Rome vene 12:5-20

⁵Ye una bi tau, idu Keriso ri, bi roaita yokoi maka, ye una tau vakoi uniye uniyesa bi mina roaita yokoi maka di teteka.

⁶Sei yaku beika baika una maro bi idana idana ini buni tora gade una maro dada. Ye reremama renadi: amiye kaere Sei di ago nigo, bi ini mokena vari gira aeyo dada reyaine;

⁷kaere naivo rego, bi naivo reyaine; kaere oteimago, bi oteimaraine;

⁸kaere niegira rego, bi niegira reyaine; kaere mago, bi anarauda reyaine; kaere ourefeidego, bi ourefeide mona reyaine; kaere iriyeduka rego, bi ada dudu reyaine.

⁹Ofarosi vegu dudu ga uka ma. Beika bi no, mina rofu gubuyo re; beika bi buni moi gira ri.

¹⁰Ya ya kaya ya kaya usika ourena kana uka mafa. Ya kaya ya kaya moi akeke resi ya kaya ya kaya kikifa refa.

¹¹Mokei tora renari kosika ga refa; Vima dudu reremama rei mona resi Varika amiye naivo refa.

¹²Uka mokenari ada refa; esika esika moinari are rei gira refa; usa usa ninari bi niduri refa.

¹³Sei di vene rofu ini fore keika fafau tanu resi okina vene gaba regi di ida maina refa.

¹⁴Kaere ya esika esika madedi vene rofu buni tora gade mafa—buni tora gade masi nikiraini ga refa.

¹⁵Kaere ada rededi vene inasa ada refa; kaere isaka nidedi venesa isaka nifa.

¹⁶Ya iniye iniye di mokena rofu uka yokoi maka mokefa. Ya kaya moi odoro ga rifa, idu ave nidedi venesa auta refa. Yi mokenari ya bi mokena tora nufa makai toga ga mokefa.

¹⁷Amiye yokoi yaku vegu no ya rofu reyori, bi dairisi vegu no ina rofu ga refa, idu amiye tau gade di nemokori, beika vegu bi kikifa mina regika mokefa.

¹⁸Ya dada amiye tau gadesa uka amuta dudu amebifa; ya makai regedi bi buni.

¹⁹Nai uka maida vene, ya kaya rofu vegu no dairisi ini obini ga mafa, idu mina obini Sei di gubuyo iniye rofu ferefa. Adina bura reyo kana, “Varika amiye nido, Na yaku vegu no dairisi ini obini magida; mina obini bi nai.”

²⁰Idu: “Yi tuma amiye rauna rego vonisi, bi iruku ma; koru vaigo vonisi, bi koru ma; adina makai regiyari, bi ini ada odoro ita vaido di iko aena kana; mina redo, adina bi moi maena rego.”