Rafúdoo 40:9-29

⁹Yáaweefa Mooseena kafáa qímaminoo qínau. Qiní náaquqara fadameena maraséenana úiqaana máaqa faqa minakínaa áiqama áinaina qiní útaaqama qímaqaranasaa rurúfá másainanoo náaquqanoo máriani.

¹⁰Miqímmáseenana firaa aidara aandáu tatúfirana suqée máriana faqa minásaa qáraa áinainauqasaa faqa mi fadameenná rurúfa másainanoo káaqa náaquqanoo máriani.

¹¹Nammári dífaanisaa faqa miná óosanasaa faqa miqí kai iaqa.

¹²Miqí másee Áaroona narí faiqi námu faqa nífiqamaree úiqaana máqa kooqíki múnusáinaqa nammári áuqaaqa.

¹³Áuqamásaifana aanáiqikirausa qamunna marasée Áaroona afisú ámaqasee qiní útaaqama qímaqara fadaméena akiiqa ámoondunna rurúfammásáinanoo náaquqanoo máridanoo qiní aanáiqikira sáikaki máriani.

¹⁴Miná faiqi námu nífiqee míniseenana aanáiqikirausa qamunna afisú nímaqaa.

¹⁵Miqí máseenana Áaroona íanandee ínana miná faiqi námu faqa fadaméena níkiiqa ámoondúnna rurúfamma nímaqaa. Miqímmasáinaqa qiní aanáiqikira sáikaki máriaqa. Mi fadameenafa misá náaruara qiní aanáiqikira sáikaki márirana nímiannoo.

¹⁶Móoseefa aiqáma áinaina Yáaweefa qímamúndee kai másee áuqanau.

¹⁷Isipa máqa máaqa kíqari ánukari moo áukuana áiqaróofaqa moo áukuana indaarúqaa úqoona miná indaarúqaa fáasaanasaa Yáaweena náaquqara úiqaana máaqa usakáqau.

¹⁸Mooseefa qufaqá úiqaana máaqa átuna ámaaqauqa maqáki quqáseeqa máaqa atuna minakíaqa kurádamasee ausana auní rúmasee kooqíndanai átuna faqa rakíaqau.

¹⁹Rakiqaseeqa indaarúqaa qamunna qairí akuséeqa miná ámuaaqa qaaramoó miná rafaaqafuanífeera qairí ákiqau. Yáaweena ufamaú kaimbiqau.

²⁰Mooseefa sánda ufa ákararira óoniqara bookísaki quqáseenoo miná aindúsira áikaqara anaanukí upeekáseenoo miná nífauara afu rafáaqafinau.

²¹Rafáaqafúseenoo mi bookisána maréeqeenoo úiqaana máqaki quqáseenoo qamunna qumáreenoo dirisoofanóo minásaa ititá ámaqanau. Yáaweena ufamáu kai miqínau.

²²Mooseefa áiku faqaa teeboora maréeqeenoo náaquqara óosiranaki súani áfu dínni átaaqeenni North quqánau.

²³Quqáseenoo mi teebooránasaa Yáaweena ámiraree qù féemuna quqáqoofanoo márinau. Yáaweena ufamáu kai finau.

²⁴Miqí máseenoo Mooseefa qóoma saqari úiqaana máqaki súani afu dínni átaaqeenni (South) máaqa atuna mámmaaqai quqánau. Dínni táatatai áiku faqaa teeboora quqásee dínni táatatai qóoma sáqari quqánau.

²⁵Yáaweefa qúmi máru úiqaana maqánaki qóoma sáqari quqásee qumbísoofanoo qanau. Yáaweefa qímamúndee kai inau.

²⁶Miqí máseenoo Mooseefa kóorannai áuqira qáidara maréeqeenoo úiqaana máqa maamiqóo óosiranaki ititáqoo qámunnana aaqá quqánau.

²⁷Quqáseenoo mifá ámiqira áfundimaruna andaana rírana quqáseenoo idáranau. Yáaweena úfamau kai finau.

²⁸Mifá úiqaana máqa kooqíki qámunna dírinau.

²⁹Diriséenoo tatúfirana suqée máru qaidarána úiqaana máqa kooqí amummaqa mádaanai quqánau. Quqáseenoo Mooseefa aandáù tatúfirana faqa sakuma fooqáa írana qaindi rírana faqa tatúfinau. Yáaweena ufamáu kai miqínau.