Rom 15:3-18

³Krais onposi lotei le le lingiepe menmen piti le ma onom teingine lasi lotei kolo olo. Wolo min watafei il piti paitei yousi, pe pirpei piri polpepei, “Mete pirpei il olpe peireise, wolo il olpe pelpe pepe, pe pirpei pilaiki ki.”

⁴Il men nange wuso paptei paitei yousi piti pinu pepe (olpela testamen), pe paptei piti ma peitalouku piti ku ma mapiri enke le ku ma topo weli wem ku mratei mungario Ma Ili piti kanouku.

⁵le Ma Ili wuso kanouku piti mile singe le le wauku topo weli, Ma Ili fei lepe le miso kaneise piti yailele nemple ratei yire enke malye. Ise yolpepei soma ise yingowo wai lite Krais Jisas, le ise yeflipiye ma wata pirpolo ise yire nemi niliye yirpei yeila nange lite Ma Ili, le yaitei lite Apa Ili louku Jisas Krais.

⁷Yailele nemple watafei Krais laileleise pepe, le ise yolpepe soma ise yeila nange lite Ma Ili.

⁸Ma Ili laltei Krais laule piti kaniepe mete piti Juda, le le lolpepe piti ma kosauku lolpepei, il menmen wuso Ma Ili pele linu topwepe lapiri piti ma lingiepe pepe, le ma lingiepe punkom. Ma Ili lingiepe il pele punkom wusoli il wuso le topwepe lapiri lire manre pite Juda pepe, pe fale punkom.

⁹Le mete pite alpe nemple re, Krais kaniepe piti ma peila nange lite Ma Ili wusoli le onom manepe. Min watafei il piti paitei yousi, pe pirpei pepe, “Min polpepei so wem ki ratei keingalope mete pite alpe nemple, ki ma kirpei kirpolo ki onom teingine kireye. Le ki ma kuro weni piti keilala nange leiye.

¹⁰Le il piti paitei yousi pepe pe nou pirpei polpepei, “Ise mete piti alpe nemple pepe, ise yantepe mete wuso Ma Ili pele keiniepe pepe, yantepe yepi enke teingipe.”

¹¹Le il nou pirpei polo, “Ise mete pite alpe nemple pepe, ise yeflipiye yeila nange lite Ili. Ise mete yeflipiye yeila nange lele.”

¹²Le il wuso Aisaia laptei pepe re pe pirpei polo, “Ninge palyene nele lite Jesi miso laule. Le ma fale lire metine ili piti luntoluwepe mete piti alpe nemple, le pe ma pulpowo le loteteiye piti ma kaniepe.” Jesi le yaitei lite Devit.

¹³Ma Ili wuso ku mulpowo piti kanouku pepe, le miso lirkilau leilaise enke piti ise ma enke teingipe le ise ma ratei yire enke malye wusoli ise yulpowo. Le lolpepe lireise soma singe pite Riri Teingi ma kaneise piti yirkilau yulpowo Ma Ili piti kaneise.

¹⁴Ilim winkem peiki, ki kretai punkom kolpepei, ise yesiepe il teingipe pultei enke peise leinginim. Le ise retai yoporotei yire tisi liti yingowo Krais, le ise miso yeitalo isotei wane.

¹⁵Wolo youti nepei, ki kaptei il singe kirpei kire menmen wuso ise ma retape re yingiepe pepe, le ki kolpepei piti ma keilaise enke le ise ma onposiepe. Ki kirkilau kirpei wusoli Ma Ili onom maneiki, le le waiki towa teingi piti kesio.

¹⁶Ki kesio towa lite Krais piti ma kaniepe mete pite alpe nemple. Ki kesio towa watafei metine liti leptawio Ma Ili siye pepe, wolo ki kesio towa piti keptalo Il Teingipe pite Ma Ili pe mete piti alpe nemple. Ki kolpepei piti ma kaptei mete piti alpe nemple pepe fale teingipe watafei siye wuso Riri Teingi loporipe piti watowo Ma Ili pepe, le Ma Ili ma onom teingine lasiepe.

¹⁷Krais Jisas kaneiki piti kesio towa lite Ma Ili, le ki ma rautu kutei kiri towa fei lepei.

¹⁸Men nange wuso Krais kaneiki piti kesiepe fale pepe, menmen poteteiye fei pepe ma ki kirkilau kirpei kasiepe piti ma kosape mete piti alpe nemple kire tisi liti pulpowo Ma Ili. Ki ma kosape kire il piti ki kirpei le wai leiki piti kesio towa kingiepe il wuso kirpei pepe.