Psalms 89:20-48

²⁰I diaradar ai ladu Dawid, I keiekidier i ai le jaraui.

²¹Pa i pan kolekol i, o pa i pan kamanada i anjau karoj.

²²Imwintiti kan jota pan kak widin on i, o me japun kan jota pan kak kaloedi.

²³I pan kamela me palian i mo a, o I pan kaloke ir, me kailonki i.

²⁴A ai melel o kalanan pan mi re a, o ni mar ai oj a pan pokapokada.

²⁵I pan ki on pa a, en kaunda madau, o pa a maun, en kaunda pil akan.

²⁶A pan likwir don ia: Komui Jam ai, ai Kot, o paip en maur i.

²⁷O I pan wia kila i nai mejeni, ileila jan nanmarki en jappa kan.

²⁸I pan kalanan on i kokolata, o ai inau on i pan duedueta.

²⁹I pan ki on i kadaudok a kokolata, o mol a pan warai dueta lan.

³⁰A ma na kan pan muei jan ai kapun, o re jota pan weweid ni ai kujoned akan,

³¹Ma re pan kajaminela ai tiak kan, o jota peiki on ai kujoned akan,

³²I ap pan kaloke kin ir ar katiwo ki jokon pot, o pan woki ir, pweki ar japun.

³³A I jota pan kiwei jan i ai mak, o ai melel pan mimieta re a.

³⁴I jota pan kawela ai inau, o I jota pan kawukila, me kowei jan nan au ai.

³⁵I kaukilar ai jaraui pan me pak, me I jota pan likam on Dawid:

³⁶Kadaudok a pan joutuk, o mol a dueta katipin mo i.

³⁷A pan duedueta dueta jaunipon; o jaunkadede nan tapok kan me melel. Jela.

³⁸A met komui kajapokela o onioni japwilim omui me keidier.

³⁹Kom kotin kajela inau en omui ladu, o kom kotin kajaminela mar a.

⁴⁰Kom kotin karonk pajan a kel akan karoj, o kawelar a im teneten kan.

⁴¹Karoj me daulier waja o kulia janer; a wialar kankaurur on men imp a kan.

⁴²Kom kotin pokada pali maun en me palian i, o kaperendar a imwintiti kan karoj.

⁴³Kom pil kotiki janer mana en a kodlaj kon, o jota kapwaiada i ni pei.

⁴⁴Kom kotin kaimwijokalar a linan, o kajedi on nan pwel mol a.

⁴⁵Kom kamotomotala ran en a manakap, o kadupalekidi i namenok. Jela.

⁴⁶Arai da, Main Ieowa, me kom pan kotin karirela pein komui; arai da omui onion pan lulada dueta kijiniai?

⁴⁷Kom kotin tamanda duen motomot en maur i; de me mal kot omui kotin wiadar aramaj akan?

⁴⁸Ij ol o, me maur ap jota pan lel on mela? A pan kak dorela pein i jan mana en wajan mela? Jela.