Romalani 2:5-25

⁵Jinkani ngurungurundru, ja jinkani ngara burkali panindru jundru muntali tirila kampai tiriuaia ditjia, ja Godaia kalala wondraterinaia ditjia,

⁶Nulia pratjanani kalala jinkila nganai tanani ngankanandru.

⁷Tanangu, tana wonki nganai ngankana ngumuni, ja nguraia ja pirnala ja mudani panila wontiai: Tepi ngurali;

⁸Tanangu, tanali ngara kaldri nganai, ja morlalulani delkiai, ja ngankana talku panini wodatarana ngamai: Tiri ja manju pani.

⁹Ketjaketjana ja japa kana mungara, pratjanani, tanali madlentji ngankai; ngopera Juda kanani ja bakana Grieka kanani;

¹⁰Ngurula ja pirnala ja murla pratjanani, tanali ngumu ngankai; ngopera, Juda kanani ja bakana Grieka kanani.

¹¹Ngaugau Godali kana mudla wata ngundrai.

¹²Ngangau jeruntjajeli jirijiribani jaura panini madlentji ngankana warai, tana bakana jirijiribani jaura panini tintaterila nganai; ja jeruntjajeli jirijiribani jaurantali madlentji ngankana warai, tanali bakana jirijiribani jaurali kalala manila nganai.

¹³Ngangau wata jirijiribani jauraia ngaranietja Godani talku nganai, a-ai, jirijiribani jauraia ngankanietja talku pantjila nganai.

¹⁴Ngangau kana kojeli, tanali jirijiribani jaura pani ngamalkai, muntali jirijiribani jauraia ngankana ngankanani, jeruja tanapini, tanali wata jirijiribani jaura ngamalkai, munta jirijiribani jaura nganai,

¹⁵Ngangau tanali wondrai, jirijiribani jauraia ngankana tanangu ngarani dakana parai, ja bakana tanani ngaraia, ngaialali jenia jela tinkari ngankai, ja bakana tanani ngundrani ngulkuterkijiribamaliai ja jurajuralkijiribamaliai.

¹⁶Nunkangupini ditjini, Godali kanaia kurukurulani kalala jinkila nganai, Jesu Christujeli, ngakani ngantjani jaurundru.

¹⁷Mai, jundru tala ngamalkai “Juda kana” ja jirijiribani jaurani ngara ngamai, ja Godandru jurakokateriai,

¹⁸Ja nunkani jertapaterina ngujamai, ja ngangau jidni jirijiribani jaurandru ngujangujara manina, jundru wontjai mina morla ngumu nganai ngankala;

¹⁹Ja muntali morlalu ngundrai butjuja paltowondranietja nganala, ja praitji tanangu ngalpurani,

²⁰Patipatia pirna ngankanietja, ja koja ngujangujara jinkinietja, ngangau jundru ngujangujamanaia ja morlalulaia malka jirijiribani jaurani ngamalkai.

²¹Jundru kulnuni ngujangujara jinkiai, ja muntali wata ngujangujara jinkiteriai? Jundru jaura jinkiai: Wata kurieli maniamai, ja jundru kurieli maniai?

²²Jidni jatai: Wata pinta wokaribamai, ja jundru pinta wokaribai? Jidni muramurandru dulkumarai, ja Godangundru watawatali maniai, mina nunkani nganai?

²³Jundru jirijiribani jaurandru pirna ngundrateriai, ja Goda jirijiribani jauraia dankaranali waka ngundrai?

²⁴“Ngangau njurangundru kana kojeli Godaia tala ngirkibai,” worderu dakanala parai.

²⁵Ngangau karuwalila ngumu nganai, jidni jirijiribani jaurani pankinani; jidni Godaia jirijiribani jauraia dankaranietja ngananani, jinkani karuwalila karuwalila pani pantjina warai.