Yabura 89:20-48

²⁰I wɔyɛn nɛ i xa ɲama bɛ laamatunyi ra, a falafe ra, «N bara sɛnbɛ fi geresoe nde ma, n naxan xun nakelixi ɲama tagi.

²¹N bara n ma konyi Dawuda to, n ture sɛniyɛnxi surusuru a xunyi ma sugandi ra.

²²N na n bɛlɛxɛ rasoma a bun ma, n sɛnbɛ fima nɛ a ma a fanyi ra.

²³A yaxui mu a tɛrɛnnama, tinxintare mu a tɔɔrɔma.

²⁴N a yaxuie ibutuxunma nɛ, n a xɔnmae bɔnbɔma nɛ.

²⁵N xanunteya nun n ma dugutɛgɛɲa luma nɛ a ma, a sɛnbɛ gboma n xili nan saabui ra.

²⁶Baae nun xuree birin sama nɛ a xa mangɛya bun ma.

²⁷A a falama nɛ n bɛ, ‹N Baba nan i ra, n Marigi Ala, n ma marakisima.›

²⁸N a findima nɛ n ma di singe ra, naxan xungbo duniɲa mangɛe birin bɛ.

²⁹N na n ma dugutɛgɛɲa mabanbanma nɛ a bɛ, muxu saatɛ naxan xirixi, a mu kanama abadan.

³⁰N a bɔnsɔɛ rasabatima nɛ, n a xa mangɛ kibanyi mabanbanma nɛ fanni koore na.

³¹A xa die na n ma sɛriyɛ rabolo, e mu e ɲɛrɛ n ma yaamari bun ma,

³²e n xui matandi, e mu n waxɔnfe suxu,

³³n e bɔnbɔma luxusinyi nan na, n e ɲaxankatama fure ɲaaxie ra.

³⁴Kɔnɔ n mu n ma dugutɛgɛɲa bama a ma. N mu n xui yanfama,

³⁵n mu n ma saatɛ kanama, n man mu n xui masarama.

³⁶N na n kalixi n ma sɛniyɛnyi ra, n mu Annabi Dawuda yanfama.

³⁷A bɔnsɔɛ kisima nɛ abadan, a xa kibanyi luma nɛ n ya i alɔ soge,

³⁸a rasabatima nɛ alɔ kike, naxan findima seedeɲɔxɔya ra abadan.» Ɲɛngi rate.

³⁹Kɔnɔ i tan bara i xa mixi sugandixi makuya i ra, i bara mɛɛ a ra, i xɔnɔ a ma.

⁴⁰I bara i xa saatɛ kana i xa konyi bɛ, i a ba a xa kibanyi kui.

⁴¹I bara a xa tɛtɛ bɔɔ, i bara a makantade kana.

⁴²Mixi naxee dangima, e harige bama naa. A dɔxɔbooree yoma a ma.

⁴³I bara a yaxuie sɛnbɛ so, han e bara sɛɛwa.

⁴⁴I mu a xa santidɛgɛma wali rasɔɔnɛya, i mu a malixi gere kui.

⁴⁵I bara a xa fe raxuben, i bara a xa kibanyi woli bɔxi.

⁴⁶I bara nde ba a xa fonikeya ra, i yaagi dusu a xun na. Ɲɛngi rate.

⁴⁷Alatala, i i nɔxunma n ma han mun tɛmui? I xa xɔnɛ dɛxɛma alɔ tɛ han mun lɔxɔɛ?

⁴⁸I xa ratu a ma n ma simaya dunke ki naxɛ. I ibunadama daaxi fuyan nan na?