Roma 3:3-26

³Ahora si por ejemplo mucho di ila nuay cree con ele, ta pensa ba ustedes ese el rason Dios ay olvida ya cumpli el di suyo maga promesa?

⁴Hende gayot! Masquin bien embustero gayot todo el maga gente, pero Dios bien fiel pa siempre. Ta habla gane na Sagrada Escritura de Dios: “Necesita dale gayot uste mira que todo el di uste maga promesa deverasan gayot cay ta cumpli uste con ese. Y si tiene quien ay acusa con uste, ay gana uste el asunto.”

⁵Pero si por ejemplo el di aton mal vivir ta causa con Dios demostra que ele bien bueno y justo, entonces cosa man kita ay habla? Puede ba kita habla que Dios hende justo si ta castiga le canaton? Hende gayot! Cay si ta habla kita ansina, el di aton pensamiento hende ta sale con Dios.

⁶No puede kita habla ansina cay si hende le justo, paquemodo man ele ay puede jusga con el maga gente na mundo?

⁷Si por medio del di aton mal naturaleza ya queda mas claro con otros que Dios bien honesto y por causa de ese ta recibi le honor y alabanza, porque pa man Dios ta acusa canaton como maga pecador?

⁸Entonces porque man hende kita ay habla, “Hace kita mas malo para hace aclara el cosa bueno”? Tiene maga gente quien ta insulta gayot conmigo cay ta acusa sila que ta enseña yo ansina, pero equivocao gayot el di ila acusacion y ay queda sila condenao.

⁹No pensa que came maga Judio mas bueno que con el otros na vista de Dios, cay ya habla ya man yo claro que el maga Judio pati el maga hende-Judio igual lang controlao del pecado.

¹⁰Ta habla gane na Sagrada Escritura de Dios: “Nuay ni un gente justo na vista de Dios.

¹¹Nuay gente ta puede entende si cosa Dios ta habla con ele, y nuay ni uno quiere sigui con ele.

¹²Todo el maga gente ya icha de detras con Dios y el di ila maga vida ya queda ya nuay sirve. Nuay ningunos quien ta hace bueno, nuay gayot ni uno.

¹³Ta sale na di ila maga boca puro cuchinadas, igual na muerto pudrido si ta abri el sepultura. Pirmi sila ta habla embusterias y el di ila maga palabra ta dale dolor como el veneno del culebra si ta morde.

¹⁴Y el maga boca di ila pirmi gayot ta maldici.

¹⁵Bien lijero sila hace sinti duele pati mata,

¹⁶y si donde sila ta anda, ta causa destroso y tristeza.

¹⁷No sabe tamen sila si paquemodo tene buen relacion con uno y otro,

¹⁸cay nuay ni uno di ila ta respeta y ta honra con Dios.”

¹⁹Aquellos con quien Dios ya dale el ley necesita sila obedece el maga mandamiento de ese ley, y nuay ni uno di ila ay puede tene escusa por causa del di ila pecado, cay por medio de ese ley todo el maga gente ay llega entende y admiti que sila culpable na vista de Dios.

²⁰Poreso nuay ningunos ay puede queda justo na vista de Dios por medio de siguir el ley di Moises, sino por medio de ese ley puede kita realiza que kita maga pecador.

²¹Pero ahora Dios ya dale ya mira canaton el di suyo plano si paquemodo le puede perdona con el maga gente para puede le considera canila como si fuera nuay sila pecado. Este plano del perdon nuay sale na ley, pero el ley pati el maga profeta ya habla acerca de este plano de Dios.

²²Dios ta considera con el maga gente como si fuera nuay sila pecado si ta tene sila fe con Jesucristo. Ta hace le ansina con todo′l maga gente quien ta cree con Cristo, cay na vista de Dios todo′l maga gente igual lang. Nuay ni uno diferente con el otro,

²³siendo todo el maga gente na mundo pecador gayot y masquin paquilaya sila de bueno, nuay ni uno ta tene el aprobacion de Dios.

²⁴Pero por causa del gran favor de Dios, ta puede le considera canila como si fuera nuay sila pecado por medio del muerte di Jesucristo, quien ya rescata canaton.

²⁵Cuando Dios ya dale con Jesucristo para muri na cruz como un sacrificio, ya dale le mira si paquemodo le ay perdona el pecado del maga gente si ay tene sila fe con Jesucristo. Ya hace le ese para demostra canaton que ele bien justo, cay desde antes pa tiene gayot le largo paciencia y ya hace le de no mira el maga pecado que ya comete el maga gente.

²⁶Pero ahora Dios ta pone atencion con el pecado para dale mira que el di suyo jusgada bien justo. Y ta considera le masquin con quien como si fuera nuay sila pecado si ta tene sila fe con Jesucristo.