Pris Sę Ebo Bomai Po 13:50-59

⁵⁰“Te prisgo selama, bugagia sulama, te nai gasa, badu munama, te nogo a naga olama me badu nogo si sogo elalumainao.

⁵¹Te 7 wabo side te agai ma suao, tama te ugwade genuai pedelaibaso da, teda te oiyabe gasi tiwai ebao, tama te ugwa ma kau wali te eno gedude wiegi yai egobe dao.

⁵²Tama prisgo te ugwa isiba ulao. Te oiyabe pedalubo tiwai yali nai, te isiba ulama, mu siago dela silimainao,” wali.

⁵³“Tiali goli, prisgo te nai suali te tiwai tama me elaluyu, te ugwade genuai pedalisąbaso da,

⁵⁴teda agai augwalibolo olama, te ugwa wę tela yao olama, te munalubadi te 7 wabo sogoba usu nao.

⁵⁵Nosali agai ma suao, te oiyabe tiwai yali te au me tama elaludubaso, te ugwa menade te nai pedelali madi elalu, te nai elaluali pesagede me genuai pedalisąbaso da, tagalao, te eno gedude wiegi yai me egobeo. Tialima, prisgo te ugwa isiba ulao.

⁵⁶Tialima, augwaligo ąį telawai madi te prisgo ma suali madi, te oiyabe tiwai yali nai silainu ebaso da, teda agai te ugwa pedai te nai pedelali madi togwa sąyu, te tigi wali me peda sąyao, te dolali naga sela sąyao.

⁵⁷Tialima, nosali te ugwa me kau tigi wali dolali nai ma pedalubaso da, teda te ugwa aga ayago ma kau wali me te isiba ulao, te mu dela silimainao,” wali.

⁵⁸“Tialima, agai te ugwa me kau wali ąį telabo sogo, te oiyabe tiwai nai menia sobaso da, teda agai si sogo ąį tedelama, te ugwa eno gedude wiegi yai mu pedelaibao,” wali.

⁵⁹“Te tobage naigo te gasa tobage nai dolo bomai po elaluali, te ugwa ma te name ugwa augwa te wiegi yai hobigo nigali, ma te sipsip nisigo nigali, te tigidali nai augwa te kau waligo nigali nai. Te bomai pode te nai dabe te eno gedude wiegi yai yali, ma wiegi yai isąwani te bomai po wai dao,” wali.