Roma 12:5-20

⁵ita hinage ta gamagari, eo Keriso boeana eai tauda esega mo, eo hinage esau eo esau ta he‐eauesegaida.

⁶Hari ainauia, hari ainauia, se ledimao arida eai ina: ena peroveta, abo ta riba peroveta, eda sunuma gonogonoana;

⁷e ena ta tanuaga, abo ta tanuaga komakomani; ia i lauheata, abo i lauheata komkomani;

⁸e ia i riba hepaipai, abo i ribahepaipai komakomani; eo ia i aiainauia abo nuana eai i mose‐esegai; ia i hesahesagu abo i abi ma‐nuagigiborina.

⁹Emi gadosisi, bena gadosisi mamohoi; ginauri i baaea au hewaiunuei; ginauri i lolo au patudidini arinai.

¹⁰Au haigadosisiemiu doha omi boga esega tataomiuyao, helemiu tatao au heasisiedi, au hebagunadi.

¹¹Ami paisoa arinai tabu au welawelai, nuamiu se gigibori, Guiau au heayaiei.

¹²Sunumamiu arinai au kode; se heamamnamiu, au nuapaipai; uura au uu’uura heneheneteawa.

¹³Hetabu tataodi enadi au heonadi; au abiabitaumana i hemala emi laulau.

¹⁴Isi se heamamnamiu au abiloloedi; au abiabiloloedi, tabu au ariarina‐baaeaidi.

¹⁵Isi taukodekode maemiu au kode esega, isi taudoudou maemiu au dou esega.

¹⁶Ma nuaesegamiu au miataubiga, tabu au hetausaeuioimui, na tatao dobidobidi au italau aridi eai. Tabu omibom emi sanapu aridi eai au nuasaesae. (Prov. 3.7.)

¹⁷Tau esau i hebaaeam, ena baaea tabu au hemaisa. Tatao gamagamagari matadi eai, ginauri duduraidi mo au nuatuidi, eo au abidi. (Prov. 3.4.)

¹⁸Au aipate komakomani tatao gamagamagari gonoamiu au miaheboheboriedi ma‐lonimiu.

¹⁹Ehaguyao e, egu gadosisi arimiu eai, tabu ami gum au abi, emi ouyalayala se otawa, paana ede se uriyao si ene, “Guiau i ene, eaubom mo gumgu abo ea abi, eau abo ea hemaisa.” (Deu. 32.35.)

²⁰Arinai ena ami waiunu i guriam, aiai ana au mosei, ena i gadomagu goila au henom, arinai oeagi mutuaridi alaalasidi au peigogoauri ia uru potana eai. (Prov. 25.21, 22.)