Roma 4:1-24

¹Eme sahackopec mimiŋne‐nâŋec Abraham e wemo bâfuawec munaŋmu?

²E jahacne eehâmo giere erâ kiŋticne hefâsâewecko ropaŋ sâcne focnezac. Erâ Anuture maio ine arictâc.

³Miti papiao dâŋ ʒiŋuc fokac i: “Abraham e Anutu manasiŋkeme irec erâ maname kiŋticne tarawec.”

⁴Moc e gie bame furime râcnepene izi katucmâc rârâcne mi ekac, tofa babazucne ekac.

⁵Â moc e ine eehâmo gie mi bapa, sâqocne bapa kiŋjeŋic beheekac e manasiŋkeocmu, eme Anutuzi ere hâcne mamanasiŋ‐ticnere erâ maname kiŋfâsâc eocmu.

⁶Dawidi e iŋuc jaha Anutuzi ŋic moc eehamo gie mi baha, akickehuc kiŋ behecneocmu ere mu ʒeri ehuc kecʒiŋuc qâreŋkewec:

⁷“Bahac‐jeŋic behekicne, â sâqocne‐jeŋic bâtâmirekicne, jaŋere manape ʒerine ekac;

⁸ŋic moc Wofuŋzi manacneme kiŋhec mi eekac, ere manape ʒerine ekac.”

⁹Muʒeri dâŋ kecʒi i mahec nâŋere biŋe sawa ekac me ma tâmiric jaŋere mâmâc ekac? Abrahamte ʒiŋuc manaeŋgopeneŋ: E Anutuzi mamanasiŋ‐ticnere erâ kiŋ behecnewec.

¹⁰Mo dameŋko behecnewec, mahec juhame me ma tâmitric juhame behecnewec? Mahec mâcne, ma tâmiric juhame behecnewec.

¹¹E ma tâmiric juhuc Anutu manasiŋkeme kiŋticne behecnewec irec maqâreŋ ʒâhec râecnewec. Eme Abraham e iŋuc ehuc ine ma tâmiric jaŋe Anutu manasiŋkehuc kiŋfâsâc eeŋgopieŋ jaŋere micne ewec.

¹²Erâ mahec nâŋere micne bapa wâc ewec, erâ mahecte sawa mâcne, e ma tâmiric juhuc mamanasiŋte kike hata âtewec, hata ijaha mimiŋ qâjâpec âtehuc Abraham micne bapa‐nâŋec mucnepene sâckeocmu.

¹³Anutuzi Abraham â ɋâricfâc‐ticne mâreŋ sâko mâreŋ biŋe qajarewec, i sâcmutâc dâŋ rereŋte erâ mâcne, mamanasiŋ‐ticnere erâ kiŋticne behehuc iŋuc ecnewec.

¹⁴Eme biŋe qajarekicne hâcne i sâcmutâc dâŋ rune jaŋere ezac muzac, ine mamanasiŋzi wiac jawane ezac â mitio biŋedâŋ feŋec‐nâpokicne i fârimâc ezac.

¹⁵Sâcmutâc dâŋzi kiŋte okacne fai‐nâŋecko râeekac. Sâcmutâc dâŋ tâmiricko ine qaqatara mi fuaekac.

¹⁶Irec hâcne wiac biŋe qanârekicne i mamanasiŋte erâ fuaocmu. Wemocte? I aki anonoczi feŋeŋ râecneme. Abrahamte ɋâricfâc sasawa nâŋâcnao sanaŋkeocte. Sâcmutâc dâŋko roweckembiŋ jaŋe sawa mâcne, Abrahamzi mamanasiŋ hata âtewec ijaha âteeŋgopeneŋ nâŋâcnao mâmâc. Eki hâcne Anuture maio apa wirec‐nâŋec ekac.

¹⁷Dâŋqâreŋ ʒiŋuc hâcne fokac: “Noni go ŋic gurune gurune jaŋere mamac ecmurâ mugarepo.” Abraham e ine Anutu manasiŋkehuc ʒiŋuc manapaŋkewec: “E hâmoc qâŋɋâŋ bâɋârezo murâ bâɋâreocmu â wiac mi fokac i mume fuaocmu.”

¹⁸E ŋicguru bocjaha jaŋere mamac ezokac, dâŋ i mana hameŋke‐bipiehuc sifu irec mamanac juwec, ʒiŋuc âzâcnekicnere: “Ɋâricfâcge iŋuc fuanʒoŋgopieŋ.”

¹⁹Erâ wâc e jara‐ticne 100 bazukicnezi e jahacne sahac bâmuzuckekicne â Sarare sahac kereŋkekicne i hone‐bipiehuc mamanasiŋ‐ticne sifu mi ŋeŋgoroŋkewec.

²⁰Anutuzi biŋedâŋ âzâcnewec i maname fârimâc mi ewec, ehuc mamanasiŋte sanaŋkerâ Anuture maname fekicne sâko ehame ʒiŋuc muhuc mana utuckewec:

²¹Anutu e wiac mocte biŋe qaocmu i fârine sâcne bâfuaocmu.

²²Irec Abraham e mamanasiŋ focnewecte Anutuzi ere maname kiŋfâsâc ewec.

²³Anutuzi maname kiŋfâsâc ewec, dâŋ i Abrahamte sawa mi qâreŋkekicne, nâŋâcnere wâc mâmâc.

²⁴Wofuŋ‐nâŋec Jesu hâmockonec bâɋârewec Anutu hâcne e manasiŋkepene nâŋâcnere iŋuc jaha maname kiŋfâsâc enaŋmu.