Loma: 2:5-25

⁵Koto pelemepate ikita꞉ pi na opiki puki taka꞉lao halememe. Koto ekina꞉ Koda꞉ma꞉ta꞉ hande Natena꞉ hoke hau peleme wanda꞉hali pa꞉ta꞉ mineke pankolo hata꞉ pi yokaalu tikitikina꞉ pia꞉ka꞉na꞉ta꞉ kota꞉ mo iki panisi tieke peaalia꞉ ekita꞉ ika꞉ kone ame pa haka꞉ta꞉paasememe.

⁶Pa ekipeke wanda꞉hali paeyao homeke homekema꞉ piteleme ekimanu Koda꞉ma꞉ handaata꞉ yenki ana꞉na꞉ kilieke.

⁷Mandane wanda꞉halima꞉ta꞉ epeke haumanu pu hatiki peaata꞉ ika꞉ biki epeke wina꞉ lolo pa꞉la꞉eki make Koda꞉ma꞉ ika꞉ pi lawalo pa꞉la꞉eki make homa꞉peke na yeke da꞉ta hao halo pa꞉la꞉eki make weiyu halememe. Kutu piki wanda꞉hali pa꞉ta꞉ Koda꞉ma꞉ da꞉ta hao halo pa꞉la꞉eki halieke.

⁸Kutu piliepate mandane wanda꞉halima꞉ta꞉ ika꞉ hone pa꞉la꞉ ekimanu pu hao pa epeke hau pea꞉pa꞉pekeeki kiao hokeeki kone pu halememe. Kutu piki wanda꞉hali pa꞉ta꞉ Koda꞉ma꞉ mineke pankolo hata꞉ hoke yenki halieke.

⁹Hoke hau pu haleme wanda꞉hali pa꞉ta꞉ Koda꞉ma꞉ ka꞉nda꞉ma꞉ homao tanda tanda pita꞉la꞉eki halieke. Diu wanda꞉hali pa꞉ta꞉ halaata꞉ Diendaili wanda꞉hali pa꞉ta꞉ make halieke.

¹⁰Koda꞉ma꞉ kutu pulu pa꞉la꞉pate epeke hau pu haleme wanda꞉halita꞉ biki ula꞉ kapu halaata꞉ ika꞉ pi laota꞉ ika꞉ puki lopa꞉niaalieke. Diu wanda꞉hali pa꞉ta꞉ amba꞉la pea Diendaili wanda꞉hali pa꞉ta꞉ make kutu pilieke.

¹¹Koda꞉ma꞉ pi yokaalu pitolo hata꞉ ma꞉nda꞉ pa꞉ta꞉ honditi pea make pa ma꞉nda꞉ pa꞉ta꞉ a꞉ta꞉ma꞉ homa make Koda꞉ma꞉ kutupiki hau na piki paeyao pa꞉ta꞉ homeke hone wia pi yokaalu pilieke.

¹²Diendaili wanda꞉halima꞉ta꞉ Mosesima꞉ wape peaala꞉ Lo Pimanu na handeke hoke hau pa pu hata꞉ alupu halememe. Mo hande Lo Pimanu iki pa꞉ta꞉ na ula꞉me. Diu wanda꞉halima꞉ta꞉ Mosesima꞉ wape peaala꞉ Lo Pimanu opuaata꞉ hoke hau pu haleme ekina꞉ Koda꞉ma꞉ mo hande Lo Pimanu hone witolo hata꞉ pi yokaalu pilieke.

¹³Koda꞉ma꞉ta꞉ wanda꞉hali ipiki yaapo tikitiki yao haena꞉ ala꞉ ekita꞉ mo wanda꞉halima꞉ hande Lo Pimanu pa katakema꞉ homeke opiteleme ekina꞉ na pikita꞉ hande Lo Pimanu opua piteleme ekina꞉ haena꞉ lelieke.

¹⁴Lo Pi manuta꞉ Diendaili wanda꞉halima꞉ na handeke hata꞉ kone ika꞉ hone wia mo hande Lo Pimanu pimika꞉na꞉ta꞉ kota꞉ mo pea꞉peke ekimanu make na pea꞉peke ekimanu make ika꞉ kone pitelememe. Mo hande Lo Pimanu na handeke hata꞉ kone pitelememe.

¹⁵Mo hande Lo Pimanu ika꞉ puki pa꞉ta꞉ mendieleme ekita꞉ ika꞉ pu haleme ekima꞉ peneme yaasa꞉me. Kutupa make mo hande Lo Pimanu ota꞉ekie laa ika꞉ hone pa꞉ta꞉ kone leekeme. Hoto ma꞉nda꞉ma꞉ta꞉ ika꞉ honema꞉ alota꞉ Hokeeki pimime alemepate hoto ma꞉nda꞉ma꞉ta꞉ ika꞉ honema꞉ alota꞉ Epekeeki pimime la alememe.

¹⁶Koto ekina꞉ Koda꞉ma꞉ta꞉ hande Natena꞉ pi yokaalu pia꞉ka꞉na꞉ta꞉ I̱ma꞉ hande Pi Seliapo loa꞉ tupa꞉ pilieke. Ipikana꞉ma꞉ta꞉ Yesu Ketisoma꞉ wanda꞉halima꞉ a꞉mbao u haeme hone manuna꞉ pi yokaalu pina꞉ lelieke.

¹⁷Koto pa꞉la꞉pate neketa꞉ eki pelepe. Nakana꞉ma꞉ alota꞉ I̱ta꞉ Diu halie aleme. Nakana꞉ma꞉ta꞉ hande Lo Pimanu pa꞉ta꞉ ti lao hata꞉ naka꞉ kone naka꞉ hakoko litolo alota꞉ I̱ta꞉ Koda꞉na꞉ tapake hali halome aleme.

¹⁸Nakana꞉ma꞉ta꞉ Koda꞉na꞉ hone pa꞉la꞉eki handaata꞉ mo hande Lo Pi manuna꞉ sukulu pea hata꞉ tikitiki hau handa꞉ uluekema꞉ handaata꞉

¹⁹naka꞉ hone dupa ula꞉me. Leke holupiki wanda꞉hali pa꞉ta꞉ I̱ma꞉ pota꞉ wala꞉peke ya꞉la꞉me laa I̱ta꞉ timba꞉ leke pa꞉ta꞉ haleme wanda꞉hali ika꞉ pa̱a̱ peaasoeki halome alo hata꞉

²⁰I̱ta꞉ hone wopu na witeleme wanda꞉hali ika꞉ hone wiaaso hali make weki wandikima꞉ handeleme wanda꞉hali ika꞉ wala꞉la꞉ hali make halome hone witeleme. Naka꞉ honema꞉ta꞉ hande Lo Pimanu opua wia hala꞉ ekina꞉ pita꞉la꞉ ekimanu paeyao I̱ma꞉ handaata꞉ I̱ma꞉ lolo polo pimanu make ota꞉ekie lolueke hone witeleme.

²¹Nakana꞉ma꞉ mandane wanda꞉hali walelepate neke naka꞉ kone ekipeke na walelepe. Nakana꞉ma꞉ pi walolo alota꞉ Pake na napeke alepate nakana꞉ma꞉ naka꞉ kone pake no halepe.

²²Nakana꞉ma꞉ alota꞉ Tooli ka꞉taasa꞉ hau na pea꞉peke alepate nakana꞉ma꞉ naka꞉ kone tooli ka꞉taasa꞉ hau na pu halepe. Toopi ti wepia ula꞉ ale pa꞉ta꞉ yeni pu haleme wanda꞉hali pa꞉ta꞉ nakana꞉ma꞉ pi wopu alepate koto alemanu ula꞉ tembolo da pa꞉ta꞉ ala꞉ta꞉ ala꞉ta꞉ pake no halepe.

²³Nakana꞉ma꞉ta꞉ hakoko litolo alota꞉ Hande Lo Pimanu Koda꞉ma꞉ niki pa꞉ta꞉ kiekeme alepate nakana꞉ma꞉ hande Lo Pimanu yambelele ekina꞉ wanda꞉halima꞉ Koda꞉na꞉ biki hoeyaena꞉ alepe.

²⁴Hande Baibolo bukana꞉ wape pa꞉la꞉ tupa꞉ Ika꞉ Diu wanda꞉halima꞉ pu haleme ekina꞉ mo Diendaili wanda꞉halima꞉ta꞉ Koda꞉na꞉ biki hoeyao halememe.

²⁵Nakana꞉ma꞉ta꞉ hande Lo Pimanu opua miniki hata꞉ pu haeka꞉na꞉ta꞉ kota꞉ naka꞉ sekemesaisi hau peaala꞉ ekita꞉ a꞉pa꞉la꞉pate pa nakana꞉ma꞉ hande Lo Pimanu opua na pu haeka꞉na꞉ta꞉ kota꞉ naka꞉ sekemesaisi hau peaala꞉ ekita꞉ pa ekie.