Revalesen-Hufo Hu'ne 7

1

2

3

4

5

6

7

8

9

10

11

12

13

14

15

16

17

18

19

20

21

22

¹Anama hutegena kogeno, 4'a rugaraga asoparega ama mopamofona ankero vahe'mo'za otine'za, 4'a kaziga e'neria zahora zmazampi azerinageno, mopafine hagerimpine, zafafinena zahora e'orine.

²Hagi anantera kogeno mago ankeromo'a zage hanati kazigati ehanatino, manivava Anumzamo hunagru huno nagrizane hu'nea avame'za, erineno mopane hagerine eri haviza hugahaze huzmante'nea 4'a ankero vahera ranke huno zmasamine.

³Mopane hagerine, zafaraminena zmazeri haviza osu'nenketa, Anumzamofo kazokzo eriza vahetamimofo kokovite avame'zana rekamre antetaneno hu'ne.

⁴Anantera antahugeno avame'za rekamre zmante'nea vahema hamprineana 144 tauseni'a mni'naze. Ana vahera maka Israeli mofavre'ramimofo naga nofipinti vahetami hamprine.

⁵Juda nagapintira 12 tauseni'a huhamprino, avame'za rekamrezmanteno, Rubeni nagapintira 12 tauseni'a huhamprino, avame'za rekamre zamanteno, Gadi nagapintira 12 tauseni'a huhamprino, avame'za rekamre zmanteno,

⁶Asa nagapintira 12 tauseni'a huhamprino, avame'za rekamrezanteno, Naftali nagapintira 12 tauseni'a huhamprino, avame'za rekamrezmanteno, Manase nagapintira 12 tauseni'a huhamprino, avame'za rekamre zmanteno

⁷Simioni nagapintira 12 tauseni'a huhamprino avame'za rekamrezmanteno, Livai nagapintira 12 tauseni'a huhamprino, avame'za rekamrezmanteno, Isaka nagapintira 12 tauseni'a huhamprino, avame'za rekamre zmanteno

⁸Zebuloni nagapintira 12 tauseni'a huhamprino, avame'za rekamrezmanteno, Josefe nagapintira 12 tauseni'a huhamprino, avame'za rekamre zmanteno, Benzameni nagapintira 12 tauseni'a huhamprino, avame'zana rekamrezmantene.

⁹Anazama hutegena kogeno, tusi'a vahekrefa mago'mo'e huno hamprigara osu'nea vahe'mo'za maka kumapinti ene, naga nofipinti ene, vahepinti ene, maka agerupinti ene, Sipisipi Afu Anentamofo tra'mofo avuga, efeke zaza kukena hu'ne'za, zmazampina tofe zafamofo ani'na hantagi'za erine'za oti'naze.

¹⁰Zamagra ranke hu'za anage hu'naze, tagri Anumzama tratema mni'nemo ene, Sipisipi anentamo'ene, tagu'vazine tahokehena'e hu'za hu'naze.

¹¹Mika manigagi'naza ankero vahe'mo'zane, ugagota kva vahe'mo'zane, 4'a kasefa hu'za mni'naza zgamo'za, kini tramofona manikanegi'za zmavugosaregati zmarenare'za umase'za, Anumzamofona mono hunte'za,

¹²amanage hu'naze, tamage, husgama huntezane, ra agine, knare antahizane, muse huntezane, antahisga huntezane, hihamune hankavea Anumzamo eri vava hugahie tamage hu'naze!

¹³Anante 24'a ugagota kva vahepinti mago'mo nantahigeno, amama efeke zaza kukenama hu'nazana, zamagra iza'za mni'ne'za, igati zmagra e'naze? Hige'na,

¹⁴nagra anage hu'na asami'noe, Ranimoka kagra antahinane hu'na hugeno, Agra anage huno nasami'ne, ama'i zmagra tusi'a hazenkezampi ufretageno ha' vahe'mo'za nezamahazageno, zaza kukenazamia Sipisipi Anentamofo koranteti sese hugaru huzmantageza efeke hu'namoze.

¹⁵Na'ankure ama ana agafare, Anumzamofo kini tra avuga oti'ne'za hanine zgenena Agri ra mono nompi eri'zama'a erinentazankino, tratema mni'nemo'a, Agra kegva huzmantegahie.

¹⁶Zamagrira zmagamate'zane, tinku zmavesizane omnena, zge hara zmave'osina, amuhogura osugahaze.

¹⁷Na'ankure tra'mofo amunompima mni'nea Sipisipi anentamo, kegva huzmanteno asimu erino mni tinkapuite vanigeno, Anumzamo maka zamavunura eri homu huzmante vgaregahie huno hu'ne.