Loma 3:3-26

³Ba꞉bene ama꞉le na ba꞉ma ka꞉na gala da꞉kakiyanamemena꞉, “Numa꞉, a Yunapa꞉te Godotamo papamila꞉haheno hibi komo kododilinakuiha꞉, ba꞉bema꞉ ebete dopamo a emedena tetelo kowalubinama꞉ hibilo da꞉goiya꞉, ebete ba꞉be tabo gala a꞉kemalagidolamene, aba꞉ hibila꞉ka꞉?”

⁴Nale huiyatiya na꞉kagoemo, “Ao, Godokono komo eba ka꞉naha꞉. Hopo habanapi hiliyonomate ha꞉da amihopima꞉ ba eda꞉hana, ebe kapiyate hibidawanomoma꞉ beda꞉namene, ba꞉bema꞉ ebete kebe tabo dopamo hibilo da꞉goiya꞉ galane ba꞉be tabo a꞉kadikamidala꞉mene. Iyo, Godokono hibi komo hawakalimima꞉ ebeno Bukalo tabote ba꞉ma ka꞉na itana, ‘Godo, ama꞉ kebe tabo komokomo dolamaginaka, galane tetelo tawakaluba꞉te ba꞉bi taboeno hibi komo kumima꞉na꞉, ba꞉bema꞉ puya꞉te ama꞉ ha꞉dadawama꞉ da꞉ga꞉lana, amia꞉no hidohido ododili komate ibino daedae ukui komo ba꞉bo kohawakalilamema꞉ne.’”

⁵Ba꞉bema꞉ diyala, eta lumagiti hopo habanapino daedae ukuia꞉mo natamo ba꞉ma ka꞉na da꞉ huiyamene, “Godote aeno kuba ododili mabuma꞉ huiya ikaa꞉mema꞉ modoboha꞉, iyo, ebete ba꞉ba ka꞉na dewagelemene tuputupu komo a꞉kahawakalima꞉mene. Numa꞉, ebete aeno kuba ododili komodo hido tete belawenako ebeno malemale komo hawakaliminomo kohawakalimima꞉. Ba꞉bema꞉ mabu keka꞉ ebete kuba huiya atamo galane ikaa꞉mema꞉ da꞉goena? Ebete ba꞉ba ka꞉na dododimini, ba꞉be komo ba꞉ tuputupu komoha꞉, ebeno kuba ododi komola.”

⁶Na huiyatiya ba꞉ma ka꞉na goemo, “A꞉iye! Ama꞉le da꞉gaa꞉, ba꞉be tabo hibi taboha꞉! Godoko ba꞉ tuputupu ododilidawala, ebegodolo eta kuba ododi komo puliyanomola. Ba꞉bema꞉ ebe kapiya modobonomola hopo habanapi hiliyonomoeno komo anagilamelelamete huiya iba꞉tamo ikalame.”

⁷Ba꞉bema꞉ diyala, eta daedae lumagiti ba꞉ma ka꞉na da꞉ kagoemene, “Godote naeno ha꞉da amiho komodo hido tete belawenako ebeno hido ododi komo hawakaliminomo kohawakalimima꞉. Iyo, ba꞉ ba꞉ba ka꞉na ebe ha꞉kiya ebe bawagaminanako, ba꞉bema꞉ ebete tawakalubino komo danagilamelelamemene, ba꞉ba tetelo modoboha꞉ ebete na kuba ododidawama꞉ goe!

⁸Ba꞉be mabuma꞉ kubaha꞉ a hopo habanapa꞉te aeno ubilo hiya꞉hiya꞉ kuba komokomo bododilinama꞉, mabu Godote aeno kuba ododili ipuwane ebeno hido malemale komo ba uluhukuti atamo kuba huiya a꞉kikaa꞉ma꞉mene.” Ba꞉bema꞉ na Polote na꞉kagoemo, “Ama꞉le kebako kubanomo daedae tabo da꞉gaa꞉, komo ha꞉da amiho tawakaluba꞉te ba꞉bako tabo ba ga꞉la eta kuba tabo ba꞉ma ka꞉na kaga꞉lanaka, nale naeno iya꞉tulame komago iba꞉go kapiyama꞉ eda꞉te atu tabo bekagoenamo. A꞉iye! Ba꞉bi ha꞉da amihopa꞉te ibino kuba tabo mabuma꞉ Godogodone huiya modobolo kuwatema꞉na꞉!”

⁹Ba꞉bema꞉ la꞉ Yuha꞉pa꞉te naeno Yunapino komoma꞉ bada ukui na꞉kihateoma? Godokono umi ipuwalo Yunapino ododili komo hidohidodopola꞉ka꞉, ba꞉gala Yuha꞉pino ododili komo kubadopola꞉ka꞉? Ao, eba ka꞉naha꞉! Na ba꞉moe leta dopo hapulu hibi komo ba꞉ma ka꞉na hawakalimimo, Yunapi ba꞉gala Yuha꞉pi, ibi hiliyonomoeno namutudawa ba꞉ kapiyala, ebe ba꞉ ibi ipuwalo ditana ba꞉be kuba ododili komoeno helo komola.

¹⁰Ba꞉be komo hawakalimima꞉ Godokono Bukalo eta tabote ba꞉ma ka꞉na itana, “Hopo haba konomolo kuba ododiha꞉dawa puliyanomola, iyo, eta tuputupudawa kapiyate kalutaha꞉.

¹¹Ba꞉gala eta hido emalagidolodawa puliyala, iyo, Godokono hibi gabo ohowadidawa kemedenaha꞉.

¹²Ba꞉ hibila, hopo habanapi hiliyonomate Godogodone ohobila꞉hate, ba꞉ kubanomoma꞉ eda꞉huya꞉, ba꞉bema꞉ hidohido ododilidawa kalutaha꞉, iyo, eta kapiya puliyanomola.

¹³Ba꞉bema꞉ tawakalubino tabo ga꞉la komo ba꞉ ha꞉lahapino bobo huiyala, pote ba꞉be bobo ipuwa da꞉hiya꞉midamene abale kapiya ba꞉bo kumima꞉ne. Iyo, ibino ma꞉lapilate ha꞉da tabo bega꞉lanaka, ba꞉bema꞉ helo kaluino pagu keba ka꞉nala꞉ka꞉, ibino tabo komokomo ba꞉ ba꞉ba ka꞉nala.

¹⁴Ba꞉ hibila, iba꞉te maubahate ibino tabo ipuwane mela tabo kokonomate pikulinaka,

¹⁵ba꞉gala iba꞉te ibino ubi komo konomamo miya꞉tenaka, gahugahulu tolamelo komopa꞉tamo temeteme ba nikalame komopi dito konanakapulamema꞉.

¹⁶Iyo, iba꞉te kebe hiya꞉hiya꞉ hopamo da꞉tolamenaka, ba꞉bolo tawakalubi ba nekubahilame iba꞉tamo hiya꞉hiya꞉ menemene komo ba꞉bo nikalamenaka.

¹⁷Ba꞉moe komo ba꞉ hibila, ibi hibi tataba emede komo iya꞉tawahaha꞉,

¹⁸ba꞉gala iba꞉te ibino kuba ododili mabuma꞉ Godokono helo komoma꞉ katoletolehonaha꞉.”

¹⁹Ba꞉bema꞉ a ba꞉moe ko komo iya꞉tawahala, kebe tawakaluba꞉te Godokono Tutumu Tabo dopamo dulihuya꞉, ba꞉ba tetene tupuimiti ba꞉bi Tutumu Tabo komate ibino namutudawama꞉ ba꞉ dito ediya꞉. Ba꞉moe ba꞉be mabuma꞉ Godote ibino komo danagilamelelamemene, ba꞉ba tetelo iba꞉te kuba huiya uwatelo ebe duhimima꞉ eta tabo ga꞉lama꞉ a꞉kamodobamena꞉. Iyo, Godote ba꞉ ba꞉ba ka꞉na ba꞉moe hopo konomolo demedehona ba꞉bi Yunapi ba꞉gala Yuha꞉pi ibi hiliyonomatamo ibino kuba huiya modobolo kikalamema꞉ne.

²⁰Ba꞉bema꞉ hibila, Godote ebeno Tutumu Tabo tawakaluba꞉tamo dikalamiya꞉, ba꞉ba tetelo ebete ukui kihatiya꞉ha꞉ ebete Tutumu ikalame gabodo eta lumagi tuputupudawama꞉ komidima꞉. Ao, ebete ebeno Tutumu Tabo tawakaluba꞉tamo ikalamiya꞉, ibi hiliyonomate ibino kuba ododili komo hidonomamo kiya꞉tawahama꞉.

²¹Ba꞉bema꞉ Godote ebeno Tutumu Tabo komamo eta lumagi tuputupudawama꞉ a꞉kamida꞉mene, huiyatiya ebete tawakalubi ebeno tuputupupima꞉ kebe komodo ka꞉midilina, ba꞉ma tetelo ebete ba꞉be komo atamo a꞉hawakalimiya꞉. Numa꞉la꞉, dopamo Mosesete ba꞉be komoma꞉ hibinomolo da꞉goiya꞉ Godokono Tutumu Tabo bukamo ba꞉bo miya꞉tiya꞉, iyo, komo Godokono ukui hawakalimipa꞉te atu komonomoma꞉ kaga꞉lanakuya꞉.

²²Ba꞉be komo ba꞉ ba꞉ma ka꞉nala, puya꞉te Ya꞉su Kelisoko hibima꞉ da꞉midimina꞉, Godote ba꞉be komodo ibi ebeno tuputupupima꞉ komidilima꞉ne. Iyo, ba꞉ma tetelo Godote Yunapi ba꞉gala Yuha꞉pi ibi hiliyonomo kapimilo ba꞉ba ka꞉na ibino hibima꞉ midi komodo owalubilinako,

²³mabu hopo habanapi hiliyonomate kuba komokomo ododiliti ibino hibo gabo ududi komodo Godokono holoholo hapuni muhulunomamo a꞉tolamiya꞉.

²⁴Huiyatiya iba꞉te Godotamo eta hido komo ododiha꞉ tetelo ebete ebeno malemale ipuwalo Ya꞉su Kelisokono oko komodo ibi tuputupupima꞉ ba꞉bo ka꞉lamiya꞉. Iyo, Godote tawakalubino kuba ododili komoeno helo ipuwane ibi ba꞉ma ka꞉na uluhukulateliya꞉,

²⁵ibino kuba ododili mabuma꞉ ebete Ya꞉suku hawa꞉goeno malemale ilinama꞉ miditi keha pihigalo ba꞉ dito hoiya꞉. Ba꞉bema꞉ puya꞉te Ya꞉sukunu hoe komo hibima꞉ da꞉midimina꞉, Godote ba꞉be gabodo ibino kuba ododili komo hiliyonomo egebolelamete ba꞉bo kadodoholelamema꞉ne, hibila, ebete ba꞉be gabo bihiduimiya꞉ ebeno tuputupu ododi komo kohawakalimima꞉. Iyo, numa꞉la꞉, Ya꞉suti hopo habamo peheno dopamo puya꞉te demedehonama꞉, Godote ebeno malemale ipuwalo ibino kuba ododili mabuma꞉ huiya iba꞉tamo hibilo kikalamenakuiha꞉,

²⁶mabu ebe ubila ebeno tuputupu ododi komo a tetelo hibilo hawakaliminomo ba꞉ma ka꞉na kohawakalimima꞉, ebe kapiya tuputupudawama꞉ ba eda꞉na ebete tawakalubi hiliyonomo ipuwalo puya꞉te Ya꞉suku hibima꞉ da꞉midimina꞉ ibi atumu tuputupupima꞉ komidilima꞉ne.