Roma 11:25-32

²⁵Pi walageg, bay e tin riyul’ nib mith ni gub adag ni ngam nanged; ya ir e ra talegmed ndab ku um tafinay niged rogon fanmed llowan’, ni ba’aray ni ga’ar: gel laniyan’ rok e girdi’ nu Israel e dabi par, machane bay i par nge mada’ ko ngiyal’ nra yan i gaman e matha’eg rok e pi’in gathi yad piyu Israel ni ngarbad ngak Got.

²⁶Aray rogon ni bayi thap yu Israel ni polo’ ngak Got, ni bod ni be yog e babyor nib thothup ni be ga’ar: “En nma thapeg e girdi’ ngak Got e bayi yib u Zion, ma bayi chuweg urngin e wok nge tafinay nib kireb rok e pi’in yad owchen Jakob.

²⁷Bay gu ngongliy e re m’ag ney ngorad ko ngiyal’ ni bay gu chuweg e denen rorad.”

²⁸Ni bochan e ra n’iged fare Thin Ni Bfel’, ma aram miyad mang to’ogor rok Got ni fan ngomed e pi’in gathi gimed piyu Israel. Machane yad e mel’egrad Got, ere yad e pi tafager rok ni bochan e pi chitamangirad.

²⁹Ya Got e der ma piliyeg laniyan’ rok e en ni mel’eg nge tow’athnag.

³⁰Ma gimed e pi’in gathi gimed piyu Israel e da um folgad rok Got kakrom; machane chiney e ke runguymed Got, ya dakir fol piyu Israel rok.

³¹Ere ku errogon nike runguymed Got ma dakir fol piyu Israel rok, ni fan e ngki runguyrad Got e chiney.

³²Ya Got e ke tay urngin e girdi’ karmanged kalbus rok e danir fol, ya nge yag ni runguyrad ni yad gubin.