Psalm 50:2-20

²Kalem lun God saromrom Zion me, Siti se su oaskulana in woiya.

³God lasr El tuku, tuh El tia tuku misla; Sie e lulap fah fahsr meet lukel, Ac sie eng upa raunella.

⁴El pangon kusrao ac faclu elos in orek loh kac, Ac liye ke El ac nununku mwet lal.

⁵El fahk ouinge, “Eisani mwet oaru luk nu yuruk, Elos su tuh orek wulela yuruk ke mwe kisa.”

⁶Kusrao fahkak lah God El suwoswos, Ac El sifacna pa Mwet Nununku.

⁷“Porongo, kowos mwet luk, ac nga ac fah kaskas; Nga fah kaskas lain kom, Israel. Tuh nga God, God lom.

⁸Ke nga kai kom, tia ma ke sripen mwe kisa lom Ku ke mwe kisa firir su kom use nu sik pacl e nukewa.

⁹Tusruktu nga tia enenu cow mukul liki ima lom, Ku nani liki un kosro nutum.

¹⁰Kosro nukewa insak uh ma nutik, Ac oayapa cow su muta fin tausin inging.

¹¹Won lemnak nukewa ma nutik Ac ma moul nukewa in imae.

¹²“Nga fin masrinsral, nga ac tia siyuk sum ke mwe mongo, Mweyen faclu ac koano nufon ma luk.

¹³Ya nga kang ikwen cow mukul uh, Ku nim srahn nani uh?

¹⁴Nga God Fulatlana! Pa inge mwe kisa ma nga enenu sum: In sang kulo ke insiom, ac in akfalye ma kom wulela kac.

¹⁵Pre nu sik ke pacl mwe ongoiya sikyak; Nga ac fah molikomla, Ac kom fah kaksakinyu.”

¹⁶A God El fahk nu sin mwet koluk, “Efu ku kom in fahkak ma sap luk? Efu ku kom in sramsram ke wulela luk?

¹⁷Kom tia lungse nga in aksuwosye kom; Kom pilesru ma sap luk.

¹⁸Kom asruoki nu sin mwet pisrapasr nukewa kom liye, Ac kom insese yurin mukul ac mutan su tia karinganang wulela in marut la.

¹⁹“Pacl nukewa kom akola in kaskas koluk, Ac kom tia tupwek in kaskas kikiap.

²⁰Kom akola in akkolukye mwet lom sifacna, Ac suk mwatan mwet lim.