Rom 3:3-26

³I momol, dingla na tarai Juda bel la tortorot. Ning bel la tortorot, mangmangasa, i topasi sur ir sairas e God sur gong i tolsot anuna warwara?

⁴Bel momol! Ning a taraila rop lar asongo, a warwara ane God i momol ot. Larning a warwara tetek e God ning di ka tumus tari ting na Buk Tabu mang: “Anum a warwara na warkurai i asangani mang u tostos. Pa ning dir tiu u, bel tik ir pastetek pas ta rongo.”

⁵Ning dala tol a laulauna, anundala toltol laulau i asangan momoli mang e God i tostos. Mangasa, e God i rongo ning ir warkurai dala onoi? A ngas a kabah ning, i hanot miting na nuknuk a tarai ka.

⁶Ika bel. Ning anuna warkurai bel i tostos, ir warkurai mangmangasa pas a tarai mite na rakrakan hanua?

⁷Ngandek tik ir atongi mang, “Ning iau a tena asasongo, anuka toltol i asangan momoli mang a warwara ane God i momol, pa i aitna pas a risana. I maining sur asa e God i atong iau mang a tena laulau pa ar hirua ana nuna warkurai?”

⁸Ngandek tik ir atongi mang, “Dalar tol a laulauna sur a wakakna ir hanot talapor.” Dingla na tarai la atong laulau mila pa la tiu mila mang mila asaer a tarai larne. Ika bel i momol. La ning la atong a warwara ne i sot sur lar hirua ana warkurai ane God.

⁹Asaning dalar atongi ana utna ne? Mangasa, mila na tarai Juda mila ka tostos tana tarai masik? Bel i momol! Ia ka atong tari mang a te Judala pa a tarai masik otleng la arlar ka. Dala rop dala kes nahai a toltol laulau.

¹⁰Larning di ka tumus tari ting na Buk Tabu mang, “Bel tik i tostos. Bel tik momol!

¹¹Bel tik otleng ning i tastasim. Bel tik i seren e God.

¹²La rop la ka han masik kusun e God. La rop bel la topas ma ta utna. Bel tik tagun la i tol a wakakna, bel tik momol.”

¹³“A pahanla i sapang arlar ana kulam na minat, pa a warwara anunla i arlar ana goh a minat. La sira atong a asasongo ana lagereminla.” “A warwara miting na pahanla, i arlar ana kusmapak a soi ning i sira harat amat tik.”

¹⁴“A pahanla i bukus ana warwara laulau pa i saran a mamahat tetek a tarai.”

¹⁵“La raras sur lar umkol a tarai.

¹⁶Ting na ngasla ning la han ia, la kamar a ututnala, pa la alaulau a tarai.

¹⁷Pa a ngas na bal molmol, bel la tasmani.”

¹⁸“Bel la matmataut sur e God.”

¹⁹Dala tasmani mang, asaning a Buk a Warkurai i warwara ono, bel i warwara ana tarai ning bel a tarai Juda ka, i warwara otleng ana tarai Juda, ning la kes nahai a Warkuraila. I maining a tarai rop mite na rakrakan hanua lar tur ana warkurai ane God, pa bel tik ir puai lar pas.

²⁰I maining bel tik ir tostos lar pas namatana e God anasa i mur anuna Warkuraila. A Warkuraila i sira asangan dala ka ana nundala na toltol laulaula.

²¹Ika onone, e God ka tol a ngas sur a tarai lar tostos namatana, ika bel ana mur warkurai. A ngas ne, a Buk a warkurai ane Moses pa a propetla la ka warwara talapor tar onoi.

²²A ngas ne i hanot ta e God, pa i mange: A tarai rop ning la tortorot o e Iesu Karisito, e God ir atong la mang la tostos. A tarai Juda pa a tarai masik otleng la arlar ka.

²³Anasa a taraila rop la ka tol tar a toltol laulau, pa la ka kes bakbak kusun a matatar ane God.

²⁴Ika ana marmaris ane God, e God i atong la mang la tostos. Anuna toltol ne, i arlar ana artabar oros ka, anasa ana arlou ning e Karisito Iesu i toli.

²⁵E God i saran tar e Natnalik, sur ir mat pa a sulukna ir kepsen a toltol laulaula anuna taraila rop ning la tortorot onoi. Pa a sulukna ir arop sen a balakut ane God ning nating kaning onla. I toli larne sur ir asangan anuna tostos a toltol. Nating e God i noren tar ka toltol laulaula anuna tarai, pa bel i warkurai la onoi, anasa i wowon taum onla.

²⁶Ika onone, i toli larne sur ir asangan anuna tostos a toltol, sur i ot i tostos pa esaning i atong a taraila mang la tostos ning la tortorot o e Iesu.