ሮሚያ 12:5-20

⁵ሃዋዳን፥ ኑኒ ጮራ ኣሳ ጊዶፔካ፥ ኪሪስቶሳ ባጋና ኢቲ ኣሳ። ቃሲ ኑኒ ኢቲ ኣሳቴꬃ ቆሞቱዋዳን፥ ኢቱ ኢቱዋና ኦይቄቲ ኡቴዶ።

⁶ፆሳይ ኑሲ ኢሜዳ ኣꬎ ኬካቴꬃን ዱማ ዱማ ኢሞታይ ዴዔ። ኑ ኢሞታይ ናቤቴꬃ ጊዶፔ፥ ኑሲ ዴዒያ ኣማኑዋ ኬና ኦዳናው ቤሴ።

⁷ሃራቱዋ ማዱሳ ጊዶፔ፥ ሄ ኦሱዋን ሚናናው ቤሴ፤ ታማሪሱሳ ጊዶፔ፥ ሄ ታማሪሱዋን ሚናናው ቤሴ።

⁸ሃራ ኣሳቱዋ ሚኒሱሳ ጊዶፔ፥ ሄ ኦሱዋን ሚናናው ቤሴ። ባሬ ሁጴው ዴዒያባፔ ሃራቱዋሲ ኢሚያ ኦኒኔ ዎዛናፔ ኢሞ። ማታይ ዴዒያ ኡራይ ሚኒሲ ኦꬃናው ቤሴ፤ ሃራቱዋሲ ኬኪያ ኡራይ ናሼቻን ኬካናው ቤሴ።

⁹ሂንቴንቱ ሲቁ ኣሳ ቤሳናው ሲቄቲያዋ ጊዳናው ቤሴና። ኢታባ ኢፂቴ፤ ሎዖባ ሚኒሲዴ ኦይቂቴ።

¹⁰ኢቱ ኢቱዋና ኢሻቱዋዳን ሲቄቲቴ፤ ኢቱ ኢቱዋ ቦንቺያዋን ናሼቲቴ።

¹¹ሚኒዴ ኦꬂቴ፤ ኣዛሎፒቴ፤ ሂንቴ ኩሜንꬃ ዎዛናፔ ጎዳው ኦꬂቴ።

¹²ፆሳይ ሂንቴንቶ ኢማና ጌዳዋን ናሼቲቴ፤ ዋዪያን ጌንጪቴ። ኡባ ዎዴ ፆሳ ዎሲቴ፤

¹³ፆሳ ኣሳቱዋ ኮሺያባን ማዲቴ፤ ኢማꬃ ሞኪቴ።

¹⁴ሂንቴንታ ዬዴርሲያዋንታ ኣንጂቴ፤ ኡንቱንታ ኣንጂቴፔ ኣቲን፥ ሼቆፒቴ።

¹⁵ናሼቲያዋንቱና ናሼቲቴ፤ ዬኪያዋንቱናካ ዬኪቴ።

¹⁶ኣሳ ኡባው ኢቲ ማላ ቆፋ ቆፒቴ፤ ኦꬂያባን ኡባን ሂንቴንታ ቶቺዴ ዴዒቴፔ ኣቲን፥ ኦቶሬቶፒቴ፤ ሂንቴንታ ሂንቴሬካ ኣꬎ ኤራንቻ ጊዴ ቆፖፒቴ።

¹⁷ኦኒኔ ሂንቴንቶ ኢታባ ኦꬆፔ፥ ሄ ኡራው ኢታባ ኦꬂ ዛሮፒቴ፤ ኣሳ ኡባው ሎዖባ ኦꬃናው ቆፒቴ።

¹⁸ኣሳ ኡባና ሳሮቴꬃን ዴዓናው፥ ሂንቴ ባጋና፥ ሂንቴንቶ ዳንዳዬቴዳባ ኡባ ኦꬂቴ።

¹⁹ታናዳን ኣማኒያዋንቶ፥ ሂንቴ ሂንቴ ሁጴው ኣሳው ሃሉዋ ኬሶፒቴ። ፆሳይ ሃሉዋ ኬሳናዳን፥ ኣ ቦላ ኦሊቴ። ኣዪሲ ጎፔ፥ ፆሳ ማፃፋይ፥ «ጎዳይ፥ ‹ታኒ ሃሉዋ ኬሳና፤ ታኒ ኩሺያ ጪጋና› ጌ» ያጌ።

²⁰ሺን ፆሳ ማፃፋይ፥ «ኔ ሞርኪ ኮሻቶፔ፥ ሚዛ። ሳሜቶፔ፥ ኡሻ። ኣዪሲ ጎፔ፥ ኔኒ ሄዋ ኦꬂያዋን ኣ ዳሪሳ ዬላያሳ» ያጌ።