Romanos 1:3-29

³Ri Utzilaj Tzij e ri kachꞌaꞌt puwi Rukꞌajol ri Dios, ri Qanimajawal Jesucristo. Rire xalax wara che ruwachulew yey upetebꞌem chike ri e ralkꞌoꞌal ri rey David.

⁴Yey ruma ri Santowilaj Ruxlabꞌixel ri Dios, xqꞌalajinik ri Qanimajawal Jesucristo e Ukꞌajol ri Dios echiriꞌ rukꞌ unimal chuqꞌabꞌ xkꞌastaj lo chikixoꞌl ri ekaminaq.

⁵Ruma kꞌu Rire, xqakꞌul ri sipanik re kojuꞌan oj utaqoꞌn chaꞌ ukꞌiyal tikawex pa taq ronoje ri tinamit che ruwachulew kakubꞌiꞌ kikꞌuꞌx rukꞌ y kakikoj utzij y jelaꞌ kaloqꞌox uqꞌij rubꞌiꞌ.

⁶Yey ralaq e alaq kukꞌil ri esikꞌim chaꞌ kakꞌojiꞌ alaq puqꞌabꞌ ri Qanimajawal Jesucristo.

⁷Kintzꞌibꞌan kꞌu pan che onoje alaq ri jeqel alaq pa ri tinamit Roma, ri lik kꞌax kanaꞌ alaq ruma ri Dios y sikꞌim alaq chaꞌ kuꞌan alaq re ri Dios. Kꞌulu kꞌu alaq ri unimal rutzil kꞌuꞌxaj y ri utzil chomal re ri Qaqaw Dios y re ri Qanimajawal Jesucristo.

⁸Nabꞌe na, ruma ri Qanimajawal Jesucristo, kantioxij che ri nu Dios uma onoje alaq, ma che ronoje luwar che ruwachulew lik katataj puwi ri kubꞌulibꞌal kꞌuꞌx alaq.

⁹Ri Dios, ri kanloqꞌnimaj rukꞌ ronoje nukꞌuꞌx echiriꞌ kantzijoj ri Utzilaj Tzij re Rukꞌajol, Rire lik retaꞌam xaqi kankuxtaj alaq chwach echiriꞌ kanꞌan orar.

¹⁰Kantzꞌonoj kꞌu che ri Dios chuyaꞌa na chwe kineꞌbꞌina ukꞌ alaq juna qꞌij we e karaj riꞌ Rire chwe.

¹¹Ma lik kuaj kanwil wach alaq chaꞌ kantoꞌ alaq che ri bꞌinik silabꞌik alaq chwach ri Dios y jelaꞌ lik katikiꞌ alaq chi utz.

¹²Jekꞌulaꞌ kaqanimarisaj qakꞌuꞌx chiqawach, ma ralaq y riꞌin junam kubꞌul qakꞌuꞌx rukꞌ ri Qanimajawal.

¹³Hermanos, lik kuaj kꞌut ketaꞌmaj alaq, riꞌin ukꞌiyal laj nuchꞌobꞌom kuaj kiꞌnwila alaq re kantoꞌ alaq chaꞌ kakꞌiy alaq chwach ri Dios, jelaꞌ pachaꞌ ri nuꞌanom kukꞌ ri jujun chik na e ta aj Israel. Pero kꞌamajaꞌ yaꞌtal chwe kinopon ukꞌ alaq.

¹⁴Riꞌin lik kannaꞌo chinuwach kꞌo wi kantzijoj ri Utzilaj Tzij chike konoje; waꞌ e ri e tijotal pa ri chꞌaꞌtem griego yey ri e aj naj na e tijotal taj, ri lik kꞌo ketaꞌam yey ri na jinta kꞌo ketaꞌam.

¹⁵Jekꞌulaꞌ lik kacha wanimaꞌ che kinꞌek pa ri tinamit Roma re kantzijoj ri Utzilaj Tzij che alaq.

¹⁶Riꞌin na kinkꞌix ta che ri Utzilaj Tzij, ma rukꞌ waꞌ kaqꞌalajin ruchuqꞌabꞌ ri Dios re kebꞌukolobꞌej konoje ri kekojow re; nabꞌe chike ri e aj judiꞌabꞌ, tekꞌuchiriꞌ chike ri na e ta aj judiꞌabꞌ.

¹⁷Ma ri Utzilaj Tzij kuqꞌalajisaj chiqawach suꞌanik kojkꞌojiꞌ jusukꞌ chwach ri Dios, yey waꞌ e ruma ri kubꞌulibꞌal qakꞌuꞌx rukꞌ Rire; ronoje kꞌu ri qakꞌaslemal chwach ri Dios e ruma ri kubꞌulibꞌal qakꞌuꞌx. Ma jewaꞌ tzꞌibꞌital kan pa Ruchꞌaꞌtem: Ri e jusukꞌ chwach ri Dios, kꞌo kikꞌaslemal ruma ri kubꞌulibꞌal kikꞌuꞌx rukꞌ Rire kachaꞌ.

¹⁸Lik kaqꞌalajin kꞌu ri royowal ri Dios echiriꞌ ruqꞌatbꞌal tzij kape chilaꞌ chikaj pakiwi ri tikawex lik itzel kikꞌuꞌx chirij ri Dios y na jusukꞌ ta ri kibꞌinik kisilabꞌik; ma ruma ri na utz taj kakiꞌano, kebꞌuꞌan e latzꞌanel chike jujun chik chaꞌ na kaketaꞌmaj ta ri Qꞌijsaq.

¹⁹Yey rike kꞌo ketaꞌam puwi ri Dios, ma e Rire qꞌalajisayom waꞌ chike.

²⁰Ma e janipa ri na kilitaj ta uwach che ri Dios, pachaꞌ ruchuqꞌabꞌ na jinta utaqexik y runimal uwach Rire, waꞌ lik xqꞌalajin lo chwi ri jeqebꞌal re ruwachulew ruma ronoje taq ri ꞌanatal ruma Rire. E uwariꞌche na usukꞌ taj we kꞌo junoq kubꞌiꞌij: «Na jinta kꞌo wetaꞌam puwi ri Dios.»

²¹Pero ri winaq tobꞌ ketaꞌam chik kꞌo jun Dios kꞌaslik, na kiyaꞌom ta kꞌu riꞌ ri yakbꞌal uqꞌij taqal che y na ketioxin tane chwach. Jekꞌulaꞌ xsach ri kinaꞌoj ma e kakichꞌobꞌ ri na jinta uchak; yey ruma waꞌ na kakimaj ta chi usukꞌ saꞌ ri utz y saꞌ ri na utz taj.

²²Tobꞌ kakibꞌiꞌij lik kꞌo kinaꞌoj, paqatzij wi lik na jinta kꞌo ketaꞌam.

²³Na xkiyak ta chi uqꞌij ri Dios kꞌaslik, ri Jun na kakam taj; ma e xkijeq uyakik kiqꞌij kikꞌaxwach winaq xa kekamik y kikꞌaxwach taq awaj kexikꞌikꞌ pa kaj, taq awaj kajibꞌ kaqan yey taq awaj kecharar pulew.

²⁴Ruma kꞌu laꞌ, ri Dios xebꞌuya kan chupa ri chꞌulilaj mak y chupa ri kirayibꞌal na chom taj. Jekꞌulaꞌ xkijeq xemakun chikiwach, xkiꞌan rukꞌ ri kicuerpo ri lik kꞌixbꞌal uwach.

²⁵Waꞌ xkikꞌulumaj ma xkikꞌaq bꞌi ri Qꞌijsaq re ri Dios yey pukꞌaxel e xkitaqej ri xa raqꞌubꞌal. Ekꞌu xkiyak kiqꞌij y xkiloqꞌoj janipa taq ri uꞌanom ri Dios; yey na e ta xkiyak uqꞌij ri ꞌanayom re janipa taq ri kꞌolik, ri Jun lik taqal che kayak uqꞌij na jinta utaqexik. Amén.

²⁶Ruma kꞌu laꞌ, ri Dios xeroqꞌotaj kan chupa ri kirayibꞌal lik kꞌixbꞌal uwach. Xuꞌana nenareꞌ ri ixoqibꞌ xkijalkꞌatij rusukꞌ ri kirayibꞌal kukꞌ ri kachijilal y e xkiꞌan ri na usukꞌ taj, ma xkijeq kakirayij kibꞌ chikiwach e ixoqibꞌ.

²⁷Jekꞌulaꞌ rachijabꞌ xkijalkꞌatij rusukꞌ ri kirayibꞌal kukꞌ ri kixoqilal; xkitzaq kꞌu kibꞌ che uꞌanik ri lik kꞌixbꞌal uwach, ma xkijeq kakirayij kibꞌ chikiwach, achijabꞌ kukꞌ achijabꞌ. Ruma kꞌu riꞌ e xkipetisaj lo ri royowal ri Dios pakiwiꞌ y kikꞌulum kꞌu ri tojbꞌal re ri chꞌulilaj mak kiꞌanom.

²⁸Rike na xkaj taj kaketaꞌmaj uwach ri Dios. E uwariꞌche Rire xeroqꞌotaj kan chupa ri sachibꞌal naꞌoj chaꞌ jelaꞌ e kakiꞌan ronoje ri na usukꞌ taj.

²⁹Jekꞌulaꞌ e kiyaꞌom kibꞌ che uꞌanik janipa ri na jusukꞌ taj: waꞌ e ri kaketzꞌabꞌej uwa kiqꞌij kukꞌ jujun chik na kikꞌulel taj, ri kakiꞌan ri lik itzel uwachlibꞌal, ri e aj rayinel, ri itzel kikꞌuꞌx, ri kꞌax kikꞌuꞌx chikiwach, ri e kamisanel, ri e aj chꞌaꞌoj, ri e sokosoꞌnel, ri kakiꞌan kꞌax chike jujun chik,