Rom 1:3-29

³A kapas usun Nöün we, ach Samol Jesus Kraist: Lon an wiliti aramas, a uputiu lon tettelin eman mwirimwirin Tafit.

⁴Nge lon pekin ngünün mi fel a pwä fän manaman mi lapalap pwe i Nöün Kot, ren an manausefäl seni mäla, i Jesus Kraist ach Samol.

⁵Ren Jesus Kraist, Kot a ngeniei ewe ümöümöch, pwe üpwe wiseni ewe wisen soukünö fän itan, pwe üpwe emweni aramasen ekewe mwü meinisin pwe repwe lükü i o aleasochis ngeni.

⁶Pwal ämi mi nonom lon Rom, oua pachelong lein chokewe Kot a köriir pwe oupwe nöün Jesus Kraist.

⁷Iei mine üa mak ngenikemi meinisin mi nom lon Rom, ämi chokewe Kot a echenikemi o körikemi pwe oupwe chon pin: Kot Samach me ach Samol Jesus Kraist epwe ngenikemi ümöümöch me kinamwe.

⁸Ngang üpwe akomwen kilisou ngeni ai Kot ren Jesus Kraist fänäsengesimi meinisin, pun aramasen unusen fanüfan ra rongorong usun ämi lükülük.

⁹Kot, ewe eman üa angang ngeni ren unusen letipei ren ai afalafala ewe Pworausen Manau usun Nöün we, i nei chon pwärätä pwe üa fokun chechemenikemi

¹⁰lon ai iotek fansoun meinisin. Üa tüngor ngeni Kot, pwe are fän letipan, epwe mwüt ngeniei pwe üpwe feila remi lon ei fansoun.

¹¹Pun üa fokun mochen churikemi pwe üpwe ngenikemi och feiöchün ngün pwe oupwe pöchökülela,

¹²wewen, pwe ämi me ngang sipwe apöchökülafengenikich ren ach lükülük.

¹³Ämi pwii kana, oupwe fokun chechemeni pwe fän chomong üa akota ai üpwe churikemi, nge a chök wor sokun epet a pineei fansoun meinisin ai üpwe feila remi. Ngang üa mochen asoulängala ekoch leimi, usun üa pwal föri me lein ekewe ekoch chon lükün Israel.

¹⁴Pun mi wor wisei ngeni aramas meinisin, ngeni ekewe mi mirit me ekewe resap mirit, ngeni ekewe mi tipachem pwal ekewe mi tiparoch.

¹⁵Iei mine üa fokun mochen afalafala ewe Pworausen Manau ngenikemi mi nonom lon Rom.

¹⁶Üsap säwäsini ewe Pworausen Manau, pun iei ewe manamanen Kot mi tongeni amanaua chokewe meinisin mi lükü, a akom ngeni ekewe chon Juta, nge mürin pwal ngeni ekewe chon lükün Israel.

¹⁷Pun ewe Pworausen Manau a pwärätä usun än Kot akot fän iten än aramas repwe küna pwüng me mwan. Ei a fis ren lükülük seni lepoputän tori lesopolan. Usun ewe toropwe mi pin a apasa, “Ewe aramas mi küna pwüng mwen mesen Kot epwe manau ren an lükülük.”

¹⁸Än Kot song a pwä seni läng won tipis meinisin me föföringauen aramas, ra pinei ewe let ren ar föför esepwüng, pwe aramas resap silei.

¹⁹Pun mine aramas ra tongeni silei usun Kot a fat ngeniir. Püsin Kot a fen afata ngeniir.

²⁰Esap wor eman aramas a tongeni küna Kot. Nge aramas ra tongeni silei usun Kot ren ekewe mettoch i a föri. Pun seni ewe fansoun Kot a föri fanüfan ra fokun tongeni weweiti pwe an manaman a nom tori feilfeilachök, pwe i wesewesen Kot. Iei mine esap wor än aramas künetipingen.

²¹Ikamwo ra silei usun Kot, nge resap asamolu i usun Kot, resap pwal kilisou ngeni. Ar ekiek esap fokun wor lomotan, nge letiper mi wewemang a uren rochopwak.

²²Ra apasa pwe ra tipachem, nge ra tiparoch.

²³Akasiwilin ar fel ngeni ewe Kot mi manau feilfeilachök ra fel ngeni uluulun anümwäl mi för lon liosun aramas mi mä, ika liosun mansüsü, manfetal me mantötö.

²⁴Iei mine Kot a asechala ekei aramas pwe repwe föri föför mi limengau ren mochenian letiper. Ra föri mettoch mi asäw lefiler eman ngeni eman.

²⁵Ra akasiwili mine a let usun Kot ngeni mine a chofona. Ra fel ngeni mine Kot a föri o angang ngeni, nge resap fel ngeni Kot ewe Chon Föri mettoch meinisin, i ewe sipwe mwareiti tori feilfeilachök! Amen.

²⁶Pokiten ar föri iei usun, Kot a asechiirelong lon sokun mocheniangau mi fokun asäw. Ekewe mwo fefin, nge ra sorei pwükütän ekewe föför mi öch ngeni inisiir ngeni sokun föför esap öch ngeniir.

²⁷Pwal ina chök usun ren ekewe mwän, ra likitala föför mi öch lefilen mwän me fefin o ra opucherela ren sokun mocheniangau fengen lefiler. Mwän ra föri sokun föför mi fokun asäw lefiler eman ngeni eman, nge lesopolan ra püsin aworato liwiningau wor ren ar föför mi ngau.

²⁸Pokiten ekei aramas resap fokun mochen amwöchü lon letiper mine ra silei usun Kot, i a asechiirela lon ngauen letiper, pwe ra föri sokun föför esap pwüng.

²⁹Ra ur ren sokopaten föför mi ngau, föför esepwüng, tipemong, kirikiringau. Ra uren lolowo, niela aramas, fiu, likatuputup, ekingau. Ra ngününgün,