Tingtoeng 89:20-48

²⁰Ka sal David te ka hmuh coeng tih kamah kah situi cim neh ka koelh coeng.

²¹Ka kut te anih taengah tawn uh tih ka ban loh nih a thoh ni.

²²Anih te thunkha loh phae pawt vetih dumlai ca long khaw phaep mahpawh loh.

²³Tedae a rhal te anih mikhmuh ah ka phop pah vetih a lunguet khaw ka vuek pah ni.

²⁴Te vaengah anih taengah kai kah uepomnah neh sitlohnah om vetih ka ming neh a ki khaw pomsang uh ni.

²⁵A kut te tuitunli soah, a bantang kut te tuiva rhoek soah ka khueh pah ni.

²⁶Anih loh kai te, “Nang tah ka napa, ka Pathen neh kai ham khangnah lungpang,” n'khue ni.

²⁷Kai long khaw anih te caming omthang neh diklai manghai rhoek kah a sangkoek la ka khueh ni.

²⁸Kamah kah sitlohnah te anih ham kumhal duela ka ngaithuen rhoe ka ngaithuen pah vetih, ka paipi he anih taengah cak ni.

²⁹Te dongah a tiingan te a yoeyah la ka thoh pah vetih a ngolkhoel loh vaan khohnin bangla om ni.

³⁰A ca rhoek loh ka olkhueng he a hnoo uh tih ka tiktamnah dongah a pongpa uh pawt atah,

³¹ka khosing te a poeih uh tih ka olpaek te a ngaithuen uh pawt atah,

³²amih kah boekoek te mancai neh, amih thaesainah te khaw tlohthae neh ka cawh thil van ni.

³³Tedae ka sitlohnah he anih taeng lamloh ka phae pah pawt vetih ka uepomnah te rhi ka lat pah mahpawh.

³⁴Ka paipi he ka poeih pawt vetih ka hmui lamkah aka thoeng khaw ka thovael mahpawh.

³⁵Ka cimcaihnah neh vai ka toemngam tangtae te David taengah khaw ka laithae mahpawh.

³⁶Anih kah tiingan te kumhal duela om vetih a ngolkhoel loh kai hmaiah khomik bangla om ni.

³⁷Hla bangla kumhal ah cikngae vetih khomong soah uepom laipai la om ni,” na ti. Selah

³⁸Tedae na hlahpham tih na hnawt coeng dongah na koelh hlang te na poe.

³⁹Na salpa kah paipi te na hai tih a rhuisam khaw diklai neh na poeih pah.

⁴⁰Anih kah tanglung khaw boeih na phae pah tih a hmuencak rhoek khaw porhaknah la na khueh pah.

⁴¹Longpuei kah aka pongpa boeih loh anih te a rheth uh dongah a imben rhoek kah kokhahnah coeng.

⁴²A rhal rhoek kah bantang kut te na pomsang pah tih a thunkha boeih kah ko na hoe sak.

⁴³A cunghang taeh khaw na kolong pah sak tih caemtloek vaengah khaw na duel pawh.

⁴⁴A caihcilnah te na kangkuen sak tih a ngolkhoel te diklai la na voeih pah.

⁴⁵A cacawn tue na rhaem pah tih, yah neh na thing. Selah

⁴⁶BOEIPA nang mevaeng hil nim na thuh uh vetih, na kosi loh hmai bangla a yoeyah la rhong ve?

⁴⁷Hlang ca rhoek boeih na suen he a poeyoek mai la. Te dongah mebang khosaknah dongah khaw kai he m'poek lah.

⁴⁸Mebang hlang nim aka hing tih dueknah hmuh pawt ham, saelkhui kut lamkah a hinglu te aka poeng aka hal thai? Selah