Shomano 2:5-25

⁵Jamajjeya miya quea mimishi nee nee jjejojo, shajjamaꞌ poani tiitiijo, Eyacuiñajjiya miya quea nee nee po mee cajeꞌyo. Eꞌe, quijje ohuaya ojjaña shajjamaꞌ poani tecuea neinei cajeꞌyo.

⁶Eꞌe jojo nei Eyacuiñajjiya ojjaña eseya sosequia cajeꞌyo ma eseya aninaje sosejje. Ojaya epeejji quea pame quea bihui nee po mee cajeꞌyo. Shajjamaꞌ cuana ca ca quea nee nee po mee cajeꞌyo ma o quea mimishi ponequinaje sosejje.

⁷Jamajjeya beca cuana Eyacuiñajjija esohui jama quea pame nee poani Jesosaja ejjashahuabaquijji jayojja epojji, o jayojja jama epojji, onijje ebaꞌe tiitiiꞌyojji. Eyacuiñajji quea bihui nee po mee sa acani. Jamajjeya Eyacuiñajjiya oya cuana bihuia caje jama baꞌa: —Eꞌe, miquianaya ecuea epeejji quea pame nee. Jamajjeya miquianaya enijje baꞌe tiitiijeꞌyo eyajo.

⁸Pea cuana ca ca Eyacuiñajjija esohui eꞌe nei jama baꞌe sa poꞌyo ajja. Cajaa acani. Shajjamaꞌ poani. Jamajjeya Eyacuiñajji onijje quea quene tii tii poajeꞌyo. Quea nee nee po mee cajeꞌyo.

⁹Eꞌe, Jodio cuana, Jodio pojjeama cuana peaꞌai Eyacuiñajjiya ojjaña quea yeno nee, quea nee nee po mee cajeꞌyo shajjamajojo.

¹⁰Joya ojaya esohui jayojja jama quea pame poani ca ca Eyacuiñajjiya huohui caje jama baꞌa: —Eꞌe jamaya, miya quea pame poani. ¡Jamajjeya quea pame, quea bei baꞌecue! ¡Enijje baꞌe tiitiicue eyajo! ¡Enijje ojjaña huoojeajji pocue! —oya cuana acaje. Eꞌe, Jodio cuana jamaya acaje Eyacuiñajjiya, Jodio pojjeama cuana peaꞌai.

¹¹Ojjañajo Eyacuiñajji eꞌe jojo nei jjashahuabaquiani. Esejaya ebaꞌejjijo jjashahuabaquiani esosequiaꞌyojji.

¹²Jodio pojjeama cuanaja ba jjima poa Eyacuiñajjija esohui ma Moisesiya tehue ca poa. Jamatii oya cuana quea nee nee po mee cajeꞌyo Eyacuiñajjiya quea mimishi baꞌyanijo. Jodio cuaa ca ca Moisesija etehueꞌyo ba canaje. Jamajjeya shajjamaꞌ poanijo, Eyacuiñajjiya oya cuana tecuea caje jama baꞌa: —Miquianaya ca mi ca shajjamaꞌ. Moisesija etehueꞌyo bajji poani, jamatii jamaya aꞌajja. Jamajjeya ma etehueꞌyojo tehue ca poa jayojja jama miquianaya quea nee nee poajeꞌyo —Eyacuiñajji poani.

¹³Moisesija etehueꞌyo Eyacuiñajjija esohui ba majje jamatii Jodio cuana shajjamaꞌ poani. Jamajjeya ojaya mimishi cuana ecuijeaꞌyojji pojjeama. Ojaya esohui jama acani ca ca oe Eyacuiñajjiya mimishi cuana cuijea cajeꞌyo Jodio cuanaja.

¹⁴Jodio pojjeama cuanaja ba jjima Eyacuiñajjija esohui Moisesija etehueꞌyo. Jamatii oya cuana ma esohui jayojja jama baꞌyani beca cuana. Eꞌe, quea jaꞌa nee jjashahuabaquiani. Jamaya ojaya eba quea pame ebaꞌejji. Ojaya eba ebaꞌejji quea tai peaꞌai. Eꞌe, Moisesija etehueꞌyo Jodio pojjeama cuanaja ba jjima nei.

¹⁵Jamatii, Eyacuiñajjiya oya cuana ba meesahua cani ojaya ejjashahuabaquiꞌyojji. Jamajjeya oya cuana oja mimishijo jama poani baꞌa: —Chojja, jamaya Eyacuiñajjija botiꞌama. Eya shajjamaꞌ jayojja poani. Joya quea pame baꞌyani jama poani baꞌa: —Eꞌe, jamaya quea pame ebaꞌejji. Jamaya Eyacuiñajjija quea boti nee —oya cuana poani.

¹⁶Eꞌe, Eyacuiñajjija eba ojjañaja ejjashahuabaquijji cuana. Jamajjeya quijje ohuaya eꞌe jojo nei huohui cajeꞌyo ojjañaja ebaꞌejjijo. Ohuaya Jesosa huoojea caje jama baꞌa: —Jesosa, ¡oya cuana sosequiacue ma ohua meshijo baꞌyahuaa acanaje sosejje! —Eyacuiñajjiya acajeꞌyo. Jamaya eyaya, Pabohua huohuiaña ojjaña esohui quea pame nee Jesosajo.

¹⁷Jodio cuana, miquianaya mimi huichaꞌa huichaꞌani jama baꞌa: —Ecuana ca ca oe Jodio cuana, Eyacuiñajjija babaca ojaya nei epojji. Ohuaya ecuana ojaya esohui ba mee ca poa Moisesija etehueꞌyo. Jamajjeya ohuaya ecuana ba cani mimishiꞌama —miquianaya poani—.

¹⁸Eꞌe, ecuaaya baña Eyacuiñajjija esohui Moisesija etehueꞌyo. Jamajjeya ecuanajaya eba Eyacuiñajjija ejjashahuabaquiꞌyojji. Jamajjeya ecuana baꞌyani quea pame nee, mimishiꞌama —miquianaya poani.

¹⁹Jamajjeya miquianaya jama poani peaꞌai baꞌa: —Jodio pojjeama cuana, Eyacuiñajjija esohui ecuanajaya eba nei nei Jodioja jjejojo. ¡Ecuana jayojjaya oe pocue! —miquianaaya aña—. Ecuaaya Eyacuiñajjija esohui baña Jodiohua jjejojo. Jamajjeya ecuanaya cuaquijiji jayojja jama poani. Jiquio ecua mecajje quea misijo cuaquijijiya ejiojji ba mee cani jayojja jama ecuaaya joya Eyacuiñajji ba pojjimaꞌ cuana quea jaꞌa nee baꞌe meesahuaña.

²⁰Eꞌe, joya Eyacuiñajji ba pojjimaꞌ cuana, Eyacuiñajji oe pojji ba epo peaꞌai ecuaaya esohui ba meesahuaña. Eyacuiñajjiya ecuana ojaya esohui etehueꞌyo ba mee ca poa. Ma esohui eꞌe jojo nei —jamaya miquianaaya aña.

²¹Miquianaaya pea cuana esohui huohui huichaꞌa huichaꞌaña. Jamatii miquea ehuohui jayojja jama baꞌe ajja miquianaya. Eꞌe, jama huohuime aña baꞌa: —¡Aꞌa jja oe sii pojji! Jamajjeya ¿apiojji acuae jja oe miya sii poani?

²²—¡Aꞌa pea cojjojji! —huohui aña miyaya. Jamajjeya ¿apiojji acuae jja oe miya pea cojjojji poani soꞌo? —¡Aꞌa eyacuiñajji nisho bihuiajji oe! —huohuime aña. ¿Apiojji acuae jja nequiaa oe Eyacuiñajji bihuia nishoaña quea aquiana jeaa jjejojo?

²³Miquianaya mimi huichaꞌa huichaꞌani Moisesija etehueꞌyojo: —Ecuana ca jja ca oe Eyacuiñajjiya ojaya esohui etehueꞌyo ba mee ca poa —ca jja nequiana ca oe poani. Jamajjeya apiojji shai miquianaya onijje jjapee nishoquiani, ojaya esohui jayojja jama baꞌe tiitii ajja.

²⁴Eꞌe, yahuajo nei Eyacuiñajjija etehueꞌyo jama poa baꞌa: “Jodio cuana, miquianaya ca jja ca oe shajjamaꞌ baꞌyani. Mi ba majje Jodio pojjeama cuaa Eyacuiñajji cajaa acani”. Jamaya Eyacuiñajjija esohui yahuajo nei etehueꞌyo poa.

²⁵Jodio cuana, yahuajo nei esejaya etiiquianaa Moisesiya Eyacuiñajjija esohui tehue ca poa jama baꞌa: —¡Mique bacuaja cuiishasha biso nei jehuisejjajeacue! Jamaya eseyaya aña, Eyacuiñajjija esohui yahuajo nei jayojjaya aña. Jamajjeya Eyacuiñajjija etehueꞌyo jayojja jama quea pame nee baꞌyanijo cuiishasha ejehuisejjajeaꞌyo quea pame. Jamaya ojjaña ba meeaña eseya, Jodio cuana Eyacuiñajjija babacaꞌyo o peejji epojji. Jamatii Eyacuiñajjija esohui etehueꞌyo jayojja jama baꞌe ajja ca ca ¿apiojji acuae cuiishasha biso nei jehuisejjajeaña soꞌo? Jamatii Eyacuiñajjiya miquianaya ba cani Jodio pojjeama jayojjaya quea mimishi peaꞌaiya.