Roma 3:3-26

³To non, to woɓɓe maɓɓe laataaki hoolaaɓe, ɗum haɗan Alla laataago koolaaɗo na?

⁴Waɗataako! Ɗum annitinte no Alla laati nun gooŋaajo, himɓe fu bo e laatii fewooɓe. Gam e winnii: «A annitinte aa laatii poonnitiiɗo diga e haala maa, to a hiitaama, a jaaloto.»

⁵Amma to dullere gooŋaaku meeɗen e hollita foonnitaare Alla, den ume bi'eten? Alla laataaki poonnitiiɗo to mone makko ummake dow meeɗen na? Mii bata ɗo hande no himɓe batirta.

⁶Aawo nun nun bane, Gam to non non nun, noy Alla hiitortoo duuniyaaru?

⁷Gam to fewre am e ɓeyda hollugo gooŋa Alla, e teddina mo, ume kiitanteemi hande mi laati nun hakkeejo?

⁸Woɓɓe e hallina men e wi'a, menen nun wi'ata: «En gaɗee ko halli gam ko wooɗi wurtoo diga e majjum.» Kamɓe, ɓe kiitete no haaniri.

⁹To non, enen Yahuduuɓe een ɓuri horiiɓe na? Aawo, baa seɗɗa! Gam mi hollii no Yahuduujo e mo laataaki Yahuduujo fu na'on e baawɗe hakke.

¹⁰Dewtere wi'ii: «Poonnitiiɗo walaa, baa gooto,

¹¹mo faamu baa gooto walaa, daartoowo Alla walaa, baa gooto.

¹²Himɓe fu majjii, ɓe fu ɓe biisake, gaɗoowo ko wooɗi walaa, baa gooto.

¹³Konoli maɓɓe e nandi e caabeeje maɓɓitiiɗe, ɓee jammoo himɓe e ɗelle maɓɓe. Tonɗi kunnuɗe maɓɓe e hebbi tooke, hande bolle pure.

¹⁴Kunnuɗe maɓɓe e hebbi jaa'ooje e boliiɗe naawuɗe.

¹⁵Koyɗe maɓɓe e yawɗanoo reƴƴitingo ƴiiƴam himɓe.

¹⁶Halkere e bone e woni to ɓe jahi fu.

¹⁷Ɓe annaa laawol jam.

¹⁸Kulol Alla walaa e ɓerɗe maɓɓe baa seɗɗa.»

¹⁹Een anni ko tawreeta wi'i fu, ka wi'anay ɗum maa wonɓe e makka. Den kunnuɗe fu muɓɓoto, gacce himɓe fu annitee yeeso Alla.

²⁰Gam majjum, walaa laatinteeɗo poonnitiiɗo yeeso Alla e tokkugo tawreeta. Gam tawreeta hollan nun himɓe hakkeeji mum.

²¹Jooni, Alla hollitii laawol no o laatinirta himɓe foonnitiiɓe, hinaa e tokkugo tawreeta. Nun dewte tawreeta, e annabiiɓe seedinoo der binni.

²²Alla laatinan himɓe foonnitiiɓe gam ɓe goonɗinii Yeesu Almasiihu. Ɗum laatanto goonɗinɗo fu, gam Alla ɓurontirtaa himɓe.

²³Himɓe fu waɗii hakke, ɓe tampi yottaago tedduŋal ŋal Alla hokkata.

²⁴Amma Alla waɗanii ɓe moƴƴere, laatini ɓe foonnitiiɓe gam Yeesu Almasiihu, cooditiiɗo ɓe.

²⁵Kanko nun Alla laatini sadaka moytoojum hakkeeji goonɗinɓe ƴiiƴam makko. Hande non Alla hollitiri foonnitaare mum e munyal mum dow hakkeeji gaɗanooɗi hiitaaka.

²⁶O waɗii ɗum gam o hollita foonnitaare makko der wakkati ki gonɗen jooni. Ɗum hokkii mo laawol laataago poonnitiiɗo e laatingo goonɗinɗo Yeesu fu poonnitiiɗo.