Psalm 56:1-7

¹Psalm lal David, Tukun Mwet Philistia Sruokol in acn Gath Pakomutuk, O God, Tuh mwet lokoalok luk elos ukweyu, Elos kalyeiyu in pacl e nukewa.

²Mwet su srungayu elos lainyu len fon; Arulana pus mwet anwuk lainyu inge.

³Ke pacl nga pula sangeng, O LEUM GOD Kulana, Nga filiya lulalfongi luk in kom.

⁴Nga lulalfongi God, ac tiana sangeng; Nga kaksakunul ke wulela lal nu sik. Mea mwet ac ku in oru nu sik?

⁵Mwet lokoalok luk aklokoalokyeyu ke len fon; Pacl nukewa elos suk na ma in akkolukyeyu!

⁶Elos tukeni ke nien wikwik Ac tawi ma nukewa nga oru, Ac kena uniyuwi.

⁷Kaelos, O God, ke ma koluk lalos inge; Ac kutangulosla in kasrkusrak lom!