Psalm 78:9-59

⁹Mwet Ephraim elos tuh us pisr ac sukan pisr natulos A elos kaingla in len in mweun.

¹⁰Elos tia liyaung wuleang lalos nu sin God, Ac elos srangesr akos ma sap lal.

¹¹Elos mulkunla orekma lal, Oayapa mwenmen su El oru ye mutalos.

¹²God El oru ma usrnguk ye mutun mwet matu lalos In acn Zoan in facl Egypt.

¹³God El oralik meoa ac lela tuh elos in fahsr sasla; El oru tuh kof uh in tuyak oana eol.

¹⁴Ke len uh El kololos ke sie pukunyeng, Ac ke fong uh ke kalem ke e.

¹⁵El foklalik eot uh yen mwesis Ac sang kof nimalos liki acn loal.

¹⁶El oru tuh soko infacl srisrik in tuku ke eot uh me, Ac orala tuh kof uh soror oana soko infacl.

¹⁷Tusruktu, elos srakna orekma koluk lain God, Ac elos lain El Su Fulatlana yen mwesis.

¹⁸Elos ke pacna srike God Ke elos sapkin tuh Elan kitalos ke mwe mongo elos lungse.

¹⁹Elos kaskas lain God ac fahk, “Ya God El ku in ase mwe mongo in acn mwesis uh?

²⁰Pwaye lah El puokya eot uh Ac kof uh kahkma. Na fuka, El ku pac in ase bread nasr Ac kite mwet lal ke ikwa?”

²¹Ke ma inge LEUM GOD El kasrkusrak ke El lohng kas lalos. El akkeokye mwet lal ke e, Ac kasrkusrak lal kaclos yokelik,

²²Mweyen wangin lulalfongi lalos in El, Ac elos tia lulalfongi lah El ac ku in molelosla.

²³Na God El kaskas nu yen engyeng uh Ac sapkin tuh srungul we in ikakelik;

²⁴El sang wheat inkusrao me Ke El supwama manna nalos.

²⁵Ouinge, mwet uh mongo ke mwe mongo nun lipufan, Ac God El supwama fal nu ke enenu lalos.

²⁶El oayapa oru tuh eng kutulap in tuhyak, Ac ke ku lal El purakak eng eir me.

²⁷Na El supweya won nu sin mwet lal, Pus oana puk weacn uh.

²⁸Won inge putati infulwen na nien aktuktuk lalos, Ac raunela lohm nuknuk selos.

²⁹Ouinge mwet uh mongo ac arulana kihp, Tuh God El sang nu selos fal nu ke enenu lalos.

³⁰Tusruktu, elos soenna muti ke kena lalos, Ac elos srakna mongo

³¹Ke God El kasrkusrak selos Ac uniya mukul su fokoko emeet lalos; Aok, mukul fusr su wo emeet sin mwet Israel.

³²Ne ouinge elos srakna oru ma koluk God El finne orek mwenmen nu selos, ac elos srakna tia lulalfongel.

³³Ke ma inge God El aksafye len lalos oana lusen mong se; In kitin pacl na El arulana kunausla moul lalos.

³⁴Pacl nukewa ma God El ac onela kutu selos Na mwet lula uh ac forla nu sel, Elos ac auliyak ac pre ke kuiyalos nufon.

³⁵Elos esamak lah God El nien molela lalos, Ac El Su Kulana El tuku kasrelos.

³⁶Tusruktu kas nukewa lalos kikiap — Tiana pwaye ma elos fahk.

³⁷Elos tia nunak pwaye nu sel; Elos tia inse pwaye nu ke wuleang lalos nu sel.

³⁸Tusruktu, God El pakomuta mwet lal. El nunak munas ke ma koluk lalos Ac tia kunauselosla. Pacl pus El sruokya mulat lal lukelos, Ac kutongya kasrkusrak lal.

³⁹El esam lah mwet inge elos mwet moul in ikwa, Moul lalos oana eng uh ke ac tuhwot ac tia folok.

⁴⁰Pus na pacl elos aktoasrye God yen mwesis, Oayapa pus na pacl elos aksupwaryal.

⁴¹Pus na pacl elos srike God Ac akkeokye insien God Mutal lun Israel.

⁴²Elos mulkunla ku lulap lal Ac len se El tuh molelosla liki mwet lokoalok lalos,

⁴³Ac orala ma ku ac usrnguk In acn Zoan in facl Egypt.

⁴⁴El ekulla infacl we nu ke srah Na wangin kof mwet Egypt in nim.

⁴⁵El supwala un loang nu inmasrlolos, mwe akkeokyalos, Ac frog in kunausla acn selos.

⁴⁶El supwala locust in kangla fokinsak sunalos Ac in kunausla ima lalos.

⁴⁷El kunausla ima grape lalos ke af yohk kosra, Ac kunausla sak fig ke aunfong oyohu.

⁴⁸El uniya cow natulos ke af yohk kosra, Ac un kosro natulos ke sarom.

⁴⁹El srunglulos Ke kasrkusrak ac mulat lal, Oana sie un lipufan su tuku in use misa.

⁵⁰El tia sruokya mulat lal Ku molela moul lalos, A El onelos ke mwe akkeok.

⁵¹El uniya wounse nukewa In sou nukewa lun mwet Egypt.

⁵²Na El kolla mwet lal oana sie shepherd, Ac pwanulos sasla yen mwesis.

⁵³El kololos in misla ac elos tia sangeng, A meoa tuku ac afunla mwet lokoalok lalos.

⁵⁴El kololos nu ke acn mutal sel, Nu ke eol we su El sifacna eisla.

⁵⁵El lusak mwet in facl sac ke mwet lal elos utyak Ac El kitalik acn selos nu sin sruf lun Israel, Ac sang lohm sin mwet we nu sin mwet lal.

⁵⁶Tusruktu, elos tuyak lain God Kulana, Ac kena sifilpa srikal. Elos tia akos ma sap lal,

⁵⁷A elos forla liki God ac tia pwaye nunak lalos nu sel, oapana mwet matu lalos meet ah; Elos sesuwos oana soko sukan pisr kururu.

⁵⁸Elos arulana akkasrkusrakye God ke nien alu lalos Ac ke ma sruloala lalos.

⁵⁹God El arulana mulat ke El liye ma inge, Ac El sisla na pwaye mwet Israel.