Rom 16:9-26

⁹Ma sekesek tek ale ki ta Urbanus. Iy mene eme hawek ya aru amekes lahou ta Krais. Ma hawe sekesek tek ki ta kawas tek handru ale Stakis.

¹⁰Sekesek tek doh ki ta Apelis. Nyaran badeh, mwasin, tasah iri lau ndranyolom iy ateu lahou ta Krais udu mwasin.

¹¹Ya sekesek tek ja ki ta Herodiyon. Iy badeh, badu Juwis ale, ta amekes lahou hawek.

¹²Sekesek tek ki turu badih doh, Traipena hawe Traiposa. Uru badih doh amekes lahou mwasin handru ma amekes lahou boto-on boto-on ta Laban.

¹³Sekesek tek ki ta Rupus. Iy badeh, mwasin handru ta mada Laban ta amekes lahou tan, ma hawe sekesek tek ale ki ta tinen. Tinen badeh, atondrok jo i buku none nadun handru badu ndrinen amwenen.

¹⁴Sekesek tek ki toro lau doh: Ki ta Asikritus, ki ta Pilegon, ki ta Hermes, ki ta Patrobas hawe Hermas. Ma hawe sekesek tek ale ki toro lau ta Kindrei atukum are hawe oro badeh.

¹⁵Ya sekesek ki toro lau doh: Ki ta Pilologus hawe udun Juliya, ki ta Nereyus hawe nadu tinen badeh, ki ta Olimpas ma hawe ki tiri lau mari ta Kindrei atukum are hawe oro ale.

¹⁶Na len aha atukum, aha kadeu lim ma kasekesek aha ari ari.

¹⁷Ya eme aha nadu tine, jo tiye sahou batanau doh ewek taha i buku doh: Aha badeh, mada aha kaleu tiri lau ta orou bolo lau andra-i ma ano lau aseker. Iri lau doh ta leheya tanan ta wasai bamwenen ta leheya mene aha ndrakohok bwe. Iri kameh aluwi aha rayah kameh ame len ta leheya handru mene. Aha kateleya oro;

¹⁸tasah oro lau i buku doh, baleheya tanan handru ta lahou ta Laban bwe. Oro leheya tanan randrah labai ta abulum le ndrine oro. Oro asehek sahou nyaman nyaman ta asan bale aha, ma hawe amekes sahou mwasin mwasin ta atamar aha; ma oro bolowani budon tiri lau tana iri lakou mwasin o ndra-in bwe, ka-en hamon toro.

¹⁹Iri lau mari ndranuhun nyara aha. Aha badeh, lau ta anuhun sahou. Ya eme mesekei jo idih handru na sekesek ta kandriyen taha. Arile aha kanuhun, jo aseken aha kabudon kamwenen ta kandriyen mwasin aha ka-en hamon ta aliy. Ya kandriyen ndra-in badeh, aha sala aliy. Aha ma mwasin kado.

²⁰Kindrei badeh, ndramak ta isan mondrei ndrokowa aha ma amekes manyah taha kudu mwasin. Ma, na nawin bwe kameh iy atisih tama balik Satan abwesek udu bolo kati aha. Ya eme jo aseken tikisiy ta Laban tataha Jises kudu hawe aha.

²¹Ma eme Timoti, ndramak ta amekes lahou hawek ale tiye sahou sekesek tan ewek taha; ma hawe Lusiyus, hawe Jesen, hawe Sosipater ale. Oro lau ma taloh doh badeh, oro Juwis i le buku jo.

²²Ya sahou udu bolo la-ukei dah badeh, Pol asehek, ya jo Tertiyus atorou bolon. Ya jo asehek sekesek tek ewek taha ale.

²³Ma Gayus ale tiye sekesek tan ewek taha. Iy aloh ma atukum aso lau mara-ei ta Kindrei ala asiu tan, ma hawe iy atondrok aso. Ya Erastus ndramak ta atondrok luk ta kon tinan ma hawe nadu tine taha Kuwartus tiye sekesek turu ewek taha ale.

²⁵Sendrehendreh ta aliy i buku doh: Taha badeh, katudun Kindrei. Iy le kameh winiyan aseben aha ales boto-on ta bolo budon handru taha, in hamon ta sahou mwasin mene jo atiye ewek taha. Sahou mwasin doh ta nyala Jises Krais, ma hawe in hamon ta sahou bwena mene aton mara-ei kabatana le munyak asahan eme eme taku dah.

²⁶Arile, na dah, sahou handru mene doh ndrasak. Aso atiye sahou doh amwenen le ta sahou udu bolo tarou tiri propet ta Kindrei mene asehek, ma amwenen le ta batanau ta Kindrei ta bano bwe, kameh ta udu le buku doh. Ya eme iri lau badu kon munyak mari katehei budon tiri handru ki-in tan ma hawe kanuhun le iy.