Roma 15:3-18

³Weo Kristusi kontai wiro sera we fio dohong mantauni piraisera fo kaha, wape niari kariri kaiwo dotu tono: “Kaiwo karirao inontarai eteibera Seng Allai Wau fo, isodairai kontai ampa.”

⁴Weo kaiwo ariri fuba esoi kiai na Kaiwo Mararebana fo na fafongfa nani, oi we deunau tata nai, ambori aunau tasobui tonana foi dohong tata tatawang tata tuti taenemirorong mitubaru, ampafe taenemitawanai we Allai.

⁵Kadono Allai mano wedaya inontarai etawansa tuti dohonsa enemirorong mitubaru foi, fiata mea we menemirorong boyari, kariri Kristus Yesusi ne minohi toa fo.

⁶Ambori na menemirorong boyari tuti merawamifui boyari metaparanding Allai, amani tane Seng Yesus Kristusi tamana.

⁷Ampafe todoni kontaio metamang wawera mea, kariri Kristusi kontai demang we tata fo. Ambori na tonanane kaiwasafoi etaparanding Allai.

⁸Weo, yeyo yeikaririaifa we mea we Kristusi da ma wewoming we inontarai Yahudi fosa kawuru ampa. Niari tonanafo we deinawiai wesa we ewaitawanai, we Allai mani dohong kariri ne kaiwo derera fo na mai, amani na kaiwo dereraio dohonai we ene riria fafong fosa fo.

⁹Tuti we niari inontarai na nu siai, amani ne Yahudi kaha fosa, kontaia etaparanding Allai we ne arosa fo. Toyari na Kaiwofo rabuang bei dotu tonina: “Ampafe yau ambori ifiai wau rahang kaiwasa Yahudi kaha fosa kontai, ambori irohi rarung fiai fo we ifiai wonomuwai.”

¹⁰Rabuang bei dotu kontai aha tonina: “Kaiwasa Yahudi kaha wa mea, memararising kontai ria Allai ne inontarai dirisara fosa!”

¹¹Tuti rabuang bei aha mani dotu kontai tonina: “Kaiwasa Yahudi kaha wa mea kiai, mefiai Sempaisi, todoni kontaio kaiwasanei kiai efiai!”

¹²Tuti nabi Yesayai medurai kontai deyo, “Ambori Isai ne bitiri sanami foi, ureng bei soparimai kiawariaia fiabai, amani manei na Isai ne ririrafoi, kiawariai we yu nu bodoni kontai ki, tuti kaiwasa Yahudi kaha foi enemitawang te I.”

¹³Kadono Allai mano taenemitawani foi, dohong mea memararising pampang tuti wedaya mea menumiruainso ne maifo, na meroasoi pampang fo. Ambori na Nuaninu Mirarebana foi ne mambiriufo, menemitawanafo fuba paria.

¹⁴Doroi meaine. Iroasoai we mea mani, menari kariri ne bengfo bitoya paria, tuti mewaitawang maino fifiani kontai tuti mewemambiriu we metaunau wawera mea kontai.

¹⁵Wape fieai wedaya anta iwemambiriu we isoi kaiwone we mea, we yeretawang mea, weo Allai dohong ne bengfo arora we yau ampa,

¹⁶amani yuai yaua iwemangfata we Kristus Yesusi ampa, we ifata Yahudi kaha fosa na nu bodoni konta foi. Tuti dohong yau nehu tarai weimami we yeiriri Kaiwo Mahikai na Allai fo, ambori inontarai Yahudi kaha fosa eroaso Seng Yesusi ambori ewekorbani mesi we Allai, we Nuaninu Mirarebana foi yuairuransa awa emararebanaia fefe.

¹⁷Ampafe iboiwawa arohu na Kristus Yesusi we fi iru we Allai fo.

¹⁸Imaya we imadu kariri fi siai fea kaha, manta kariri fianai aino Kristusi niari na yaua fo, amani we iwiwiaing Yahudi kaha fosa na kaiwo imadura fo tuti na yohong toa fo, ambori eroaso Yesusi tuti na tonanane mani etohong kariri Allai ne dawiafo.