Romanos 11:25-32

²⁵Pues entonces niwermanuox, ayan lo que cꞌani inwareox era tuaꞌ inata tamar ubꞌijnusiaj e Dios xeꞌ mucur ani ticoit tamar e gente xeꞌ tuobꞌ e Israel era. Y cꞌani inwareox tunor era tuaꞌ machi ibꞌijnu que tunor war inata. Y e bꞌijnusiaj jax era: Que qꞌuecꞌojsena uyalmobꞌ e gente tuaꞌ e Israel tuaꞌ machi acꞌupseyanobꞌ tama e Jesucristo, pero machi tuaꞌ aquetpobꞌ bꞌan taca, sino que watar e día conda cꞌani acꞌotoy acꞌupseyanobꞌ tama e Jesucristo. Pero machi tuaꞌ anumuy tunor era este que acꞌapa acꞌupseyanobꞌ e gente xeꞌ sicbꞌabꞌirobꞌ umen e Dios xeꞌ majax tuobꞌ e Israel.

²⁶Y tamar era conda achecta watar e día era tunor e gente xeꞌ tuobꞌ e Israel cꞌani acorpesnobꞌ. Bꞌan cocha chꞌar tzꞌijbꞌabꞌir tama uyojroner e Dios: E Ajcorpesiaj axin achecta tama e lugar Sión, y jaxir tuaꞌ ulocse tunor e mabꞌambꞌanir tama umaxtac e Jacob.

²⁷Y che e Dios, jax era e pacto xeꞌ cꞌani inche taca e gente tuaꞌ e Israel, y conda inche e pacto era tacarobꞌ, cꞌani inlocse tunor umabꞌambꞌanirobꞌ, che e Dios.

²⁸Pues coner war cawira que e gente tuaꞌ e Israel war uxejbꞌiobꞌ ut e ojroner tama e corpesiaj, y tamar era war uxejbꞌiobꞌ ut e Dios ubꞌan. Pero umen que bꞌan uchiobꞌ nox ajcꞌunox e lugar tuaꞌ ichꞌami e corpesiaj coner. Pero Cadiosir warto uyajta utobꞌ e gente era xeꞌ tuobꞌ e Israel porque sicbꞌabꞌirobꞌ utata viejobꞌirobꞌ tama e onian tiempo.

²⁹Porque Cadiosir ma tiaꞌ asutpa ulocse lo que ajcꞌubꞌir umener. Y tamar era conda e Dios axin uchojbꞌes ut inteꞌ winic, machi ixto tuaꞌ asutpa ulocse. Y conda e Dios axin usicbꞌa inteꞌ winic tuaꞌ aquetpa tuaꞌ, jaxir machi tuaꞌ asutpa uyare e winic era que mixto jax tuaꞌ coner.

³⁰Bꞌan cocha turox ani xeꞌ majax tuox e Israel tama e tiempo xeꞌ numuy, machi cꞌupseyanox tut e Dios. Pero umen que e gente tuaꞌ e Israel uyactobꞌ tuaꞌ acꞌupseyanobꞌ tut e Dios, entonces e Dios sutpa y cay uchecsu ucꞌunersiaj tiut nox.

³¹Y bꞌan ubꞌan tama e gente tuaꞌ e Israel. Coner machi war acꞌupseyanobꞌ tut e Dios, pero watar e día conda cꞌani achecta watar ucꞌunersiaj e Dios tamarobꞌ otronyajr, bꞌan cocha nox xeꞌ war ichꞌami ucꞌunersiaj e Dios coner.

³²Porque e Dios cꞌapa uche tuaꞌ caquetpa yebꞌar ucꞌotorer e mabꞌambꞌanir tunoron xeꞌ turon tara tor e rum y bꞌan uche tuaꞌ uyubꞌi uchectes ucꞌunersiaj ticoit tunoron xeꞌ turon tara tor e rum ubꞌan.