Roma 4:1-24

¹Nayan, mèpiya aw meg-aneng-aneng kidon tepad ki Abraham, sìyan kemonaan te kedita tadon menge Judiyo.

²Simpana pineokit te mèpiya ininang din se peg-aneng-aneng te Timanem te metòlid sikandin, mepakay peden megpelangkaw-langkaw si Abraham. Meneng kenà pineokit kenyan se peg-aneng-aneng te Timanem te metòlid sikandin.

³Netegahan tadon iyan so doen kagi te Timanem insolat tepad kenyan, kagi din, “Nemenal si Abraham te Timanem, aw yan se doun te mig-aneng-aneng se Timanem te metòlid sikandin.”

⁴Aw megterbaho se otaw, eked eneng-enengi te bowang se itandan kandin, so nepagod sikandin.

⁵Iling heman kenyan, kenà otaw egkepagod se eneng-enengen te Timanem te metòlid sikandin. Meneng aw somalig se otaw diyà te Timanem, te sikandin se meg-aneng-aneng te metòlid se otaw nekesalà, yan se otaw eneng-enengen te Timanem te metòlid tandà te pegsalig din.

⁶Minikagi heman si David gebii te meluba se teg sebad-sebad otaw eneng-enengen te Timanem te metòlid dan kenà pineokit te pagod dan meneng pineokit te pegpemenal dan, so minikagi sikandin,

⁷“Doen keluba te kedita te otaw aw pigwedad te Timanem se inang dan medaet, Aw inabat te Timanem se salà dan.

⁸Doen keluba te otaw aw gibowen te Timanem se lista te salà ininang din.”

⁹Na, kenà olò menge Judiyo egpemetolì se begayan te Timanem te keluba sìyan, so egbegayan din heman se menge otaw kenà Judiyo pengkey kenà dan egpemetolì. Netegahan tadon den te inaneng-aneng te Timanem te metòlid si Abraham so nemenal sikandin.

¹⁰Yan se neinang kandin kenà penga te pegtolì kandin, meneng neinang iyan te wedà pa tolii.

¹¹Penga te pegpemenal i Abraham, migpetolì sikandin. Yan se pengilala te inaneng-aneng te Timanem te metòlid sikandin tandà te pegpemenal din te wedà pa tolii. Yan neinang sikandin olo te kedita te otaw egpemenal pengkey wedà dan tolii, so inaneng-aneng heman te Timanem te metòlid dan tandà te pegpemenal dan.

¹²Neinang heman sikandin olo te kedita te Judiyo tinolì kenà tandà te pegtolì kandan, meneng tandà te pegpemenal dan te Timanem iling te pegpemenal i Abraham te wedà pa sikandin tolii.

¹³Gebii, migpakang se Timanem diyà ki Abraham aw menge bowad-bowad din te doen aldaw domateng aw begayan dan te kedakel te keneyonan aw lomowan dan diyà te kedita te otaw. Yan se impakang te Timanem kenà so timolò si Abraham te menge punù ingkeliwat i Moises, meneng impakang iyan te Timanem so nemenal si Abraham te Timanem aw inaneng-aneng te Timanem te metòlid sikandin.

¹⁴Simpana olò otaw egtolò te punù ingkeliwat i Moises se begayan te impakang te Timanem, wedad den kekemowan te pegpemenal tadon te Timanem, aw eked heman ketoman se impakang te Timanem.

¹⁵Keilangan ipelumun te Timanem se kedita te otaw tandà te peglàpang dan te menge punù ingkeliwat i Moises. Eked kepakay se otaw eked làpang te punù singed aw wedad punù.

¹⁶Yan olò otaw egpemenal se begayan te Timanem te impakang din. Ibegay din iyan kenitadon pineokit te tabang din amon metoman iyan ibegay diyà kenitadon timetondog ki Abraham. Kenà olò Judiyo egtolò te menge punù ingkeliwat i Moises se begayan te Timanem, meneng begayan din heman se kedita te otaw egpemenal kandin iling te pegpemenal i Abraham, so neinang si Abraham olo te kedita tadon egpemenal.

¹⁷Doen kagi te Timanem ki Abraham insolat, “Inangen ko sikona kemonaan te medita pongan.” Yan ininang te Timanem si Abraham olo te kedita tadon egpemenal te Timanem iling te pegpemenal i Abraham kandin. Timanem se mekeantay te otaw lekat te nematay, aw mekebatog sikandin meg-inang te wedà pa palos inangi pineokit te kagi din.

¹⁸Pengkey iling te eked palos ketoman se impakang te Timanem ki Abraham, meneng nemenal sikandin. Migpeliman sikandin te aldaw te meinang sikandin kemonaan te medita pongan, so pinekangan sikandin te Timanem te doen batà din tomebaw aw megkedita se menge bowad-bowad din.

¹⁹Netaga-taga si Abraham te temoay sikandin, aw eked den sikandin pekebatà, so agpet den sebad gatos se omay din. Netegahan din heman te wedà lumun pegbatà se esawa din si Sara. Pengkey netegahan din iyan, wedà pegkelomay se pegsalig din diyà te Timanem.

²⁰Wedà sikandin pegdowa-dowa tepad te impakang te Timanem kandin te doen batà din tomebaw, meneng linobos din se pegpemenal din diyà te Timanem, aw induyun din se Timanem,

²¹so netegahan din te tomanen te Timanem se impakang din.

²²Yan se doun te inaneng-aneng te Timanem te metòlid si Abraham so nemenal sikandin.

²³Pengkey yan se kagi te Timanem insolat, te inaneng-aneng din te metòlid sikandin, meneng kenà olò si Abraham se detengan te kagi sìyan,

²⁴so detengan kidon heman. Eneng-enengen heman te Timanem te metòlid se kedita tadon egpemenal te Timanem mig-antay te Pengolo tadon si Jesus lekat te nematay.