Rom 4:1-20

¹Iwe, met sipwe apasa usun Apraham, än äm chon Juta we lewo? Met a fis ngeni?

²Are i a küna pwüng me ren Kot ren ekewe föför a föri, epwe wor met epwe tongeni aingaing won. Nge esap tongeni aingaing mwen mesen Kot.

³Ekewe Toropwe mi Pin ra apasa, “Apraham a lükü Kot, nge pokiten an lükülük a küna pwüng me ren Kot.”

⁴Eman aramas mi angang a angei liwinin an angang. Ewe aramas esap ekieki ngeni pwe eu lifang, nge liwinin an angang.

⁵Nge eman aramas mi longolong won an lükülük, nge esap wor an föför, i a lükü Kot ewe mi tongeni pwärätä pwe eman chon tipis a pwüng. Kot a föri iei usun ngeni, pwe a küna pwüng me ren pokiten an lükülük.

⁶Iei usun wewen met Tafit a apasa usun feiöchün ewe aramas mi küna pwüng me ren Kot, nge esap longolong won met ewe aramas a föri:

⁷“Feiöchün ätekewe ar pupungau a musala, nge ar tipis a mola.

⁸Feiöchün ewe aramas, ewe Samol esap chechemeni an tipis!”

⁹Ifa usun, ei feiöch Tafit a kapas usun a chök fän iten chokewe mi sirkomsais? Apwi! A pwal fän iten chokewe resap sirkomsais. Pun sia fen apasa mine a mak lon ekewe Toropwe mi Pin: “Apraham a lükü Kot, nge pokiten an lükülük a küna pwüng me ren Kot.”

¹⁰Inet a fis ei? A fis mwen än Apraham sirkomsais ika me mürin? A fis me mwan, nge sap mürin.

¹¹An sirkomsais a fis me mürin. Nge an sirkomsais eu asisil mi pwärätä pwe pokiten an lükülük a küna pwüng me ren Kot me mwen an esamwo sirkomsais. Iei usun Apraham a semelapen chokewe meinisin mi lükü Kot o küna pwüng me ren, inamwo ika resap sirkomsais.

¹²I pwal semelapen chokewe ra sirkomsais, nge sap pokiten ar sirkomsais, nge pokiten ra manaueni ewe chök manauen lükülük semelapach Apraham a eäni me mwen an sirkomsais.

¹³Lupwen Kot a pwon ngeni Apraham me mwirimwirin kana pwe repwe fanüeni fanüfan, a föri ei sap pokiten än Apraham aleasochisi ekewe Allük, nge pokiten an küna pwüng me ren Kot ren an lükülük.

¹⁴Pun are än Kot pwon a fän iten chök chokewe mi aleasochisi ekewe Allük, mürin än aramas lükülük esap wor aüchean, nge än Kot pwon esap wor lomotan.

¹⁵Pun ekewe allük ra atoto än Kot song, nge ia esap wor allük ie, esap pwal wor aleasolap ngeni allük.

¹⁶Iei usun ewe pwon a longolong won lükülük, pwe epwe allükülükü än Kot we ümöümöch epwe tori ekewe mwirimwirin Apraham meinisin, esap chök tori chokewe mi aleasochisi ekewe Allük, nge epwe pwal tori chokewe mi lükü usun Apraham. Pun Apraham semelapach meinisin lon pekin ngün,

¹⁷pun a mak lon ekewe Toropwe mi Pin, “Üa föri pwe kopwe semelapen aramasen chomong mwü.” Iwe, ei pwon a mürina mwen mesen Kot, i ewe Apraham a lükü, ewe Kot mi amanaua ekewe mi mäla, i ewe a pwal allük pwe mine esap wor epwe wor.

¹⁸Iwe, Apraham a lükü Kot o apilükülük ngeni, inamwo ika esap wor popun an epwe apilükülük. Iei mine a wiliti “semelapen aramasen chomong mwü.” Usun chök ekewe Toropwe mi Pin ra apasa, “Mwirimwirum kana repwe chomong usun chök chomongun ekewe fü.”

¹⁹Apraham a arapakan ipükü ier, nge an lükülük esap apwangapwangala lupwen a ekieki usun inisin pwe a arap ngeni mäla, nge pwal Sara pwülüan we esap chüen tongeni nöünöü.

²⁰Iwe, Apraham a sopwela lon an lükülük, nge esap tipemwaramwar ngeni än Kot pwon. An lükülük a pöchökülela o a mwareiti Kot.