Rom 2:5-25

⁵Ikut, a balamot i dekdek ma ka mot nukpukus, ra mot ubek tomo anun a kankan netes un mot, sur a bung na kankan anun o God, ra anun a tokodos na warkurai in nanpat talapor.

⁶O God in warkurai arara, elar ut nama pinapam ra i sa pam tari.

⁷Det ra det dekdek una wakak na pinapam sur o God in pitar a minamar torom det, ma in ulabo pas a risandet, ma det nem a nilaun ra ken rop, o God in pitar a nilaun tukum tandet.

⁸Ikut torom det ra det ser ulabo pas det melet ut, ma ka det mur a lingmulus na wasiso anun o God, ma det muri kut a sakino petutna, o God in kankan, ma in balano sungun torom det.

⁹Ma in pitar a mamaut, ma a labino ngunungut torom a taro rop, ra det pam a sakino. Torom a taro Juda mugu, ra numur torom a taro gisen kai.

¹⁰Ikut, torom det rop ra det pam a wakakino, o God in pitar a minamar torom det, ma in ulabo pas a risandet, ma in pitar tar a malmal torom det. Torom a taro Juda mugu, ra numur torom a taro gisen kai.

¹¹Uni, a warkurai anun o God, ke senene, i elar rop kut torom a taro rop.

¹²A taro rop ra ka det tasman a Warkurai anun o Moses, ma det pam a sakino petutna, det in iru ut. Ma lenkutkai ra torom det rop ra det tasman a Warkurai, ma det pam a sakino, o God in warkurai det elar nama wasiso na Warkurai.

¹³Uni, awu sur det rop ra det longoro a Warkurai det tokodos umatan o God, awu. Det kut ra det mur rop a Warkurai, din watung det a kum tene tokodos.

¹⁴A taro ra awu sur a taro Juda, det ra ka det tasman a Warkurai, ikut det pami ut a wakak na petutna, elar nama Warkurai, i ese i lena a Warkurai kura ut una gapindet.

¹⁵A ngas na taro ra, i talapor ra o God i sa tumus tar a wasiso tagun a Warkurai una nuknukin det. A nuknukin det i upuaso anundet a petutna, ra i wakak o awu. Ra det pam a sakino, a nuknukin det ut i takun det, ma ra det pam a wakakino, a nuknukin det i gas nami.

¹⁶Una bung na warkurai, o God in pitar tar a warkurai torom o Iesu Karisito, sur in warkurai det, una kum utna i kis eno una nuknukin det. Ra a ser warawai nama Wakak na Wasiso, a ser warawai una kum utna ri.

¹⁷An inanos mot, ra mot watung mot a kum te Juda. Mot nuki lena mot tokodos umatan o God, uni o God i pitar tar a kum Warkurai tamot, ra mot warango mot lena, mot tagun o God.

¹⁸Mot ser warango mot lena, mot tasman a nemnem anun o God, ma mot gas una kum wakak na petutna, uni mot sa rakon pas a etowo una kum Warkurai.

¹⁹Mot nuki lena, mot elar nam ara ra i ben a pulu, ma mot elar nama talapor torom det ra det kis una dumirum.

²⁰Mot nuki lena, mot ususer kodos det ra ka det mananos, ma mot a kum tene ususer anundet ra ka det tasman tu utna, uni mot, mot sa pam ukai a mananos rop, ma a lingmulusino ra i kis una kum Warkurai.

²¹Mot ser ususer a taro gisen una kum Warkurai, ikut mot ut ka mot ususer wakak pas mot! Mot warawai lena, gong det wolong, ikut mot ut mot ser wolong!

²²Mot watungi tan a taro lena, “Gong mot pam a sakino nam tu ino anun taio o nam tu musano anun taio,” ikut mot ut mot ser pami! Mot nget a kum torotoro na god, ikut mot wolong una kum rumu na etabor anun a kum torotoro na god.

²³Mot warango pas mot una kum Warkurai, ra o God i pitar tari tamot, ikut, mot ban laulau a risan o God, uni ka mot mur a kum Warkurai.

²⁴I elar nami ra di sa tumus tari una Buk Tabu lena, “A taro ra awu sur a taro Juda, det watung laulau a risan o God, i kibino un mot.”

²⁵Ra u mur a kum Warkurai, a tinotok talilis ra di pam tari un ui, i lingmulus. Ikut, ra ko mur a kum Warkurai, u elar kut nam taio ra ka di tok talilis a pinino.