ᤖᤥᤔᤡ 12:5-20

⁵ᤜᤧᤰᤁᤣᤗ᤹ᤖᤡᤰᤁᤣ ᤀᤠᤏᤡ᤹ ᤕᤖᤡᤰ ᤀᤠᤘᤠ᤹ᤛᤠᤱ ᤀᤠᤏᤡ᤹ᤃ ᤂᤪᤡᤛ᤻ᤋᤖᤧ ᤗᤳᤇᤠ ᤁᤢᤎᤰᤁᤥᤒᤠ ᤁᤢᤍᤱᤒᤠ ᤕᤠᤶᤗᤰᤛᤡᤖᤥ. ᤜᤧᤰᤁᤩᤠᤱ ᤀᤠᤏᤡ᤹ ᤁᤧᤖᤧᤰ ᤆᤠᤜᤠᤒᤠ ᤀᤠᤈᤥ᤺ᤰᤛᤡᤱᤗᤥ॥

⁶ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤗᤠᤶᤒᤠ ᤀᤠᤒᤡᤖᤧᤒᤠ ᤐᤖᤡᤰᤐᤖᤡᤰᤐᤠ ᤐᤷᤎᤠ᤺ᤶᤜᤠ᤹ ᤀᤠᤏᤡ᤹ ᤀᤥᤃᤵ ᤆᤥᤃᤢᤶᤗᤥ॥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠ᤺ᤵᤔᤠ ᤐᤷᤎᤠ᤺ᤶ ᤁᤧᤃᤵᤐᤠᤸᤗᤧ ᤜᤠᤖᤠ᤹ ᤁᤳᤋᤢᤒᤠ ᤁᤢᤏᤛᤠ᤺ᤴᤏᤡᤸᤗᤧ ᤂᤥ᤺ᤵᤋᤢᤒᤠ ᤁᤢᤀᤡᤛᤡ᤺ᤰᤗᤰ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠ᤺ᤳᤋᤢᤖ.

⁷ᤔᤏᤠᤜᤠ᤹ ᤛᤣᤘᤠ ᤆᤥ᤺ᤰᤔᤠ ᤐᤷᤎᤠ᤺ᤶ ᤁᤧᤃᤵᤐᤠᤸᤗᤧ ᤜᤠᤖᤠ᤹ ᤛᤣᤘᤠ ᤆᤥᤃᤢᤖ. ᤏᤡᤛᤠᤶ ᤜᤢ᤹ᤔᤠ ᤐᤷᤎᤠ᤺ᤶ ᤁᤧᤃᤵᤐᤠᤸᤗᤧ ᤜᤠᤖᤠ᤹ ᤜᤢ᤹ᤖᤢᤛᤡᤖ.

⁸ᤔᤏᤠᤜᤠ᤹ ᤜᤠᤱᤜᤠᤱ ᤔᤧᤵᤔᤠᤛᤡ ᤐᤷᤎᤠ᤺ᤶ ᤁᤧᤃᤵᤐᤠᤸᤗᤧ ᤜᤠᤖᤠ᤹ ᤜᤠᤱᤜᤠᤱ ᤔᤧᤳᤋᤢᤛᤡᤖ. ᤔᤏᤠᤜᤠ᤹ ᤑᤠ᤹ᤔᤠ ᤐᤷᤎᤠ᤺ᤶ ᤁᤧᤃᤵᤐᤠᤸᤗᤧ ᤜᤠᤖᤠ᤹ ᤁᤢᤏᤡᤱᤘᤠ᤹ ᤜᤴᤍᤢᤀᤠᤱ ᤑᤠ᤹ᤖᤢᤛᤡᤖ. ᤗᤠᤶᤗᤥ᤺ᤒᤠ ᤐᤥ᤺ᤱᤔᤠ ᤐᤷᤎᤠ᤺ᤶ ᤁᤧᤃᤵᤐᤠᤸᤗᤧ ᤜᤠᤖᤠ᤹ ᤏᤡᤱᤘᤠ᤹ ᤐᤡᤖᤢᤀᤠᤱ ᤔᤏᤠᤜᤠ᤹ ᤗᤠᤶᤗᤥᤛᤢᤛᤡᤖ. ᤔᤏᤠᤜᤠ᤹ ᤗᤢᤱᤔᤠ᤹ ᤋᤢᤰᤔᤠ ᤐᤷᤎᤠ᤺ᤶ ᤁᤧᤃᤵᤐᤠᤸᤗᤧ ᤜᤠᤖᤠ᤹ ᤐᤛ᤺ᤳᤛ᤺ᤳᤗ ᤗᤢᤱᤔᤠ᤹ ᤋᤢᤰᤋᤢᤛᤡᤖᤖᤥ॥

⁹ᤁᤢᤈᤧᤰᤁᤠᤱ ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹. ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤏᤠ᤹ᤖᤧᤶᤔᤧ᤹. ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢ᤺ᤒᤠ ᤆᤥ᤺ᤰ. ᤒᤠ ᤂᤧᤴ ᤐᤠ᤺ᤴᤏᤥ ᤐᤳᤇᤧᤶᤔᤧ᤹ᤀᤥ॥

¹⁰ᤗᤳᤌᤡᤰ ᤜᤡᤶᤔᤥᤒᤠ ᤑᤢ᤹ᤏᤢᤛᤠ᤹ ᤏᤧ᤹ᤏᤢᤛᤠ᤹ ᤁᤢᤀᤡᤛᤡ᤺ᤰ ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹॥ ᤀᤠᤒᤠᤅᤣᤏᤢ᤺ᤸᤗᤧ ᤕᤖᤡᤰ ᤘᤣ᤹ᤜᤠ᤹ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤖᤧᤶᤛᤡᤶᤔᤧ᤹॥

¹¹ᤀᤠᤵᤑᤠᤸᤗᤧᤀᤠᤱ ᤗᤧᤶᤛᤢᤘᤠᤒᤠ ᤔᤧᤶᤒᤥ᤺ᤱᤅᤣ ᤂᤡᤏᤡ᤹ ᤛᤡᤰ ᤛᤶᤗ ᤜᤠᤱᤜᤠᤱᤅᤠᤱ ᤍᤠᤱᤒᤠᤸᤗᤧ ᤁᤢᤛᤣᤘᤠ ᤆᤥᤃᤧᤶᤔᤧ᤹ᤀᤥ॥

¹²ᤂᤡᤏᤡ᤹ ᤏᤡᤱᤛᤠᤱ ᤁᤧᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤛ᤺ᤳᤋᤧᤶᤔᤧ᤹ᤀᤥ. ᤀᤡᤏᤥᤃᤧᤴ ᤋᤢᤰᤂᤣ ᤁᤧᤈᤩᤧ᤹ᤀᤡᤸᤗᤧ ᤏᤠᤛᤡ ᤌ᤺ᤳᤋᤧᤶᤔᤧ᤹ᤀᤥ. ᤋᤢᤘᤠ ᤆᤥ᤺ᤰᤔᤠ ᤔᤧᤗᤧᤖᤧᤶᤔᤡᤴᤏᤧ᤹ᤀᤥ॥

¹³ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ ᤂᤢᤏᤡ᤹ ᤆᤠᤕᤥ᤺ᤶᤒᤥᤀᤥ ᤁᤢᤓᤠ᤹ ᤐᤡᤖᤧᤶᤛᤡᤶᤔᤧ᤹. ᤋᤖᤣ ᤋᤥ᤺ᤛᤧᤶᤛᤡᤶᤔᤧ᤹ᤀᤥ॥

¹⁴ᤂᤡᤏᤡ᤹ ᤋᤢᤰᤂᤣ ᤁᤧᤈᤠ᤺ᤵᤐᤠᤜᤠ᤹ ᤛᤠᤱᤃᤪᤠ ᤔᤧᤔᤧᤳᤋᤧᤶᤛᤡᤶᤔᤧᤴᤏᤧ᤹ᤀᤥ. ᤁᤖ ᤔᤢ᤹ᤀᤡᤛᤠᤶ ᤐᤡᤖᤧᤶᤛᤡᤶᤔᤧ᤹ᤀᤥ॥

¹⁵ᤁᤧᤛ᤺ᤵᤐᤠᤜᤠ᤹ᤏᤢ ᤛ᤺ᤳᤋᤧᤶᤔᤧ᤹. ᤁᤧᤜᤠ᤺ᤵᤐᤠᤜᤠ᤹ᤏᤢ ᤜᤠᤒᤧᤶᤔᤧ᤹ᤀᤥ॥

¹⁶ᤘᤣ᤹ᤜᤠ᤹ᤏᤢ ᤋᤅᤧᤶᤔᤧ᤹ᤀᤠᤱ ᤘᤕᤧᤶᤔᤧ᤹॥ ᤀᤠᤱᤍᤡᤱ ᤔᤧᤗ᤹ᤖᤧᤶᤔᤡᤴᤏᤧ᤹ᤀᤥ. ᤁᤖ ᤔᤧᤴᤈᤥᤈᤥᤒᤠ ᤔᤏᤠᤜᤠ᤹ᤏᤢᤀᤠᤱ ᤏ᤺ᤶᤏ᤺ᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤘᤕᤧᤶᤔᤧ᤹ᤀᤥ॥ ᤀᤡᤱᤃᤠ᤹ ᤁᤧᤖᤧᤰ ᤐᤠ᤺ᤴᤜᤠ᤹ ᤗᤧᤛ᤻ᤛᤢᤱ ᤑᤠ᤹ᤀᤠᤱ ᤀᤠᤵᤑᤠᤸᤗᤧᤀᤠᤱ ᤔᤧᤀᤡ᤺ᤳᤋᤧᤶᤔᤡᤴᤏᤧ᤹ᤀᤥ᥄

¹⁷ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤸᤗᤧ ᤁᤢᤗᤧᤰᤘᤠ ᤋᤠᤵᤑᤧ᤺ᤶᤒᤠ ᤐᤠ᤺ᤴ ᤀᤠᤳᤋᤡᤴᤏᤠᤱ ᤔᤧᤔᤧᤳᤋᤧᤶᤔᤡᤴᤏᤧ᤹॥ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤧᤏᤡ᤺ᤛᤢᤸᤗᤧ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢ᤺ᤒᤠ ᤆᤥ᤺ᤰ. ᤒᤠ ᤂᤧᤴ ᤐᤠ᤺ᤴᤏᤡᤴ ᤆᤥ᤺ᤰᤔᤠ ᤁᤥ᤺ᤳᤋᤧᤶᤔᤧ᤹ᤀᤥ॥

¹⁸ᤁᤧᤖᤧᤰ ᤔᤏᤠᤜᤠ᤹ᤏᤢ ᤂᤡᤏᤡ᤹ ᤛᤢᤰᤛᤢᤰ ᤛᤏᤠᤖᤢᤱᤅᤥ ᤘᤕᤧᤶᤔᤧ᤹ᤀᤥ॥

¹⁹ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤑᤧᤴ ᤐᤠ᤺ᤴᤏᤡᤸᤗᤧ ᤁᤢᤗᤧᤰᤘᤠ ᤀᤠᤵᤑᤠᤸᤗᤧᤀᤠᤱ ᤋᤠᤵᤑᤧ᤺ᤶᤒᤠ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤧᤴᤏᤥ ᤗᤧᤖᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣ ᤛᤠᤵᤋᤧᤀᤠᤱ ᤐᤳ. “ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤧᤴ ᤂᤢᤶᤍᤡᤱ ᤐᤡᤔᤠᤃ ᤀᤠᤗᤰᤗᤥ॥ ᤀᤡᤱᤃᤠ᤹ᤀᤣ ᤁᤢᤗᤧᤰᤘᤠ ᤏᤢ᤺ᤰᤋᤢᤱ ᤐᤡᤖᤢᤱ ᤗ᤹ᤖᤡᤰ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢᤖᤥ॥”

²⁰ᤂᤧᤸᤗᤧ ᤁᤢᤗᤧᤰᤘᤠᤃ “ᤂᤧᤏᤧ᤹ ᤁᤧᤏᤡᤱᤔᤡ᤺ᤴ ᤛᤧᤳᤗᤠ᤺ᤰᤔᤠᤸᤗᤧ ᤋᤖᤢᤀᤠᤱ ᤘᤠ᤹ᤏᤧ ᤑᤠ᤹ᤃᤪ ᤁᤢᤈᤠ ᤆᤠᤔᤠ ᤐᤡᤖᤧ᤹॥ ᤂᤧᤴ ᤘᤠᤔᤡ᤺ᤔᤠᤸᤗᤧ ᤋᤖᤢᤀᤠᤱ ᤘᤠ᤹ᤏᤧ ᤑᤠ᤹ᤃᤪ ᤆᤫᤠ᤺ᤳ ᤌᤢᤱᤔᤠ ᤐᤡᤖᤧ᤹॥ ᤂᤧᤏᤧ᤹ ᤀᤰᤂᤣ ᤁᤧᤈᤥᤃᤢᤸᤗᤧ ᤂᤧᤴ ᤛᤡᤖᤡᤱᤔ᤺ᤖᤥ॥”