Lom 15:3-18

³Nibo tekein kebuobe, Klaist esa ele bobol tem funino mo namin blimobe. E Gode kukubo gobobie ota e nabinabebe. Gode buk temo kukub misiamo Klaiste dimo tam tlemabo wengo baanoa Nakaia unangai God kobo weng dobo weng okemibo kebkobbabo neta onemomabiobo genobiobe. Inamin kesoa e Gode bobol tem funin ota wafu bianea nakaia unangai deibenea i e weng dobo weng ohabinibbiobe.

⁴Sinanggwano Gode buk temo wengo dolaibbuo nibta baabenibta dolaibbiobe. Weng olo alukum nib bobol temo omsbal sanyebua nib bainobo galino amitie sbal mabianoba Klaist esu unomabbio amo waiso biobobe.

⁵Gode nib bobol temo omsbal sambianea daayebe kesoa nib bainobo galino amitie sbal mabiobobe. Gode daabenea ibo Yesus Klaiste tenaniba ib bobol temo makob aine!

⁶Ibo inanimibo ib bobol tem osa ib sital osa makob aniba Gode niniino dobtouleb nomabiobe. E nib Sume Yesus Klaiste Ayobe.

⁷Bainobo galino sbalma blib ibsa eka bainobo galino mo sbal maim blim ibsa ib sinwalo alukum nekwal kesoa ib bobol temo makob omfaniba makob sino Klaiste ibo baabenea Ibo ne meletan kesoa nibo makob anomo genebio inaniba makob aine! Ibo inanimibo nakaia unangai dabalim olo blibi Gode niniino dobtouleb nomabiobe.

⁸Niminbabe, Gode e miine Yesus Klaiste dabanea daakenea dabalim ele tlanea ni alebenea makob sino Gode ni faninwali moton wengo baabenebio inanea Yudai daabenebiobe.

⁹Eka kukub mak osa Klaiste tenea Yudaba nakaia unangai dohalilanea daabenebio kesoa i o bobolo fumbianiba Gode niniino dobtouleb nine! Weng olo makob Debite Gode buk temo dolanebuo baanoa E inanebio kesoa ne keb niniino Yudaba nakaia unangai kin dimo omkeimania baabenia Gode niniino dot Sumobo ge baabenia eka ne keb niniino kemtouleb nin anso ngananamabibo gena bianoa

¹⁰eka mak ole enangge baanoa Yudaba nakaia unanga ibo Gode meletani temnaniba seinine gena bianoa

¹¹eka weng mak osa imin baanoa Yudaba nakaia unanga ibo alukum Sume niniino dobtouleb nine! Eka nakaia unangai alukum bib mak betan mako blib ibsa e niniino dobtouleb nine genanobiobe.

¹²Eka Gode weng omkeimalin nakae niniino Aisaiae Gode wengo buk temo dolanebu osa baanoa Yesie meletani isak temo naka make tenea Yudaba nakaia unangai komok anea i e bainobo gebaniba e inamin namin kukub ayamo i omyamabeo waisonomabiobo genanobiobe.

¹³Gode baabenea Ne ibo dletnia ne bibam unomo genebio kesoa ibo e waisa bliobe. Ne Gode baabania I kobo bainobo gabib kesoa kobo seinin sum osa bobol tem ayam osa omyene! Kobo i sino Hobe titilo omyebbua daayebo kesoa i Yesuse imin tlameo dletnea moniba keb bibam unomabibo waiso blibo seinine ge ohabibe.

¹⁴Ne nekwal ibo ne tekein kebio ibo kukub ayamo amitie wafu bliobe. Ibo Gode wengo kla tekein kebib kesoa ibo ib sinwalo alebesese blibo ne funania Ib aleyemin kukub olo ayamobo gabibe.

¹⁵Ne funania Gode wengo atosino imin alebeia funaine gabi kesoa ne olo mo tosiananita deibonimibabe. Ne sbal weng baania dola omfubenamabibe. Niminbabe, Gode emaye daatnenea

¹⁶nemfakanea Kobo Yesus Klaiste dowan wengo omeb moneba Yudaba nakaia unangai omkayemale ge baatnenebio kesoa ne inania omkayebibe. Ne ina biania nakaia unangai Gode Hobe i daayebea hengmino deiboniba i bobol temo deskina omoniba Gode omkahabiba e i baabenea Ibo ne meletanobo ge oyebei dleb tenia Gode dokaha biania makob Gode amo kimanin nakai eil sibsibi ina dleb te funiba Gode dlanabib inaye bia Gode seinyebebe. Gode kobo inamale ge baanea nemfakanebio kesoa ne sbal weng olo ibo dola omfubenamabibe.

¹⁷Ne Yesus Klaiste ni dab ni bobol tem funino makob an bianoba Gode okok olo okok kebi kesoa ne okok olo seinwe biania weng olo ibo dola omfubenamabibe.

¹⁸Klaiste titilo ne omnenea daatnene kesoa ne Yudaba nakaia unangai Gode wengo omkaye biania daaye bia eka Gode Hob esak e titilo omnenea daatnenane kesoa ne okoko sumo sino i mo watemin blimo klabia i Gode wengo wente bianiba ele weng baanebio iwat inabiobe. Weng olo ne okoko Klaiste daatne bia okok kebio weng sango olota ibo baabenamabibe. Ne weng afeto mo baabenimibabe. Ne Klaiste weng olo inania okok kem unibuo Yelusalem bibo sin omkeimai ole deibonia monia bib mak bib mako weng olo omkeimam wat watnia monia Ililikam betan ye biania omkeima binibiobe.