̱ na chalyuu, siꞌi chaꞌ jiꞌi̱ ycuiꞌ ti na cajaa na;

⁸chaꞌ caca na cña jiꞌi̱ ycuiꞌ Ndyosi, biꞌ chaꞌ ndiꞌi̱ na lo yuu chalyuu. Nu loꞌo ntsuꞌu chaꞌ cajaa na, chaꞌ jiꞌi̱ Ni laca liꞌ, chaꞌ na jiꞌi̱ ycuiꞌ Ni laca na, masi tya luꞌú na, masi cua ngujuii na.

⁹Cua ngujuii Cristo, loꞌo juaꞌa̱ cua ndyuꞌú Cristo chaca quiyaꞌ, chaꞌ ca cuayáꞌ tiꞌ lcaa nguꞌ chaꞌ ycuiꞌ Ndyosi laca Xuꞌna lcaa jyoꞌo nu ngusñi chaꞌ jiꞌi̱ Ni nu loꞌo ngutiꞌi̱ nguꞌ chalyuu. Loꞌo juaꞌa̱ ycuiꞌ Ni laca Xuꞌna ñati̱ nu jlya tiꞌ jiꞌi̱ Ni nde chalyuu juani.

¹⁰Ñati̱ jiꞌi̱ Cristo laca cua ñaꞌa̱ ca nguꞌ tyaꞌa ngusñi na chaꞌ jiꞌi̱ Ni, biꞌ chaꞌ ná ngaꞌa̱ chaꞌ chcuiꞌ cuxi ma̱ jiꞌi̱ cña nu nduꞌni scaa nguꞌ tyaꞌa ntsuꞌu chaꞌ jiꞌna loꞌo Cristo. Ná chcuiꞌ cuxi ma̱ jiꞌi̱ nguꞌ biꞌ, ñiꞌya̱ nu nguaꞌni ma̱ tya tsubiꞌ la; ntsuꞌu chaꞌ tyalaa tsa̱ biꞌ loꞌo tyaa lcaa tyaꞌa na ca su ntucua ycuiꞌ Ndyosi. Nde loo ycuiꞌ Ni tsatu̱ na liꞌ, chaꞌ cuaꞌni cuayáꞌ Ni jiꞌna.

¹¹Ntsuꞌu sca chaꞌ nu nscua lo quityi cusuꞌ nu nacui̱ ycuiꞌ Ndyosi ndiꞌya̱: Ycuiꞌ Ndyosi luꞌú laca naꞌ, nacui̱ Ni, ngaꞌa̱ chaꞌ tyatu̱ sti̱ꞌ lcaa ñati̱ nde loo su ntucua naꞌ, chaꞌ chcuiꞌ liñi nguꞌ loꞌo tyaꞌa ñati̱ chaꞌ laca naꞌ ycuiꞌ Ndyosi Sti nguꞌ.

¹²Biꞌ chaꞌ lacua, lcaa na loꞌo tyaꞌa na ngaꞌa̱ chaꞌ xacui̱ na chaꞌ jiꞌi̱ ycuiꞌ Ndyosi loꞌo tyalaa tsa̱ biꞌ, lcaa chaꞌ ñiꞌya̱ nu nguaꞌni scaa na loꞌo ñaa na chalyuu.

¹³Ngaꞌaa chcuiꞌ cuxi ma̱ jiꞌi̱ cña nu ndyuꞌni scaa nguꞌ tyaꞌa ngusñi ma̱ chaꞌ jiꞌi̱ Jesús lacua. Ndiꞌya̱ cuaꞌni ma̱ juani: ngaꞌaa ta ma̱ tyempo jiꞌi̱ nguꞌ tyaꞌa ma̱ chaꞌ cuaꞌni nguꞌ chaꞌ cuxi xquiꞌya cuꞌma̱.

¹⁴Cua nchcuiꞌ Cristo loꞌo naꞌ, cua jlo tiꞌ naꞌ chaꞌ ni sca na cuxi ná nda ycuiꞌ Ndyosi chaꞌ cacu ñati̱; lcaa na nu ndacu ñati̱ chalyuu, na tsoꞌo laca biꞌ. Pana ntsuꞌu ñati̱ nu ná nchca cacu sca na, xquiꞌya chaꞌ ntiꞌ ti nguꞌ chaꞌ na cuxi laca biꞌ; cuxi tsa laca na biꞌ cuentya jiꞌi̱ nguꞌ biꞌ si cacu nguꞌ jiꞌi̱ liꞌ.